An Gwir yw Diskudhys

1Ny ylli Yosep omgontrolya dherag oll an re ow sevel rybdho, hag ev a armas. ‘Bedhes pub den oll gorrys yn-mes dhiworthiv vy.’ Ha nyns esa denvyth ow sevel ganso pan omdhiskudhas Yosep dh'y vreder. 2Hag ev a oelas, ughel y lev, ha'n Ejyptianys a glewas, ha chi Faro a glewas ynwedh. 3Hag yn-medh Yosep dh'y vreder, ‘My yw Yosep. Yw ow thas hwath yn few?’ Ha ny ylli y vreder gorthybi rag dyegrys ens a-dheragdho.

4Ytho yn-medh Yosep dh'y vreder, ‘Dewgh nes dhymm, my a'gas pys.’ Hag i a dheuth nes. Hag yn-medh ev, ‘My yw Yosep agas broder a werthsowgh bys yn Ejyp, 5Ha lemmyn, na vedhewgh yn ahwer, na vedhes sorr yn agas lagasow hwi dhe'm gwertha omma; rag Duw re'm dannvonas dheragowgh dhe witha bewnans. 6Rag nans yw diw vlydhen divoetter re beu y'n pow; hag y fydh hwath pymp blydhen ma na vydh nag aras na trevas. 7Ha Duw a'm dannvonas a-dheragowgh dhe fastya ragowgh remenant y'n pow ha dhe witha bewnans ragowgh dre dhelivrans bras. 8Ha lemmyn nyns yw hwi a'm dannvonas omma mes Duw, hag ev re'm settyas kepar ha tas dhe Faro, hag arloedh war oll y ji, ha rewler war oll pow Ejyp. 9Fistenewgh ha mos yn-bann dhe'm tas ha leverel dhodho, “Yndellma y lever Yosep, dha vab. Duw re'm settyas dhe vos arloedh war oll Ejyp. Deus yn-nans dhymmo, na wra gortos. 10Ha ty a drig yn pow Goshen, ha ty a vydh ogas dhymmo, ty ha'th vebyon, ha mebyon dha vebyon, ha'th flokkys ha'th chatel, ha pup-tra eus dhis. 11Ha my a wra dha sostena ena, rag y fydh pymp blydhen moy a dhivoetter, na dhyffi ha bos boghosek, ty ha'th vayni ha myns eus dhis.” 12Hag otta, yma agas dewlagas hwi ow kweles, ha dewlagas ow broder Benyamin ynwedh, y vos ow ganow vy usi ow kewsel orthowgh. 13Ha derivewgh dhe'm tas oll an enor usi dhymm yn Ejyp ha pup-tra re wrussowgh hwi gweles. Fistenewgh ha dri ow thas yn-nans omma.’ 14Ena ev a goedhas war gonna Benyamin y vroder hag oela ha Benyamin a oelas war y gonna ev. 15Hag ev a ammas dhe oll y vreder hag oela warnedha, ha wosa henna yth esa y vreder ow kewsel ganso.

16Ha'n nowodhow a veu klewys yn chi Faro, ow leverel, ‘Breder Yosep re dheuth.’ Ha da o hemma yn dewlagas Faro hag yn dewlagas oll y wesyon. 17Hag yn-medh Faro dhe Yosep, ‘Lavar dhe'th vreder, “Gwrewgh hwi hemma. Gorrewgh agas seghyer war agas bestes ha kewgh, dewgh dhe bow Kanan; 18ha kemmerewgh agas tas ha'gas teyluyow ha dewgh dhymmo vy; ha my a re dhywgh an dader a bow Ejyp, ha hwi a wra dybri blonek an tir.” 19Ha ty, gwra erghi, “Gwrewgh yndella: kemmerewgh kertys mes a bow Ejyp rag agas fleghes ha'gas gwragedh, ha drewgh agas tas; ha dewgh. 20Na brederewgh a'gas daffar, rag pup-tra 'vas yn oll pow Ejyp a vydh ragowgh hwi.” ’

21Ytho mebyon Ysrael a wrug yndella ha Yosep a ros dhedha kertys war-lergh gorhemmynna Faro, hag ev a ros dhedha boes rag an vyaj. 22Ev a ros chanjyow a dhillas dhe bub huni; mes dhe Benyamin ev a ros trihans bath arghans ha pymp chanj a dhillas. 23Dh'y das ev a dhannvonas yndellma: deg asen ow toen re a'n taklow da a Ejyp ha deg kasek-asen ow toen ys ha bara, ha sosten rag y das war an fordh. 24Hag ev a dhannvonas y vreder, hag yth ethons yn-kerdh. Yn-medh ev dhedha, ‘Na vedhewgh ownek45:24 Na vedhewgh ownek: Po Na vedhewgh serrys; po Na gedrynnewgh. war an fordh.’ 25Ytho i eth yn-bann mes a Ejyp ha dos dhe bow Kanan, dhe Yakob aga thas. 26I a dherivas dhodho ow leverel, ‘Yn few hwath yw Yosep, hag ev yw rewler war oll pow Ejyp.’ Ha kolonn Yakob a dheuth ha bos yeyn, rag ny wrug krysi dhedha. 27Hag i a leveris dhodho oll an geryow a wrug Yosep leverel dhedha; mes pan welas an kertys a wrug Yosep aga dannvon rag y dhoen, spyrys Yakob aga thas a vewas arta. 28Hag yn-medh Ysrael, ‘Lowr yw! Ow mab Yosep yw hwath yn few. My a vynn mos dh'y weles kyns merwel.’