Diwettha Geryow Yakob dh'y Vebyon

1Ena Yakob a elwis y vebyon ha leverel, ‘Omguntellewgh war-barth, may hwrylliv derivas dhywgh an pyth a hwyrvydh dhywgh y'n dydhyow a dheu.

2Omguntellewgh ha klewes, a vebyon Yakob.

Goslowewgh orth Ysrael agas tas.

3‘Rewben, ow hynsa-genys osta,

ow krevder ha kynsa frut ow nerth gourel,

moyha yn reowta, moyha yn krevder.

4Ewynek avel dowr, ny vydh dhis ragwir,

rag ty eth yn-bann dhe weli dha das.

Ena ty a'n defolas; ty eth49:4 ty eth: Ow siwya an Septuagint. Ebrow ev eth. yn-bann dhe'm growedhva.

5‘Breder yw Simeon ha Levi.

Arvow garowder yw aga hellylli.

6Na wres o enev entra yn aga hevrin;

na vedhes ow enor kesunys gans aga huntelles;

rag yn aga sorr i a ladhas gour,

war-lergh aga sians i a evredhis tarow.49:6 evredhis tarow: Henn yw, dre dreghi giow y arr.

7Milliges re bo aga sorr, rag fell yw,

ha'ga honnar, rag tynn yw.

My a wra aga ranna yn Yakob

ha'ga skattra yn Ysrael.

8‘Yuda, dha vreder a wra dha wormel.

Yma dha leuv war gilbenn dha eskerens.

Mebyon dha das a ombleg dhiso.

9Kolen lew yw Yuda.

Dhiworth an preydh, ow mab, ty res eth yn-bann.

Ev a blattyas, ev a wrowedhas kepar ha lew,

ha kepar ha lewes; piw a wra dhodho sevel?

10Ny dreyl an welenn dhiworth Yuda

na'n dernwelenn a-dhiworth y dreys,

erna dheffo ev neb a's pew;49:10 erna dheffo ev neb a's pew: Ow siwya an Septuagint; henn yw, ev neb a bew an dernwelenn.

ha dhodho ev y fydh omaj an poblow.

11Ow kelmi y asenik dhe'n gwinbrenn

hag ebel y gasek-asen dhe'n gwinbrenn flour,

ev a wolgh y dhillas y'n gwin,

ha'y bows yn goes grappys.

12Terlentri a wra y dhewlagas gans gwin,

ha gwynn vydh y dhyns gans leth.

13‘Zebulun a vydh trigys orth an morrep,

hag a vydh porth rag gorholyon;

ha'y denewen a vydh troha Sidon.

14‘Asen askornek yw Yssakar

ow krowedha ynter an dhew sagh-diber.

15Ev a welas bos da y bowesva,

ha hweg an tir;

ev a blegyas y skoedh dhe'n begh,

hag a veu gorrys dhe hwel krev avel kethwas.

16‘Dan a varn y bobel

avel onan a loethow Ysrael.

17Dan a vydh sarf ryb an fordh,

nader gornek ryb an troe'lergh,

ow tynsel gwewennow an margh

may koedh an marghek war-dhelergh.

18‘My a wayt dha selwyans, A Arloedh.

19‘Gad, bagas a omsett er y bynn,

mes ev a omsett erbynn an re dhelergh.

20‘Yn-mes a Asher rych vydh y vara,

hag ev a re boes denti ryel.

21‘Naftali yw ewik delivrys dhe wari;

ev a re geryow teg.

22‘Skorrenn leun a frut yw Yosep,

skorrenn leun a frut ryb fenten.

Yma y varrow ow resek dres an ke.

23An sethoryon a'n provokyas yn feur.

Eskarogeth a's teva er y bynn;

24mes y warak a dhuryas fyrv

ha giow y dhiwdhorn49:24 giow y dhiwdhorn, po amendyans y dhiwvregh ha'y dhiwdhorn.

dre dhiwdhorn an Galloesek a Yakob,

yn hanow an Bugel, karrek Ysrael,49:24 yn hanow an Bugel, karrek Ysrael: Amendys. Ebrow alena bugel, men Ysrael.

25dre Dhuw dha das neb a'th weres,

ha'n Ollgalloesek49:25 Ollgalloesek: Ebrow Shadday. neb a'th vennik,

gans bennathow an nevow a-vann,

bennathow an downder a wrowedh war-nans,

bennathow diwvronn ha torr.

26Bennathow dha das yw kreffa

es bennathow an menydhyow heb diwedh,

es bennathow an breow heb diwedh;

re bons war benn Yosep,

ha war grogen an pryns yn mysk y vreder.

27‘Benyamin yw bleydh ow skwardya;

Myttin ev a dheber y breydh,

ha gorthugher ev a rann an pyth re beu pyllys.’

Mernans Yakob

28Oll an re ma yw dewdhek loeth Ysrael, ha hemm yw an pyth a leveris aga thas dhedha pan wrug ev aga benniga; ev a's bennigas pubonan war-lergh y vennath y honan. 29Ena ev a erghis dhedha, ow leverel dhedha, ‘My a vydh kuntellys war-barth gans ow fobel. Gwrewgh ow ynkleudhyas gans ow thasow y'n kav yn gwel Efron an Hittyas, 30y'n kav yn gwel Makpela usi dherag Mamre yn pow Kanan, a brenas Abraham gans an gwel dhiworth Efron an Hittyas, avel perghennogeth rag ynkleudhva. 31Ena, i a ynkleudhyas Abraham ha Sara y wreg; ena i a ynkleudhyas Ysak ha Rebeka y wreg, hag ena my a ynkleudhyas Lea. 32An gwel ha'n kav ynno a veu prenys dhiworth mebyon Heth.’ 33Ha Yakob a worfennas erghi dh'y vebyon ha tenna yn-bann y dreys a-berth yn y weli, hag anella y dhiwettha anall. Hag ev a veu kuntelles dh'y bobel.