An Kevambos gans Noy

1Ha Duw a vennigas Noy ha'y vebyon ha leverel dhedha, ‘Degewgh frut ha kressyewgh ha lenwel an nor. 2Hag own ahanowgh hag euth ahanowgh a vydh war bub best a'n nor ha war bub edhen a'n ayr, war beub ow kwaya war an tir, war oll puskes an mor. I a vydh res yn agas dorn. 3Pup-tra ow kwaya hag a vew a vydh boes ragowgh. Kepar ha'n losow glas, my re ros dhywgh pup-tra. 4Mes kig hag ynno y vewnans, henn yw y woes, ny wrewgh y dhybri. 5Hag yn sur, rag goes agas bewnans hwi my a vynn kavoes reknans; my a vynn y gavoes orth pub best; hag orth mab-den, orth den ha'y broder, my a vynn kavoes reknans a vewnans den.

6Piwpynag a skoellyo goes den,

gans den y fydh y woes ev skoellyes.

Rag yn imaj Duw

ev a wrug mab-den.

7Ha hwi, degewgh frut ha kressyewgh. Omlesewgh war an nor ha kressyewgh warnodho.’

8Ena Duw a gewsis orth Noy hag orth y vebyon ganso, ow leverel, 9‘Awotta, yth esov ow fastya ow hevambos genowgh ha gans agas has war agas lergh, 10ha gans pub tra vew usi genowgh hwi, ydhyn, chatel, ha pub best a'n nor genowgh hwi, a beub usi ow mos yn-mes a'n gorhel – pup-tra vew a'n nor. 11Ha my a wra fastya ow hevambos genowgh. Ny vydh kig oll diswrys arta gans dowrow liv, na ny vydh arta liv dhe dhiswul an nor.’ 12Hag yn-medh Duw, ‘Hemm yw tokyn a'n kevambos esov ow kul yntra my ha hwi ha pub kreatur bew usi genowgh, bys vykken ha bynnari. 13My a worr ow gwarak y'n kommol, ha hi a vydh tokyn a gevambos yntra my ha'n norvys. 14Hag y hwer, pan dhrov kommol war an nor, y fydh an warak gwelys y'n kommol, 15ha my a berth kov a'm kevambos usi yntra my ha hwi ha pub kreatur bew a gig oll, ha nevra namoy ny wra an dowrow dos ha bos liv dhe dhiswul pub kig oll. 16Ha'n warak a vydh y'n kommol ha my a vir orti may perthiv kov a'n kevambos bys vykken yntra Duw ha pub kreatur bew a bub kig usi war an nor.’ 17Hag yn-medh Duw dhe Noy, ‘Hemm yw tokyn a'n kevambos re wrugavy y fastya yntra my ha pub kig usi war an nor.’

Noy ha'y Vebyon

18Ha mebyon Noy neb eth yn-mes a'n gorhel o Shem ha Ham ha Yafeth; ha Ham o tas Kanan. 19An re ma aga thri o mebyon Noy; ha dhiworth an re ma tus a veu lesys war oll an bys.

20Ha Noy a dhallathas bos tiek, hag ev a blansas gwinlann. 21Pan evas rann a'n gwin, ev a veu medhow ha heb kudhlenn a-ji dh'y dylda. 22Ha Ham, tas Kanan, a welas noethedh y das ha'y dherivas dh'y dhew vroder esa yn-mes. 23Ha Shem ha Yafeth a gemmeras mantell ha'y gorra war aga diwskoedh ha mos war-dhelergh ha kudha noethedh aga thas. Aga fasow o treylys war-dhelergh ha ny welsons noethedh aga thas. 24Ena Noy a dhifunas a'y win, hag ev a wodhva pandr'a wrussa y vab yowynka gul dhodho. 25Hag ev a leveris,

‘Milliges re bo Kanan.

Kethwas kethwesyon a vydh ev dh'y vreder.’

26Hag ev a leveris,

‘Benniges re bo an Arloedh, Duw Shem,

ha re bo Kanan kethwas dhodho.

27Re ynkressyo Duw Yafeth,

ha re bo trigys a-berth yn tyldow Shem;

re bo Kanan kethwas dhodho.’

28Ha wosa an liv, Noy a vewas trihans blydhen ha hanter-kans. 29Ha dydhyow oll Noy a veu naw kans bloedh ha hanter-kans; hag ev a verwis.