An Vreder a Dheu an Nessa Gweyth

1Tynn o an divoetter y'n pow. 2Pan wrussens i gorfenna dybri an ys a wrussens dri yn-mes a Ejyp, yn-medh aga thas dhedha, ‘Dehwelewgh ha prena tamm boes ragon.’ 3Mes yn-medh Yuda dhodho, ‘An gour a'gan gwarnyas gans ti ow leverel, “Ny wrewgh hwi gweles ow fas heb bos agas broder genowgh.” 4Mar mynnydh dannvon agan broder genen, ni a wra mos yn-nans ha prena boes ragos; 5mes mar ny vynnydh y dhannvon, ny vynnyn ni mos yn-nans; rag an gour a leveris dhyn, “Ny welowgh ow fas marnas yma agas broder genowgh.” ’ 6Ysrael a leveris, ‘Prag y hwrussowgh drog dhymm, ow terivas dhe'n gour bos unn broder moy dhywgh?’ 7Hag yn-medhons i, ‘An gour a wrug agan apposya a-dro dhyn ni hag a-dro dh'agan kerens, ow leverel, “Yw agas tas hwath yn few? Eus broder dhywgh?” ha ni a dherivas dhodho a-dro dhe'n taklow ma. A yllyn ni godhvos y hwre leverel, “Drewgh agas broder yn-nans”?’ 8Hag yn-medh Yuda dhe Ysrael y das, ‘Dannvon an maw genev vy, ha ni a sev ha mos, may hwryllyn bewa a-der merwel, ni ha ty ha'gan fleghes. 9My ow honan a vydh goestel ragdho. Ty a yll y rekwirya a'm diwla. Mar ny'n drov dhiso ha'y settya a-dheragos, kablus vydhav a-ragos oll ow dydhyow. 10Rag mar ny wrellen delatya, ni a wrussa dehweles lemmyn diwweyth.’

11Hag yn-medh Ysrael aga thas dhedha, ‘Mars yw yndella, hemma gwrewgh: Kemmerewgh neppyth a wella askorr an tir yn agas seghyer, ha kemmerewgh ro yn-nans rag an gour, tamm balsam ha tamm mel, spisys ha myrr, pistachys hag alamandow. 12Ha kemmerewgh diwweyth an myns a vona yn agas dorn, hag ynwedh an mona a veu daskorrys yn ganow agas seghyer; kemmerewgh e arta yn agas dorn. Martesen gwall ova. 13Ha kemmerewgh agas broder. Sevewgh ha dehwelewgh dhe'n gour. 14Ha re rollo Duw Ollgalloesek43:14 Duw Ollgalloesek: Ebrow El Shadday. mersi dhywgh dherag an gour, may tannvonno dhywgh agas broder arall, ha Benyamin. Ha my – mar pydh ow fleghes kellys, kellys vydhons.’ 15Ha'n wer a gemmeras an ro ma, ha diwweyth an myns a vona yn aga dorn, ha Benyamin. I a sevis ha mos yn-nans dhe Ejyp, ha sevel dherag Yosep.

16Ha Yosep a welas Benyamin gansa, ha leverel dhe rewler y ji, ‘Doro an wer a-berth y'n chi ha ladha best ha pareusi pup-tra, rag y fydh an wer ow tybri genev dhe hanter-dydh.’ 17Ha'n gour a wrug dell leveris Yosep hag ev a dhros an wer a-berth yn chi Yosep. 18Ha'n wer a berthi own rag i dhe vos dres a-bervedh yn chi Yosep, hag yn-medhons, ‘Ni re beu dres a-ji drefenn an mona a veu daskorrys yn agan seghyer an kynsa gweyth. Ev a vynn omsettya er agan pynn ha koedha warnan, ha'gan kemmeres dhe vos kethyon, ha'gan asenes ynwedh.’ 19Hag i a dheuth nes dhe rewler chi Yosep ha kewsel orto orth daras an chi, 20ha leverel, ‘A arloedh, dhe wir ni a dheuth yn kynsa dhe brena boes. 21Pan dheuthen dhe davern hag igeri agan seghyer, otta, yth esa mona pub huni yn ganow y sagh, an poes leun a'gan mona; ytho ni re'n dros arta yn agan dorn. 22Ha ni re dhros mona arall yn agan dorn dhe brena boes. Ny wodhon piw a worras agan mona yn agan seghyer.’ 23Hag yn-medh ev, ‘Kres dhywgh hwi. Na berthewgh own. Agas Duw ha Duw agas tas re ros dhywgh tresor yn agas seghyer. Agas mona a dheuth dhymmo vy.’ Ena ev a dhros Simeon yn-mes dhedha. 24Ha'n gour a dhros an wer a-bervedh yn chi Yosep ha ri dowr dhedha, hag i a wolghas aga threys; hag ev a ros boes dh'aga asenes. 25Hag i a bareusis an ro rag devedhyans Yosep dhe hanter-dydh, rag i re wrussa klewes i dhe dhybri ena.

26Yosep a dheuth a-berth y'n chi, hag i a dhros dhodho y'n chi an ro esa yn aga dorn, hag omblegya dhodho dhe'n leur. 27Hag ev a wovynnas orta fatell ens, ow leverel, ‘Usi agas tas yn poynt da, an den koth a wrussowgh kewsel anodho? Yw ev hwath yn few?’ 28Hag yn-medhons i, ‘Yma dha was agan tas yn poynt da. Hwath yn few yw ev.’ Hag i a omblegyas ha koedha dhe'n dor a-ragdho. 29Mes ev a dhrehevis y dhewlagas ha gweles Benyamin y vroder, mab y vamm ev, ha leverel, ‘Yw hemma agas broder yowynka, re wrussowgh hwi kewsel dhymm anodho?’ Ena yn-medh ev, ‘Re bo Duw grassyes dhis, ow mab’, 30Ha Yosep a fistenas, rag movyes veu y golodhyon drefenn y vroder, hag ev a vynnas oela; hag ev eth a-ji dhe'n chambour hag oela ena. 31Ena ev a wolghas y fas ha dos yn-mes owth omgontrolya, ha leverel, ‘Settyewgh bara.’ 32Hag i a settyas boes ragdho ev y honan diberthys ha ragdha i aga honan diberthys ha rag an Ejyptianys esa ow tybri ganso aga honan diberthys, rag ny yll an Ejyptianys dybri gans an Ebrowyon, rag tra gasadow yw henna dhe'n Ejyptianys. 33I a esedhas a-dheragdho, an kynsa-genys war-lergh y wir genesik, ha'n yowynka war-lergh y yowynkneth. Ha'n wer a viras gans marth an eyl orth y gila. 34Hag ev a gemmeras rannow a voes esa a-ragdho ha'ga ri dhedha i; mes rann Benyamin a veu pympgweyth moy es rannow oll an re erell. Ytho i a evas, ha bos medhow ganso.