1Ha Yakob a besyas mos war y fordh hag eledh Duw a dheuth er y bynn. 2Hag yn-medh Yakob, pan y's gwelas, ‘Kamp Duw yw hemma’, hag ev a elwis hanow an tyller na, Mahanaym.

Yakob a Dhannvon Kannasow dhe Esaw

3Ha Yakob a dhannvonas kannasow a-dheragdho dhe Esaw y vroder, dhe bow Seir, gwel Edom, 4hag erghi dhedha, ow leverel, ‘Hwi a lever yndella dhe'm arloedh, dhe Esaw: Yndellma y lever dha was Yakob, “My re beu trigys gans Laban ha gwithys veuv ena bys lemmyn. 5Yma dhymm oghen hag asenes, flokkys, kethyon ha maghtethyon; ha my re dhannvonas dhe dherivas hemma dhe'm arloedh, may kyffiv gras y'th wolok.” ’

6Ha'n kannasow a dhehwelis dhe Yakob ow leverel, ‘Ni a dheuth dhe'th vroder, dhe Esaw; hag yma ev ow tos dhe'th vetya, ha ganso peswar kans gour.’ 7Ena Yakob a borthas own bras ha troblys veu; hag ev a rannas an dus esa ganso ha'n flokkys ha'n chatel ha'n kowrvergh yn dew vagas 8ha leverel, ‘Mar teu Esaw dhe'n unn bagas ha'y weskel, ena an bagas yw gesys a yll fia.’

9Hag yn-medh Yakob, ‘A Dhuw ow thas Abraham, ha Duw ow thas Ysak, an Arloedh, neb a leveris dhymm, “Dehwel dhe'th wlas ha dhe'th kerens ha my a vynn dha dhyghtya yn ta”: 10nyns ov wordhi a'n tregeredhow oll ha'n lelder oll re wruss'ta gans dha was; rag gans ow lorgh my a dremenas dres an Yordan ma, ha lemmyn yth ov devedhys ha bos dew gamp. 11Delirv vy, my a'th pys, yn-mes a leuv ow broder, a leuv Esaw, rag my a berth own anodho, ev dhe dhos ha'm gweskel, an mammow gans an vebyon. 12Ha ty a leveris, “Yn sur my a wra da genes, ha my a worr dha has kepar ha tewes an mor na yll bos reknys drefenn an niver bras anodho.” ’

13Hag ev a spenas an nos na ena, ha kemmeres dhiworth an pyth esa ganso ro rag y vroder Esaw, 14dewkans gaver, ugens bogh, dew kans davas hag ugens hordh, 15deg kowrgasek-wodra warn ugens gans aga mebyon, dew-ugens bugh ha deg lodhen, ugens kasek-asen ha deg asen gorow. 16Hag ev a dhelivras yntra diwla y gethyon pub gre yn tiblans ha leverel dh'y gethyon, ‘Tremenewgh dheragov, ha gasa spas yntra pub gre.’ 17Hag ev a erghis dhe'n kynsa ow leverel, ‘Pan dheffo Esaw ow broder er dha bynn ha govynn orthis, “Piw osta dhodho?” ha “Py tyller yth es'ta ow mos dhodho?” ha “Piw dhodho yth yw an re ma a-dheragos?” 18ena ty a lever, “Dhe'th was, dhe Yakob. Ro yw, dannvenys dhe'm arloedh, dhe Esaw. Hag awotta, yma ev y honan war agan lergh keffrys.” ’ 19Hag ev a erghis ynwedh dhe'n nessa ha'n tressa hag oll an re esa ow mos war-lergh an greow, ow leverel, ‘Hwi a gews orth Esaw yndella pan y'n kyffowgh, 20ha hwi a lever ynwedh, “Awotta, yma dha was Yakob war agan lergh.” ’ Rag yn-medh ev, ‘My a vynn y dhiserri gans ro ow mos a-dheragov, ha my a wel y fas wosa henna. Martesen ev a'm degemmer.’ 21Ha'n ro a dremenas dheragdho; hag ev y honan a spenas an nos y'n kamp.

Yakob a Striv gans Duw

22Hag ev a sevis yn-bann an nos na ha kemmeres y dhiw wreg ha'y dhiw vaghteth ha'y unnek flogh ha tremena rys Yabbok. 23Hag ev a's kemmeras ha'ga dannvon dres an gover; hag ev a dhannvonas pup-tra esa ganso ynwedh. 24Yakob a veu gesys y honan, ha gour a omdewlis ganso bys dydh-tardh 25Pan welas na ylli y fetha, ev a weskis kraw y glun;32:25 kraw y glun: Styr klun omma yw an rann geherek ynter an glun ha'n vordhos. ha kraw klun Yakob a veu digevelsys, hag ev owth omdewlel ganso. 26Hag yn-medh ev, ‘Dannvon vy yn-kerdh, rag an jydh re dardhas.’ Hag yn-medh ev, ‘Ny vynnav dha dhannvon yn-kerdh marnas ty a wra ow benniga.’ 27Hag yn-medh ev, ‘Pyth yw dha hanow?’ hag yn-medh ev, ‘Yakob.’ 28Hag yn-medh ev, ‘Ny vydh dha hanow gelwys Yakob namoy mes Ysrael, rag ty re strivyas gans Duw ha gans mab-den ha fetha.’ 29Ha Yakob a wovynnas orto, ow leverel, ‘Lavar dhymm dha hanow, my a'th pys.’ Hag yn-medh ev, ‘Prag y fynnydh govynn ow hanow orthiv?’ hag ev a'n bennigas ena. 30Ha Yakob a elwis hanow an tyller Peniel, ‘Rag my re welas Duw fas orth fas, ha gwithys saw yw ow enev.’ 31Ha'n howl a dhrehevis warnodho hag ev ow tremena Penuel; hag yth esa ow kloppya drefenn y glun. 32Rag henna ny vynn mebyon Ysrael dybri giowenn an nervenn32:32 an nervenn: Henn yw an nervenn skiatek. yn kraw an glun bys y'n jydh hedhyw, rag ev a weskis kraw klun Yakob, yn giowenn an nervenn.