Hunros Faro

1Dhe benn diw vlydhen leun, yth esa Faro owth hunrosa, hag awotta, yth esa ev ow sevel ryb an Nil, 2hag otta, yth esa seyth bugh ow tos yn-bann mes a'n Nil, teg aga semlans ha tew aga hig, hag yth esens ow peuri yn mysk an kors. 3Hag otta, yth esa seyth bugh erell ow tos yn-bann war aga lergh mes a'n Nil, drog aga semlans ha tanow aga hig, hag yth esens ow sevel ogas dhe'n bughes war lann an Nil, 4Ha'n bughes drog aga semlans ha tanow aga hig a dhybris an seyth bugh teg aga semlans ha tew. Ha Faro a dhifunas. 5Hag ev a goskas ha hunrosa nessa torn, hag otta, seyth penn-ys ow tevi war unn arr, tew ha da. 6Hag otta, yth esa seyth penn-ys tanow, ha syghys gans gwyns an est owth egina war aga lergh. 7Ha'n pennow-ys tanow a lonkas an seyth tew ha leun. Faro a dhifunas hag otta, hunros ova. 8Ha myttin, troblys veu y spyrys, hag ev a dhannvonas ha gelwel oll an goelyogyon a Ejyp hag oll hy thus fur, ha Faro a dherivas y hunros dhedha, mes nyns esa denvyth a wodhva aga styrya dhe Faro.

9Ena chyf an hanaforyon a gewsis gans Faro, ow leverel, ‘Hedhyw my a berth kov a'm peghosow. 10Faro o serrys gans y wesyon ha'm gorra yn-dann with yn chi chyf an withysi, my ha chyf an beboryon. 11Ni a hunrosas hunros yn unn nos, my hag ev, pub hunros gans y styryans y honan. 12Yth esa Ebrow yowynk genen ena, keth dhe jyf an withysi. Ni a dherivas agan hunrosow dhodho, hag ev a's styryas dhyn, ow styrya dhe bub huni war-lergh y hunros. 13Hag y hwarva kepar dell wrussa y styrya dhyn. My a veu daskorrys dhe'm soedh, hag ev a veu kregys.’

14Ena Faro a dhannvonas ha gelwel Yosep, hag i a'n dros yn hast mes a'n pytt; ev a omdhivarvas ha chanjya y dhillas, ha dos dhe Faro. 15Yn-medh Faro dhe Yosep, ‘My re hunrosas hunros mes nyns eus denvyth a wodhvo y styrya. My re glewas y vos leverys a-dro dhis, pan glewydh hunros ty a yll y styrya.’ 16Yosep a worthybis Faro, ow leverel, ‘Duw, a-der my, a re dhe Faro gorthyp a gres.’ 17Ena Faro a leveris dhe Yosep, ‘Y'm hunros, ottavy ow sevel ryb glann an Nil. 18Hag otta, yth esa seyth bugh ow tos yn-bann mes a'n Nil, tew aga hig ha teg aga semlans, hag yth esens ow peuri yn mysk an kors. 19Hag otta seyth bugh erell ow tos yn-bann war aga lergh, gwann ha pur dhrog aga semlans, ha tanow aga hig. Ny welis bughes mar dhrog le vyth yn pow Ejyp. 20Ha'n bughes tanow ha drog a dhybris an kynsa seyth bugh dew. 21Mes pan wrussens dos dh'aga holodhyon, nyns o possybyl godhvos i dhe dhos dh'aga holodhyon. Drog o aga semlans kepar ha kyns. Ena my a dhifunas. 22My a welas y'm hunros, hag otta seyth penn-ys ow tevi war unn arr, leun ha da. 23Hag otta, yth esa seyth penn-ys gwedhrys, tanow ha syghys gans gwyns an est, owth egina war aga lergh. 24Ha'n seyth penn-ys tanow a lonkas an seyth penn-ys da. My re dherivas hemma dhe'n goelyogyon, mes nyns esa nagonan anedha a wodhvo y styrya dhymm.’

