Ynkleudhyans Yakob

1Ena Yosep a goedhas war fas y das, hag oela warnodho, hag amma dhodho. 2Ha Yosep a erghis dh'y wesyon an vedhogyon mayth urrons y das rag ynkleudhyans; ytho an vedhogyon a uras Ysrael. 3Hag i a gollenwis dew-ugens dydh ragdho, rag yndella yw kollenwys dydhyow an uras; ha'n Ejyptianys a oelas ragdho deg dydh ha tri-ugens.

4Pan veu tremenys dydhyow y oelva, Yosep a gewsis orth mayni Faro, ow leverel, ‘Mar kwrug vy kavoes gras yn agas golok, kewsewgh, my a'gas pys, yn diwskovarn Faro, ow leverel, 5“Ow thas a wrug dhymm gul ti, ow leverel, Otta, yth esov ow merwel. Ty a wra ow ynkleudhyas y'm bedh a wrug vy y gleudhya ragov yn pow Kanan.” Ytho lemmyn, gas vy dhe vos yn-bann, my a'th pys, hag ynkleudhyas ow thas, ha dehweles.’ 6Hag yn-medh Faro, ‘Ke yn-bann hag ynkleudh dha das dell wrug ev dhis ti.’ 7Ha Yosep eth yn-bann dhe ynkleudhyas y das ha ganso yth eth yn-bann gwesyon oll Faro, henavogyon y vayni hag oll henavogyon pow Ejyp, 8ha mayni oll Yosep ha'y vreder ha mayni y das. Saw ny assons yn pow Goshen marnas aga fleghes ha'ga flokkys ha'ga chatel. 9Hag yth eth yn-bann ganso ynwedh charettow ha marghogyon; lu pur vras ova. 10Hag i a dheuth dhe leur-drushya Atad usi dres an Yordan, hag ena i a gynis gans kynvann bras ha pur boes; hag ev a wrug kynvann rag y das seyth dydh. 11Ha trigoryon an pow, an Kananysi, a welas an kynvann orth leur-drushya Atad ha leverel, ‘Kynvann ankensi yw hemma dhe'n Ejyptianys.’ Rakhenna y hanow a veu gelwys, Abel-misraym, usi dres an Yordan. 12Ytho y vebyon a wrug ragdho par dell wrussa erghi dhedha. 13Ha'y vebyon a'n dug yn-bann dhe bow Kanan, ha'y ynkleudhyas yn kav gwel Makpela a wrug Abraham y brena gans an gwel avel perghennogeth rag ynkleudhva, dhiworth Efron an Hittyas, a-dherag Mamre. 14Wosa ev dhe ynkleudhyas y das, Yosep a dhehwelis dhe Ejyp, ev ha'y vreder, hag oll an re a dheuth yn-bann ganso dhe ynkleudhyas y das.

Breder Yosep a Bys Gevyans

15Pan welas breder Yosep bos marow aga thas, yn-medhons i, ‘Martesen Yosep a vydh eskarek er agan pynn, hag a vynn attyli dhyn oll an drog a wrussyn dhodho.’ 16Ytho i a dhannvonas messaj dhe Yosep, ow leverel, ‘Dha das a worhemmynnis kyns ev dhe verwel, ow leverel, 17“Kewsewgh yndella dhe Yosep: Gav, my a'th pys, treuspass dha vreder, ha'ga fegh, rag i re wrug drog dhis.” Ytho lemmyn, ni a'th pys, gwra gava treuspass gwesyon an Duw a'th tas.’ Ha Yosep a oelas pan gowssons orto. 18Ha'y vreder ynwedh a dheuth ha koedha a-dheragdho, ha leverel, ‘Ottani, dha wesyon.’ 19Mes yn-medh Yosep dhedha, ‘Na berthewgh own. Esov vy yn le Duw? 20Ha hwi, hwi a dewlis droktra er ow fynn; Duw a'n tewlis dhe vos dader, may teffa an dra dell yw y'n jydh hedhyw: dhe witha tus pals yn few. 21Ha lemmyn, na berthewgh own. My a vynn agas sostena, hwi ha'gas fleghes.’ Hag ev a's konfortyas ha kewsel orta yn kuv.

22Yth esa Yosep trigys yn Ejyp, ev ha chi y das. Ha Yosep a vewas deg blydhen ha kans. 23Ha Yosep a welas mebyon Efraym a'n tressa henedh. Mebyon Makir mab Manasse ynwedh a veu genys war dhewlin Yosep.

Mernans Yosep

24Hag yn-medh Yosep dh'y vreder, ‘Yth esov ow merwel. Duw sertan a wra agas visitya, ha'gas dri yn-bann mes a'n pow ma bys y'n pow a ambosas ev dre di dhe Abraham, dhe Ysak ha dhe Yakob.’ 25Ha Yosep a wrug dhe vebyon Ysrael gul ti, ow leverel, ‘Sur yw, y fydh Duw orth agas visitya, ha hwi a dheg ow eskern yn-bann alemma.’ 26Ytho Yosep a verwis, kans bloedh ha deg y oes. I a'n uras, hag ev a veu gorrys yn geler yn Ejyp.