Yakob a Dhehwel dhe Bethel

1Duw a leveris dhe Yakob, ‘Sav, ke yn-bann dhe Bethel ha trig ena; ha gwra alter ena dhe'n Duw a omdhiskwedhas dhis pan eses ow fia dhiworth fas dha vroder Esaw.’ 2Ena Yakob a leveris dh'y vayni ha dhe oll an re esa ganso. ‘Kemmerewgh dhe-ves an duwow estren usi yn agas mysk; omlanhewgh, ha chanjyewgh agas dillas; 3ha gesewgh ni dhe sevel ha mos yn-bann dhe Bethel, ha gul alter ena dhe'n Duw a'm gorthybis yn dydh ow foenvotter, hag esa genev y'n fordh may kerdhis.’ 4Hag i a ros dhe Yakob oll an duwow estren esa dhedha, ha'n bysowyer yn aga skovornow, ha Yakob a's kelas yn-dann an derebinthenn ogas dhe Shekem.

5Ena i eth yn-kerdh. Yth esa own Duw war an sitys a-dro dhedha, ha ny wrussons siwya mebyon Yakob. 6Ytho Yakob a dheuth a-ji dhe Luz, usi yn pow Kanan, henn yw Bethel, ev hag oll an bobel esa ganso. 7Hag ev a dhrehevis alter ena ha gelwel an tyller El-bethel, rag Duw a omdhiskwedhas dhodho ena pan esa ow fia dhiworth fas y vroder. 8Ha Debora, mammeth Rebeka, a verwis hag a veu ynkleudhys a'n barth a-woeles dhe Bethel yn-dann an dherwenn; ytho y hanow a veu gelwys Allon-bakuth.35:8 Allon-bakuth: Styr an hanow yw ‘Derwenn oelva’.

9Duw a omdhiskwedhas arta dhe Yakob hag ev ow tos dhiworth Padan-aram, ha'y venniga. 10Hag yn-medh Duw dhodho, ‘Yakob yw dha hanow, mes ny vydh dha hanow gelwys Yakob na fella, mes Ysrael a vydh dha hanow’; ytho ev a elwis y hanow Ysrael. 11Hag yn-medh Duw dhodho, ‘My yw Duw Ollgalloesek;35:11 Duw Ollgalloesek: Ebrow El Shadday. degewgh frut ha kressewgh; kenedhel ha kemmynieth a genedhlow a dheu dhiworthis, ha myghternedh a dheu yn-mes a'th tiwglun. 12An pow a res vy dhe Abraham ha dhe Ysak, my a'n re dhiso jy; ha dhe'th has jy war dha lergh y rov an pow.’ 13Ha Duw eth yn-bann dhiworto y'n tyller may hwrussa kewsel ganso. 14Ha Yakob a dhrehevis peulven y'n tyller may hwrussa kewsel ganso, peulven a ven; hag ev a dhinewis offrynn diwes warnodho, ha dinewi oyl warnodho. 15Ha Yakob a elwis hanow an tyller may kewsis Duw ganso, Bethel.

Fleghes Yakob

16Hag i a vyajyas dhiworth Bethel; yth esa hwath unn pols byghan kyns dos dhe Efrath, ha Raghel a dhallathas dineythi, ha kales veu rygdhi yn hy lavur. 17Pan esa hi ow perthi an dineythyans kales, yn-medh an welivedhes dhedhi, ‘Na borth own; hemma a vydh mab ragos ynwedh.’ 18Ha pan esa hy enev ow mos yn-mes anedhi, hi a'n henwis Benoni; mes y das a'n henwis Benyamin. 19Ha Raghel a verwis hag a veu ynkleudhys y'n fordh dhe Efrath, henn yw Bethlehem. 20Ha Yakob a worras peulven war hy bedh. Henn yw peulven bedh Raghel bys y'n jydh hedhyw. 21Hag Ysrael a dravalyas ha drehevel y dylda war an tu arall dhe Migdal-eder.

22Pan esa Yakob trigys y'n pow na, Rewben eth ha growedha gans Bilha, iswreg y das, hag Ysrael a glewas anodho. Lemmyn yth esa dewdhek mab dhe Yakob. 23Mebyon Lea: Rewben kynsa-genys Yakob, ha Simeon, ha Levi, ha Yuda hag Yssakar ha Zebulun. 24Mebyon Raghel: Yosep ha Benyamin. 25Ha mebyon Bilha, maghteth Raghel: Dan ha Naftali. 26Ha mebyon Zilpa, maghteth Lea: Gad hag Asher. An re ma yw mebyon Yakob a veu genys dhodho yn Padan-aram.

27Ha Yakob a dheuth dhe Ysak y das, dhe Mamre, Kiryath-arba, henn yw Hebron, le may feu Abraham hag Ysak trigys avel alyons. 28Ha dydhyow Ysak o naw-ugens bloedh, 29Hag Ysak a dremenas hag a verwis, hag a veu kuntellys dh'y bobel, leun a dhydhyow; ha'y vebyon Esaw ha Yakob a'n ynkleudhyas.