25Hag yn-medh Yosep dhe Faro, ‘Onan yw hunros Faro. Duw re dhiskwedhas dhe Faro an pyth usi ow kul. 26An seyth bugh dha yw seyth blydhen; ha'n seyth penn-ys da yw seyth blydhen. Onan yw an hunros. 27Ha'n seyth bugh danow ha drog a dheuth yn-bann war aga lergh yw seyth blydhen; ha'n seyth penn-ys gwag, syghys gans gwyns an est yw seyth blydhen a dhivoetter. 28Hemm yw an pyth re leveris vy dhe Faro: an pyth a vynn Duw y wul, ev re'n diskwedhas dhe Faro. 29Awotta, yma seyth blydhen ow tos: palster meur yn oll pow Ejyp. 30Hag y fydh seyth blydhen a dhivoetter ow sevel wosa an re ma, hag oll an palster yn pow Ejyp a vydh ankevys, ha divoetter a dhiswra an wlas. 31Ha ny vydh kov a'n palster41:31 ny vydh kov a'n palster: Ebrow ny vydh an palster aswonnys. y'n wlas drefenn an divoetter a dheu a'y wosa; rag poes dres eghenn y fydh. 32Ha rag bos an hunros diskwedhys diwweyth dhe Faro, sur yw, an dra dhe vos fondys gans Duw hag yma Duw ow fistena dh'y wul. 33Ytho lemmyn, re dhewisso Faro gour doeth ha fur, ha'y apoyntya war bow Ejyp. 34Re settyo Faro soedhogyon war an wlas ha kemmeres an pympes rann a drevas pow Ejyp y'n seyth blydhen a balster. 35Ha re guntellons oll boes an blydhynyow da ma usi ow tos, ha bernya ys yn-dann leuv Faro, rag boes y'n sitys, ha re wrellons y witha. 36Ha'n boes ma a vydh gwithys rag an pow rag an seyth blydhen a dhivoetter usi ow tos yn pow Ejyp, ma na vo an pow diswrys der an divoetter.’

37Da veu hemma yn golok Faro hag yn golok oll y wesyon. 38Hag yn-medh Faro dh'y wesyon, ‘A yllyn ni kavoes gour a'n par ma, hag ynno Spyrys Duw?’ 39Ytho Faro a leveris dhe Yosep, ‘A-ban wrug Duw diskwedhes hemma oll dhiso, nyns eus denvyth mar dhoeth ha fur avelos. 40Ty a vydh apoyntys war ow chi, hag oll ow fobel a vydh gostydh dhe'th worhemmynn. Y'n tron yn unnsel, my a vydh brassa agesos jy.’ 41Hag yn-medh Faro dhe Yosep. ‘Mir, my re'th worras war oll pow Ejyp.’ 42Ha Faro a gemmeras y vysow-sel dhiworth y leuv ha'y worra war leuv Yosep ha'y wiska gans dillas a sendal ha gorra chayn owrek a-dro dh'y gonna; 43Hag ev a wrug dhodho mos y'n nessa charett esa dhodho, hag i a armas a-dheragdho, ‘Plegyewgh an glin’; hag ev a'n gorras war oll pow Ejyp. 44Hag yn-medh Faro dhe Yosep. ‘Faro ov vy, ha hebos jy ny wra denvyth drehevel y leuv na'y droes yn oll pow Ejyp.’ 45Ha Faro a elwis hanow Yosep Safenath-paaneagh,41:45 Safenath-paaneagh: Ejyptek koth, martesen yw dhe styrya An duw a gewsis hag ev a vew, henn yw, an den gans an hanow ma a vew. ha ri dhodho Asenath, myrgh Potifera, oferyas On41:45, 50 On: Heliopolis. avel gwreg. Ha Yosep eth yn-mes der oll pow Ejyp.

46Ha Yosep o deg bloedh warn ugens y oes pan sevis a-rag Faro myghtern Ejyp. Ha Yosep eth yn-mes dhiworth golok Faro ha tremena der oll pow Ejyp. 47Y'n seyth blydhen a balster an tir a ros dornasow a drevas. 48Hag ev a guntellas oll an boes a'n seyth blydhen a dremenas yn pow Ejyp, ha gorra an boes a-berth y'n sitys. An boes dhiworth an gwel a-dro dhe bub sita ev a worras a-bervedh ynni. 49Yosep a vernyas ys kepar ha tewes an mor, orth y gressya yn feur, bys pan astelas nivera, rag heb niver veu.

50Dew vab a veu dineythys dhe Yosep kyns dos blydhen an divoetter, dineythys dhodho gans Asenath, myrgh Potifera, oferyas On. 51Ha Yosep a elwis hanow an kynsa-genys Manasse, ‘rag Duw re wrug dhymm ankevi oll ow throbel hag oll chi ow thas.’ 52Hag ev a elwis hanow an nessa Efraym, ‘rag Duw re wrug dhymm doen frut yn pow ow galarow.’

53An seyth blydhen a balster esa yn pow Ejyp a veu kollenwys, 54ha'n seyth blydhen a dhivoetter a dhallathas dos, dell lavarsa Yosep. Yth esa divoetter yn oll an powyow, mes yth esa bara yn pow Ejyp oll. 55Hag yth esa oll pow Ejyp ow famya, ha'n bobel a grias war Faro rag bara; hag yn-medh Faro dhe oll an dus a Ejyp, ‘Kewgh dhe Yosep. Gwrewgh an pyth a lever ev dhywgh.’ 56Hag yth esa an divoetter dres enep an pow oll. Ha Yosep a igoras pub tyller mayth esa ys, ha'y wertha dhe dus Ejyp, rag tynn o an divoetter yn pow Ejyp. 57Hag oll an bys a dheuth dhe Ejyp dhe brena dhiworth Yosep, rag bos an divoetter tynn yn oll an bys.