1Sevel a wrav war ow savla-gwitha

hag omsettya war ow thour-goelyas

ow mires dhe weles an pyth a vynn ev leverel dhymm,

ha'n pyth a worthybav dhe'm krodhvol.2:1 ha'n pyth a worthybav dhe'm krodhvol: War-lergh an Syriek an pyth a worthyp ev dhe'm krodhvol.

An Arloedh a Worthyp Arta

2Ha'n Arloedh a worthybis dhymm, ha leverel:

Skrif an welesigeth

yn tiblans war leghennow

may poennyo neb a's red.2:2 may poennyo neb a's red: Po may hallo lenner y redya gans es.

3Rag an welesigeth yw hwath rag termyn apoyntys;

hi a fisten dhe'n diwedh, ha ny wowlever:

kyn hok hi, rag hi a dheu yn surredi, ny dhelat hi.

4Awotta, goethus yw an den

nag yw y enev ewn ynno,2:4 goethus yw an den nag yw y enev ewn ynno: Po klamdera a wra an den nag yw y enev ewn ynno

mes an den gwiryon a vew der y lelder.

Pymp Guw avel Breus erbynn Drogoberoryon

5Rychys ynwedh yw fals,

ny dhur an den goethus,

neb re ledanhas y vryansenn avel ifarn,

ha kepar hag ankow na yll bos gwalghys,

mes ev a guntell a-dro dhodho oll an kenedhlow,

hag assembla dhodho oll an poblow.

6A ny wra oll an re na drehevel parabolenn er y bynn, ha henlavarow rag y skornya, ow leverel,

‘Go-ev neb a guntell war-barth pythow nag eus dhodho ev;

(pes termyn y hwra henna pesya?)

Beghys yw gans arwoestlow.’

7A ny sev a-dhesempis dha gresysoryon?

A ny dhifun an re a'th wra dhe grena?

Ha ty a vydh preydh ragdha.

8Rag ty dhe bylla lies kenedhel,

an remenant oll a'n kenedhlow a'th pyll;

drefenn goes mab-den, ha garowder erbynn tiryow,

erbynn sitys, hag oll an dus usi trigys ynni.

9Go-ev neb a gemmer tebel brow rag y ji,

ow settya y neyth a-vann

may fo delivrys dhiworth an leuv a dhrogober.

10Ty re dhros meth dhe'th chi

ow tistrui lies pobel,

hag ow pegha erbynn dha enev dha honan.

11Rag an men a skrij dhiworth an fos,

ha'n geber y'n prennweyth a'n gorthyp.

12Go-ev neb a dhrehav tre gans goes

ha fondya sita war gammhynseth.

13A nyns yw dhiworth Arloedh an luyow

may lavur an poblow rag tan

ha mayth yw an kenedhlow skwithys rag travyth?

14Rag lenwys vydh an nor

gans godhvos golewder an Arloedh,

dell worher an dowrow an mor.

15Go-ev neb a re dh'y gentrevek

bolla dha wenon dhe eva, ha'y vedhwi ynwedh

rag mires orth aga noethedh.

16Lenwys os gans meth yn le golewder:

yv ty ynwedh ha diskwa dha vleyngroen.

An hanaf yn leuv dhyghow an Arloedh

a dheu dhis

ha disenor a vydh war dha wolewder.

17Rag garowder erbynn Lebanon a'th kudh,

ha ladhva an bestes a'th ownekha,

drefenn goes mab-den, ha garowder erbynn tiryow,

erbynn sitys, ha myns eus trigys ynna.

18Py les eus dhe imaj gravys

pan y'n gravyas y furvyer –

imaj teudh ha dyskador gowyow?

An furvyer a drest y wrians y honan,

ow kul idolys avlavar!

19Go-ev neb a lever dhe brenn, ‘Difun’,

dhe ven avlavar, ‘Yn-sol!’

Dyskador ywa?

Otta, gorlownys yw gans owr hag arghans,

mes nyns eus spyrys vyth a-berth ynno.

20Mes yma'n Arloedh yn y dempel sans:

tewes a-dheragdho oll an nor!