Yakob Devedhys yn Haran

1Ena Yakob eth yn-kerdh29:1 eth yn-kerdh: Ebrow a dhrehevis y dreys. Martesen an styr yw, ev dhe vos yn-rag gans nerth nowydhhes. ha mos dhe bow mebyon an howldrevel. 2Ev a viras, hag awotta, puth y'n gwel, hag otta, tri flokk deves a'ga growedh rybdho; rag mes a'n puth na y fedha an flokkys dowrys; ha bras o an men orth ganow an puth. 3Oll an flokkys a vedha kuntellys ena, hag i a rolya an men dhiworth ganow an puth ha dowra an deves. Ena i a dhaskorras an men yn y le war anow an puth. 4Yn-medh Yakob dhedha, ‘A vreder, a-ble owgh hwi?’ Yn-medhons i, ‘A Haran yth eson ni.’ 5Yn-medh ev dhedha, ‘A aswonnowgh hwi Laban mab Nahor?’ hag yn-medhons i, ‘Aswonnyn.’ 6Yn-medh ev dhedha, ‘Usi ev yn poynt da?’ hag yn-medhons i, ‘Usi, hag otta, y vyrgh Raghel ow tos gans an flokk.’ 7Yn-medh ev, ‘Otta, rann vras a'n jydh yw gesys hwath,29:7 rann vras a'n jydh yw gesys hwath: Ow siwya an Vulgat. Ebrow an jydh yw hwath bras. nyns yw an eur dhe guntell war-barth an chatel. Gwrewgh dowra an flokk hag ewgh, ha'ga dri arta dhe beurva.’ 8Mes yn-medhons i, ‘Ny yllyn kyns bos an flokkys oll kuntellys war-barth, ha'n men rolys dhiworth ganow an puth; ena ni a yll dowra an deves.’

9Hag ev hwath ow kewsel orta, y teuth Raghel gans deves hy thas, rag bugeles o hi. 10Pan welas ev Raghel myrgh Laban broder y vamm, ha deves Laban broder y vamm, Yakob a dheuth nes ha rolya an men dhiworth ganow an puth ha dowra deves Laban, broder y vamm. 11Ena Yakob a ammas dhe Raghel ha drehevel y lev hag oela. 12Ha Yakob a dherivas dhe Raghel y vos neshevin hy thas ha mab Rebeka; ha hi a boenyas ha'y dherivas dh'y thas. 13Laban, pan glewas derivas Yakob, mab y hwoer, a boenyas er y bynn ha'y vyrla hag amma dhodho ha'y dhri a-bervedh yn y ji. Hag ev a dherivas dhe Laban oll an taklow ma. 14Hag yn-medh Laban dhodho, ‘Sur yw dha vos ow askorn ha'm kig vy’, hag yth esa trigys mis ganso.

Demmedhyans Yakob dhe Lea ha Raghel

15Ena yn-medh Laban dhe Yakob, ‘Yw ewn ty dhe'm servya rag travyth, rag dha vos ow neshevin? Lavar dhymm pygemmys a vydh dha wober.’ 16Dhe Laban yth esa diw vyrgh. Hanow an kottha o Lea, ha hanow an yowynka, Raghel. 17Gwann o dewlagas Lea, mes teg o semlans Raghel, ha teg dhe weles. 18Yakob a garas Raghel, hag yn-medh ev, ‘My a wra dha servya seyth blydhen rag Raghel, dha vyrgh yowynka.’ 19Hag yn-medh Laban, ‘Gwell vydh dhymm hy ri dhiso jy es hy ri dhe wour arall. Gwra triga genev.’ 20Ytho Yakob a servyas Laban seyth blydhen rag Raghel, mes yth heveli kepar ha nebes dydhyow drefenn y gerensa rygdhi hi.

21Ena yn-medh Yakob dhe Laban, ‘Roy dhymm ow gwreg, rag kollenwys yw ow dydhyow, may hylliv mos a-bervedh dhedhi hi.’ 22Ytho Laban a guntellas tus oll an tyller ha gul kevewi. 23Ha, gorthugher, ev a gemmeras y vyrgh Lea ha'y dri dhodho; hag ev eth a-bervedh dhedhi hi. 24Ha Laban a ros y vaghteth Zilpa dhe Lea y vyrgh avel maghteth. 25Mes ternos vyttin, otta, yth o hi Lea, hag yn-medh ev dhe Laban, ‘Pyth yw hemma re wruss'ta dhymmo? A ny wrug vy servya genes seyth blydhen rag Raghel? Prag y hwruss'ta ow thoella?’ 26Hag yn-medh Laban, ‘Nyns yw usys yndella yn agan tyller ni ri an yowynka kyns an kynsa-genys. 27Gwra kollenwel seythun rag homma ha ni a re dhis homma ynwedh, yn attal rag servya genev seyth blydhen moy.’ 28Ha Yakob a wrug yndella ha kollenwel seythun rag homma, hag ev a ros dhodho y vyrgh Raghel yn gwreg. 29Ha Laban a ros y vaghteth Bilha dhe Raghel y vyrgh avel maghteth dhedhi hi. 30Hag ev eth a-bervedh dhe Raghel ynwedh, hag ev a gara Raghel moy es Lea; hag ev a servyas ganso seyth blydhen moy.

Fleghes Yakob

31Ha'n Arloedh a welas bos Lea skonys, hag ev a igoras hy thorr; mes anvap o Raghel. 32Ha Lea a gonsevyas ha dineythi mab ha gelwel y hanow Rewben: rag hi a leveris, ‘An Arloedh re viras devri war ow galarow, rag ow gour a'm kar lemmyn.’ 33Ha hi a gonsevyas arta ha dineythi mab ha leverel, ‘Rag an Arloedh dhe glewes ow bos skonys, ev re ros dhymm hemma ynwedh’, ha hi a elwis y hanow Simeon. 34Ha hi a gonsevyas arta ha dineythi mab ha leverel, ‘Lemmyn an weyth ma y fydh ow gour junys dhymm, rag my dhe dhineythi tri mab dhodho.’ Rag henna, y feu y hanow gelwys Levi. 35Ha hi a gonsevyas arta ha dineythi mab ha leverel, ‘An weyth ma, my a wormel an Arloedh.’ Rag henna hi a elwis y hanow Yuda; ha hi a astelas dineythi.