An Drevesigeth yn Goshen

1Ena Yosep a dheuth, hag ev a dherivas dhe Faro ha leverel, ‘Ow thas ha'm breder, ha'ga flokkys ha'ga greow ha pup-tra eus gansa re dheuth yn-mes a bow Kanan, hag otta, ymons i yn pow Goshen.’ 2Hag ev a gemmeras pymp gour dhiworth oll y vreder ha'ga dri a-rag Faro. 3Yn-medh Faro dh'y vreder, ‘Py par ober a wrewgh hwi?’ hag yn-medhons i dhe Faro, ‘Dha wesyon yw bugeledh deves, ha ni ha'gan tasow.’ 4Hag yn-medhons i dhe Faro, ‘Ni re dheuth dhe driga y'n pow, rag nyns eus peurva yn pow Kanan rag flokk dha wesyon, rag tynn yw an divoetter yn pow Kanan. Ytho lemmyn, gas dha wesyon dhe driga yn pow Goshen, ni a'th pys.’ 5Ena Faro a gewsis orth Yosep, ow leverel, ‘Dha das ha'th vreder re dheuth dhis. 6Yma pow Ejyp a-dheragos. Gas dha das ha'th vreder dhe driga yn gwella rann an pow; gas i dhe driga yn pow Goshen. Ha mar kodhes bos yn aga mysk gwer abel, gorr i dhe vos gwithysi war ow chatel vy.’

7Ha Yosep a dhros Yakob y das ha'y worra dhe sevel dherag Faro, ha Yakob a vennigas Faro. 8Yn-medh Faro dhe Yakob, ‘Py lies bloedh yw dha vewnans?’ 9Hag yn-medh Yakob dhe Faro, ‘Dydhyow blydhynyow ow godrigow yw deg ha hwegh-ugens. Boghes ha drog re beu dydhyow blydhynyow ow bewnans, ha ny wrussons dos nes dhe dhydhyow blydhynyow bewnans ow thasow yn dydhyow aga godrigow i.’ 10Ha Yakob a vennigas Faro ha mos yn-mes dhiworth Faro. 11Ena Yosep a dhesedhas y das ha'y vreder, hag ev a ros dhedha perghennogeth yn pow Ejyp, y'n gwella rann a'n tir yn pow Rameses, dell wrussa Faro gorhemmynna. 12Ha Yosep a ros sosten dh'y das ha'y vreder hag oll chi y das gans bara, war-lergh niver an fleghes.

Yosep ha'n Divoetter

13Nyns esa bara yn oll an pow rag pur dynn o an divoetter, ha pow Ejyp ha pow Kanan a glamderas drefenn an divoetter. 14Ha Yosep a guntellas oll an mona esa yn pow Ejyp hag yn pow Kanan rag an ys esens orth y brena, ha Yosep a dhros an mona a-berth yn chi Faro. 15Ha pan veu gyllys oll an mona mes a pow Ejyp ha pow Kanan, oll an Ejyptianys a dheuth dhe Yosep, ow leverel, ‘Ro dhyn bara. Prag y ferwyn a-dheragos? rag gyllys yw an mona.’ 16Yn-medh Yosep, ‘Rewgh agas chatel ha my a re dhywgh bara47:16 bara: Ow siwya an Septuagint. Nyns usi an ger ma y'n tekst ebrow. yn attal a'gas chatel mars yw gyllys an mona.’ 17Ytho i a dhros aga enyvales dhe Yosep, ha Yosep a ros dhedha bara yn attal a'n vergh ha'n flokkys ha'n gwarthek, hag a'n asenes, hag ev a brovias dhedha bara yn attal rag oll aga enyvales der an vlydhen na. 18Ha pan veu gorfennys an vlydhen na, i a dheuth dhodho y'n nessa blydhen ha leverel dhodho, ‘Ny yllyn keles dhiworth ow arloedh bos an mona gyllys, hag yma greow an chatel dhe'm arloedh. Nyns eus travyth gesys a-rag ow arloedh marnas agan korfow ha'gan tir. 19Prag yth eson ni ow merwel dherag dha dhewlagas, ha ni ha'gan tir? Pren ni ha'gan tir rag bara, ha ni ha'gan tir a vydh gwesyon dhe Faro. Ro dhyn has, may fewyn ha ma na verwyn, ha ma na vo an tir dibobel.’

20Ytho Yosep a brenas oll an tir yn Ejyp a-barth Faro, rag an Ejyptianys a werthas pubonan y bark rag y feu an divoetter tynn warnedha. Yndella Faro eth ha bos perghennek an tir; 21ha'n bobel, ev a's gwrug yn kethyon47:21 ev a's gwrug yn kethyon: Amendys war-lergh an Septuagint. Ebrow ev a's removas dhe'n sitys. dhiworth an eyl penn a Ejyp bys yn y gila. 22Saw unnsel tir an oferysi ny wrug ev y brena, rag yth esa dhe'n oferysi ewnrann dhiworth Faro; hag yth esens i ow tybri aga ewnrann a ros Faro dhedha. Ytho ny werthsons aga thir. 23Ena Yosep a leveris dhe'n bobel, ‘Otta, my re'gas prenas hwi ha'gas tir hedhyw a-barth Faro. Ottomma has ragowgh dhe hasa y'n tir.’ 24Ha peskweyth may fo trevas, hwi a re an pympes rann dhe Faro, ha gwitha peder rann ragowgh hwi rag hasa y'n park ha rag boes ragowgh hwi ha'n re yn agas chiow, ha rag boes rag agas fleghes 25Hag yn-medhons i, ‘Ty re sawyas agan bewnans. Gwren ni kavoes gras yn golok ow arloedh, ha ni a vydh kethwesyon dhe Faro.’ 26Ytho Yosep a wrug hemma ordenans bys y'n jydh hedhyw a-dro dhe bow Ejyp: Faro dhe gavoes an pympes rann. Saw tir an oferysi yn unnsel ny goedhas dhe Faro.

Yakob a Vennik Efraym ha Manasse

27Ytho Ysrael a drigas yn pow Ejyp, yn pow Goshen. I a gavas tiryow ena, ha doen frut, ha kressya yn feur. 28Yakob a veu yn few seytek blydhen yn pow Ejyp, ha dydhyow Yakob, blydhynyow y vewnans, a veu seyth bloedh ha seyth-ugens blydhen.

29Pan veu dydhyow Ysrael ow tos nes dh'y vernans, ev a elwis y vab Yosep ha leverel dhodho, ‘Mar kevis gras y'th wolok, gorr dha leuv yn-dann ow mordhos, my a'th pys, ha diskwedh dhymm tregeredh ha lelder. Na wra ow ynkleudhyas yn Ejyp. 30My a vynn growedha gans ow thasow. Dog vy yn-bann mes a Ejyp ha'm ynkleudhyas yn aga bedh i.’ Hag ev a leveris, ‘My a wra war-lergh dha er.’ 31Hag yn-medh ev, ‘Ti e dhymmo vy’; hag ev a'n tos. Ena Ysrael a omblegyas war benn an gweli.47:31 a omblegyas war benn an gweli: War-lergh an Septuagint a omblegyas, ow poesa war benn y lorgh. Gwel ynwedh Ebrowyon 11:21.