Styryans Hunrosow an Brisners

1Wosa an taklow ma, hanafor myghtern Ejyp ha'n peber a beghas erbynn aga arloedh, erbynn myghtern Ejyp. 2Ha serrys o Faro erbynn y dhew spadhesik, erbynn chyf an hanaforyon hag erbynn chyf an beboryon, 3hag ev a's gorras yn-dann with yn chi chyf an withysi, y'n prison, an tyller may feu Yosep kelmys. 4Ha chyf an withysi a jarjyas Yosep dh'aga attendya, hag ev a's servyas; hag yth esens yn-dann with neb termyn. 5Ha'n dhew anedha a hunrosas hunros, pub yn unn nos, pub hunros gans y styryans y honan: an hanafor ha'n peber a vyghtern Ejyp, neb esa kelmys y'n prison. 6Ha ternos vyttin Yosep a dheuth dhedha ha'ga gweles, hag awotta, trist ens i. 7Ytho ev a wovynnas orth spadhesigyon Faro esa yn-dann with ganso yn chi y arloedh, ow leverel, ‘Prag yth yw truan agas fas hedhyw?’ 8Yn-medhons dhodho. ‘Ni re hunrosas hunros, ha nyns eus denvyth dh'y styrya.’ Yn-medh Yosep dhedha, ‘A nyns eus styryansow dhe Dhuw? Derivewgh e dhymm, my a'gas pys.’

9Ytho chyf an hanaforyon a dherivas y hunros dhe Yosep ow leverel dhodho, ‘Y'm hunros yth esa gwinbrenn a-dheragov. 10Hag y'n gwinbrenn yth esa teyr skorrenn, ha kettell eginas, y vleujyow a dheuth yn-bann, ha'y vagasow a rappys a adhvesis dhe vos grappys. 11Yth esa hanaf Faro y'm dorn, ha my a gemmeras an grappys ha'ga gwaska yn hanaf Faro, ha my a ros an hanaf yn dorn Faro.’ 12Yn-medh Yosep dhodho. ‘Ottomma an styryans. An teyr skorrenn yw tri dydh. 13A-ji dhe drydydh y hwra Faro ughelhe dha benn ha'th worra arta y'th soedh; ha ty a vydh ow korra hanaf Faro yn y dhorn war-lergh an kynsa maner, pan es y hanafor. 14Saw porth kov ahanav, my a'th pys, pan vo yn ta genes. Bydh kuv dhymm ha'm meneges dhe Faro, ha doro vy yn-mes a'n chi ma. 15Rag dhe wir my a veu ledrys yn-mes a bow an Ebrowyon. Ny wrug vy travyth a vo skila rag i dhe'm gorra y'n pytt.’

16Ha chyf an beboryon a welas ev dhe brofya styryans da, hag yn-medh ev dhe Yosep, ‘My a hunrosas ynwedh, hag awotta, yth esa teyr hanstell a vara gwynn war ow fenn. 17Hag y'n ganstell a-wartha yth esa boes a bub eghenn rag Faro, gweyth peber a voes rag gwara pebys; hag yth esa an ydhyn orth y dhybri mes a'n ganstell war ow fenn.’ 18Ha Yosep a worthybis ha leverel, ‘Hemm yw an styryans. An teyr hanstell yw tri dydh. 19A-ji dhe drydydh, Faro a dhrehav dha benn dhiworthis ha'th kregi war wydhenn, hag y fydh an ydhyn ow tybri dha gig dhiworthis.’

20Y'n tressa dydh, penn-bloedh Faro, ev a wrug kevewi rag oll y wesyon hag ughelhe penn chyf an hanaforyon ha penn chyf an beboryon yn mysk y wesyon, 21ha gorra chyf an hanaforyon arta dh'y soedh hag ev a ros an hanaf yn dorn Faro. 22Mes ev a grogas chyf an beboryon kepar dell wrussa Yosep styrya dhedha. 23Ny wrug chyf an hanaforyon perthi kov a Yosep, mes ev a'n ankovas.