Yuda ha Tamar

1Y'n termyn na, Yuda eth yn-nans dhiworth y vreder, hag ev a dreylyas troha gour a Adullam, Hira y hanow. 2Hag ena, Yuda a welas myrgh gour Kananek, Shua hy hanow; ev a's kemmeras avel gwreg, ha mos a-bervedh dhedhi. 3Ha hi a gonsevyas ha dineythi mab hag ev a elwis y hanow Er. 4Ha hi a gonsevyas arta ha dineythi mab ha gelwel y hanow Onan. 5Ha hwath arta hi a dhineythis mab ha gelwel y hanow Shela. Ev a veu yn Kezib pan wrug hi y dhineythi. 6Ha Yuda a gemmeras gwreg rag Er, y gynsa-genys, ha Tamar o hy hanow. 7Hag Er, kynsa-genys Yuda, a veu drog yn golok an Arloedh, ha'n Arloedh a'n ladhas. 8Hag yn-medh Yuda dhe Onan, ‘Ke a-bervedh dhe wreg dha vroder ha gwra dha dhever dhedha avel broder dre lagha, ha drehav has dhe'th vroder.’ 9Mes Onan a wodhya na vedha an has y has ev, ytho pan eth a-bervedh dhe wreg y vroder ev a skoellyas y has dhe'n leur, ma na rolla has dh'y vroder. 10Mes drog yn golok an Arloedh o an pyth a wrug, hag ev a'n ladhas ynwedh. 11Ena yn-medh Yuda dhe Tamar y wohydh. ‘Gorta avel gwedhwes yn chi dha das erna dheffo ow mab Shela dhe oes.’ Rag ev a leveris, ‘Ma na varwo ev ynwedh, dell verwis y vreder.’ Ytho Tamar eth, ha hi a drigas yn chi hy thas.

12Termyn a dremenas, hag ena myrgh Shua, gwreg Yuda, a verwis. Wosa bos konfortys, Yuda eth yn-bann dhe'n dus esa ow knyvyas y dheves, dhe Timna, ev ha'y goweth Hira an Adullamyas. 13Hag y feu derivys dhe Tamar, ‘Otta, yma dha hwegron ow mos yn-bann dhe Timna dhe gnyvyas y flokk.’ 14Ha hi a dhiwiskas hy dillas-gwedhwes ha gwiska vayl, ha'y maylya oll a-dro dhedhi, hag esedha orth porth Enaym usi war an fordh dhe Timna; rag hi a wrussa gweles bos Shela tevys dhe oes ha na via hi res dhodho avel gwreg. 15Yuda a's gwelas, ha tybi hy bos hora rag hi re wrussa kudha hy fas. 16Hag ev a dreylyas dhedhi ryb an fordh ha leverel, ‘Deus, gas vy dhe dhos a-bervedh dhis’, rag ny wodhya hy bos y wohydh. Yn-medh hi, ‘Pandr'a vynn'ta ri dhymm may hylli dos a-bervedh genev?’ 17Hag yn-medh ev, ‘My a dhannvon dhis mynn gever a'm flokk’; hag yn-medh hi, ‘A vynn'ta ri dhymm gaja erna'n dannvenni?’ 18Hag yn-medh ev, ‘Py par gaja a rov dhis?’ hag yn-medh hi, ‘Dha sel ha'th kordenn38:18 kordenn: Ebrow neusenn, martesen plethys. War-lergh an Septuagint delk. War-lergh an Vulgat breghellik. ha'th lorgh usi y'th dorn.’ Ytho ev a's ros dhedhi hag ev eth a-bervedh dhedhi ha hi a gonsevyas anodho. 19Ena hi a sevis ha mos ha gorra a-denewen hy vayl ha gwiska dillas hy gwedhowses.

20Ha Yuda a dhannvonas an mynn dre leuv y goweth, an Adullamyas, rag degemmeres an gaja dhiworth an venyn, mes ny's kavas. 21Hag ev a wovynnas orth gwer an tyller na, ow leverel, ‘Ple'ma'n hora-tempel38:21, 22 hora-tempel: Ebrow (hora) sans. Sakrys ens i dhe'n duwow pagan. Yn gwersow 15 ha 24 yma ger ebrow arall, ow styrya hora sempel a-der sans. esa yn Enaym, ryb an fordh?’ hag yn-medhons i, ‘Nyns esa hora-tempel mann y'n tyller ma.’ 22Ytho ev a dhehwelis dhe Yuda ha leverel, ‘Ny wrug vy hy havoes, ha gwer an tyller a leveris ynwedh. “Nyns esa hora-tempel y'n tyller ma.” ’ 23Hag yn-medh Yuda. ‘Gas hi dhe witha an taklow, ma na'gan bo bismer. Otta, my re dhannvonas an mynn ma, mes ny wruss'ta hy throvya.’

24A-dro dhe dri mis wosa hemma, y feu derivys dhe Yuda ow leverel, ‘Tamar, dha wohydh re dheuth ha bos hora, ha, moy es henna, hi re gonsevyas dre horyans.’ Yn-medh Yuda, ‘Drewgh hi yn-mes dhe vos leskys.’ 25Ha hi ow pos dres yn-mes, hi a dhannvonas dh'y hwegron ow leverel, ‘Gans flogh ov vy dre wour a bew an taklow ma.’ Hag yn-medh hi, ‘Hwither, dell y'th pysav, piw a bew an sel, an kordenn ha'n lorgh ma.’ 26Yuda a's aswonnis, ha leverel, ‘Hi re beu moy gwiryon agesov; rag ny wrug vy hy ri dhe'm mab Shela.’ Ha ny wrowedhas gensi namoy.

27Pan dheuth an termyn rag hi dhe dhineythi, yth esa gevellyon yn hy thorr. 28Pan wrug hi dineythi, onan an dhew a worras leuv yn-mes; ha'n welivedhes a'n kemmeras, ha kelmi kordenn gogh war y leuv, ow leverel, ‘Hemma a dheuth yn-mes yn kynsa.’ 29Mes ev a gildennas y leuv, hag otta, y vroder a dheuth yn-mes hag yn-medh hi, ‘Assa wrussys torrva ragos!’ Ytho gelwys veu y hanow Peres. 30Hag a-wosa y vroder a dheuth yn-mes, ha war y leuv an gordenn gogh, ha'y hanow a veu gelwys Zeragh.