An Prevyans Diwettha

1Ena ev a erghis dhe rewler y ji, ow leverel. ‘Lanw seghyer an wer a gemmys boes a allons y dhoen; ha gorr mona pub huni yn ganow y sagh. 2Ha gorr ow hanaf, an hanaf a arghans, yn ganow sagh an yowynka, ha'y vona rag an ys ynwedh.’ Hag ev a wrug war-lergh an gorhemmynna kewsys gans Yosep. 3Kettell veu golow myttin, an wer a veu dannvenys yn-kerdh, i ha'ga asenes. 4Wosa i dhe asa an sita, heb bos gyllys pell, yn-medh Yosep dhe rewler y ji, ‘Sav, gwra chasya war-lergh an wer. Wosa dos bys dhedha, lavar dhedha, “Prag y hwrussowgh attyli an da gans an drog? 5A nyns yw hemma an hanaf mayth yv ow arloedh anodho, ha gul dewinieth ganso? Ow kul hemma, hwi re wrug tebelwrians.” ’

6Ev a dhrehedhas dhedha, ha kewsel dhedha an geryow ma. 7Yn-medhons dhodho. ‘Prag y kews ow arloedh war-lergh an geryow ma? Pell bedhes dhiworth dha wesyon gul yndella. 8Awotta, ni a dhros dhis arta dhiworth pow Kanan an mona a gevsyn yn ganow agan seghyer. Ytho, fatell yllyn ni ladra owr po arghans dhiworth chi dha arloedh? 9Piwpynag a'th wesyon may fo kevys ganso, ev a verow, ha ni a vydh kethyon dhe'm arloedh.’ 10Yn-medh ev, ‘Lemmyn, bedhes war-lergh agas lavar; piwpynag may fo kevys ganso a vydh ow hethwas; mes hwi a vydh heb blam.’ 11Ytho i a fistenas ow kemmeres aga seghyer yn-nans dhe'n leur hag pub huni a igoras y sagh. 12Hag ev a hwithras, ow talleth orth an kottha ha gorfenna orth an yowynka; ha'n hanaf a veu kevys yn sagh Benyamin. 13Ena i a skwardyas aga dillas, ha peub a worras an begh war y asen, hag i a dreylyas arta troha'n sita.

14Yuda ha'y vreder a dheuth dhe ji Yosep. Yth esa ev hwath ena, hag i a goedhas dhe'n leur a-dheragdho. 15Hag yn-medh Yosep dhedha, ‘Pyth yw an dra ma re wrussowgh hwi? A ny wrussowgh hwi godhvos y hyll gour kepar ha my gul dewinieth?’ 16Yn-medh Yuda, ‘Pandr'a leveryn dhe'm arloedh? Pandr'a yllyn kewsel? Fatell yllyn ombrevi ankablus? Duw re dhiskudhas kammweyth dha wesyon. Ottani, kethyon dhe'm arloedh, ni hag ev ynwedh may feu an hanaf kevys yn y dhorn.’ 17Hag yn-medh ev, ‘Pell bedhes dhiworthiv gul hemma. Neb may feu an hanaf kevys yn y dhorn, ev a vydh ow hethwas. Mes hwi, kewgh yn-bann yn kres dh'agas tas.’

18Ena Yuda dheuth nes dhodho ha leverel, ‘My a'th pys, ow arloedh, gas dha was dhe gewsel ger yn diwskovarn ow arloedh. Na wrello dha sorr leski erbynn dha was, rag kepar ha Faro osta. 19Ow arloedh a wovynnas orth y wesyon, ow leverel, “Eus tas po broder dhywgh?” 20Ha ni a leveris dhe'm arloedh, “Yma genen tas, den koth, ha flogh y gothni, yowynk; marow yw y vroder, ha nyns eus gesys dh'y vamm saw unnsel ev, ha'y das a'n kar.” 21Ha ty a leveris dhe'th wesyon, “Doro ev yn-nans dhymmo vy may hylliv settya ow lagas warnodho.” 22Ha ni a leveris dhe'm arloedh, “Ny yll an maw gasa y das. Mar kwrella gasa y das, ev a vawrsa” 23Ha ty a leveris dhe'th wesyon, “Mar ny dheu agas broder yowynka yn-nans genowgh, ny wrewgh gweles ow fas namoy.” 24Ytho, pan wrussyn ni mos yn-bann dhe'th was ow thas, ni a dherivas dhodho geryow ow arloedh. 25Hag yn-medh agan tas, “Dehwelewgh, prenewgh tamm boes ragon.” 26Ha ni a leveris, “Ny yllyn mos yn-nans. Mar teu agan broder yowynk genen, ena ni a yll mos; rag ny yllyn gweles fas an gour mar nyns usi agan broder yowynka genen.” 27Ha'th was agan tas a leveris dhyn, “Dell wodhowgh, ow gwreg a dhineythis dhymm dew vab; 28ha gyllys yn-mes dhiworthiv yw onan anedha, ha my a leveris, Skwardys yn sur yw ev. Ny wrug vy y weles bys lemmyn. 29Mar kwrellewgh kemmeres hemma ynwedh dhiworthiv, ha mar hwarva droglamm dhodho, ena hwi a dhrosa ow blew loes dre alar yn-nans dhe'n bedh.” 30Ha lemmyn, pan dhyffiv dhe'th was ow thas, mar ny vydh an maw genen ni (ha'y enev kelmys war-barth gans enev an maw), 31pan wello nag usi an maw namoy, ev a verow; ha'th wesyon a gemmer blew loes dha was agan tas dre alar dhe'n bedh. 32Rag dha was a gavas an maw dre woestel dhiworth ow thas, ow leverel, “Mar ny'n drov dhiso jy, kablus vydhav a-rag ow thas oll ow dydhyow.” 33Ytho, re worto dha was lemmyn, my a'th pys, yn keth dhe'm arloedh; ha gas an maw dhe vos yn-bann gans y vreder. 34Rag fatell allav mos yn-bann dhe'm tas heb bos an maw genev? rag own my dhe weles an droktra a goedh war ow thas.’