Yosep ha Gwreg Potifar

1Lemmyn Yosep a veu dres yn-nans dhe Ejyp, ha Potifar, lyswas Faro, an chyf rennyas,39:1 lyswas Faro, an chyf rennyas: Po onan a spadhesigyon Faro, an chyf dibenner. gour ejyptek, a'n prenas dhiworth an Yshmaelysi a'n dros ena. 2Yth esa an Arloedh gans Yosep hag ev o gour sewen; hag yth esa ev yn chi y arloedh ejyptek. 3Ha'y arloedh a welas bos an Arloedh ganso, ha'n Arloedh dhe wul pup-tra esa ow kul dhe seweni yn y dhorn. 4Ytho Yosep a gavas gras yn y wolok ha'y servya, hag ev a'n apoyntyas dhe vos gorwoelyas war y ji ha pup-tra a'n jevo ev a ros yn y dhorn. 5A-dhia'n termyn may hwrug ev y apoyntya war y ji ha war bup-tra esa dhodho, an Arloedh a vennigas chi an Ejyptyan drefenn Yosep; hag yth esa bennath an Arloedh war bup-tra esa dhodho y'n chi hag y'n gwel.

6Ytho ev a asas pup-tra esa dhodho yn dorn Yosep ha nyns esa dhodho bern a dravyth marnas a'n bara esa ow tybri. Ha Yosep o teg y semlans ha teg dhe weles. 7Hag y hwarva, wosa an taklow ma, y trehevis gwreg y arloedh hy dewlagas war Yosep, ha leverel, ‘Gwra growedha genev.’ 8Mes ev a skonyas ha leverel dhe wreg y arloedh, ‘Otta, nyns eus bern dhe'm arloedh a dravyth yn y ji a'm govis vy, hag ev a ros pup-tra eus dhodho y'm leuv. 9Nyns eus denvyth brassa agesov vy y'n chi ma. Ny wrug ev gwitha travyth dhiworthiv marnas ty, drefenn ty dhe vos y wreg. Fatell wrav vy an drogober bras ma, ha pegha erbynn Duw?’ 10Yth esa hi ow kewsel a dhydh dhe dhydh dhe Yosep, mes ny goelas orti, dhe wrowedha gensi na dhe vos gensi. 11Mes unn jydh ev eth a-berth y'n chi dhe wul y ober, ha nyns esa denvyth a dus an chi ena y'n chi. 12Ha hi a'n kachyas der y dhillas, ow leverel, ‘Growedh genev.’ Hag ev a asas y dhillas yn hy dorn ha fia dhe'n fo ha mos yn-mes. 13Pan welas hi y hwrussa gasa y dhillas yn hy dorn ha fia yn-mes, 14hi a elwis tus hy chi ha kewsel orta ow leverel, ‘Mirewgh, ev re dhros dhyn ni gour ebrow, dhe wul ges ahanan. Ev a dheuth dhymm dhe wrowedha genev, ha my a elwis gans lev ughel. 15Pan y'm klewas ow trehevel ow lev ha gelwel, ev a asas y dhillas rybov ha fia ha mos yn-mes.’ 16Ena hi a worras y dhillas yn hy ogas, bys pan dheuth y arloedh dh'y ji. 17Ha hi a gewsis ganso war-lergh an geryow ma, ‘An kethwas ebrow a wruss'ta dri dhyn ni a dheuth a-bervedh dhymm dhe wul ges ahanav. 18Mes pan dhrehevis ow lev ha garma, ev a asas y dhillas rybov ha fia yn-mes.’

19Pan glewas y arloedh geryow y wreg hag a gewsis hi dhodho, ow leverel, ‘War-lergh an taklow ma y hwrug dha gethwas dhymm’, y sorr a dhewis. 20Hag arloedh Yosep a'n kemmeras ha'y worra y'n prison, an tyller mayth o kelmys prisnoryon an myghtern, hag yth esa ev ena y'n prison. 21Mes yth esa an Arloedh gans Yosep. Ev a dhiskwedhas tregeredh dhodho ha gorra dhodho favour yn golok gwithyas an prison. 22Ha gwithyas an prison a ros yn leuv Yosep oll an prisnoryon esa y'n prison; ha pup-tra esens i ow kul ena, ev a veu neb a'n gwre. 23Ny wrug gwithyas an prison vri a dravyth re bia gorrys yn y leuv, rag yth esa an Arloedh ganso; ha dhe bup-tra a wre, an Arloedh a ros sewena.