Salm Habakkuk

1Pysadow Habakkuk an profoes war Shigyonoth.3:1 Shigyonoth: Lavar a venestrouthi – an hanow a neb ton, martesen kan wyls.

2A Arloedh, my re glewas derivas ahanas,

my re borthas own, A Arloedh, a'th ober;

yn mysk an blydhynyow gas ev dhe dhasvewa,

yn mysk an blydhynyow gas ev dhe vos godhvedhys;

yn sorr porth kov a druedh.

3Duw a dheu dhiworth Teman,

ha'n Sans dhiworth menydh Paran. Sela.3:3 Sela: Lavar a venestrouthi, martesen drehevel an lev, po powes rag seni daffar kordenn.

Y veuredh re gudhas an nevow,

ha'y wormola re lenwis an nor.

4Ha'n splannder yw kepar ha'n golow;

lughesennow a dheu a'y leuv,

hag ena yma kudhans y nerth.

5A-dheragdho yth a an vall,

hag yn-rag yth a an pla orth y dreys.

6Ev re sevis ha musura an norvys,

ev re welas an kenedhlow, ha gul dhedha lemmel;

brewys veu an menydhyow heb diwedh,

omblegya a wrug an breow a bes vynitha:

dhodho yw an fordhow a bes vynitha.

7My a welas tyldow Kushan yn ahwer,

kroglennow tyldow bro Midyan a gren.

8A wrug dha sorr dewi erbynn an avonyow, A Arloedh,

yw dha goler erbynn an avonyow

po dha gonnar erbynn an mor,

may marghogydh war dha vergh,

dha jarettow a selwyans?

9Noeth yn tien y hwredh dha warak,

ty a lenow an woen gans sethow.3:9 ty a lenow an woen gans sethow: Amendys. An Ebrow yw legrys. Sela.

Ty a fols an dor gans avonyow.

10An menydhyow a'th welas hag i a grenas;

liv a dhowrow a dremenas;

an islonk a dhellos y lev

ha drehevel y dhiwleuv yn-bann.

11An howl ha'n loer a sevis stag yn aga annedh,

i a omdennas a-rag golow dha sethow

hag a-rag splannder dha wuw dewynnek.

12Ty a gerdh der an norvys gans sorrvann,

ty a stank war genedhlow gans sorr.

13Ty a gerdh yn-mes rag selwyans dha bobel,

rag selwyans dha untys;

ty a wysk an penn a ji an tebelwas,

ow lommhe an selyow bys y'n konna. Sela.

14Gans y shaftys y honan ty a wanas pennow y gasoryon;

i a dheuth avel korwyns dh'agan skattra;

I a lowenhas kepar hag ow lenki an den truan yn-dann gel.3:14 Amendys. Ebrow Ty a wanas penn gans y shaftys; i a hwyth avel korwyns dhe'm skattra; aga balghder yw kepar ha dybri an den truan yn tyller kevrinek.

15Ty a stankyas y'n mor gans dha vergh,

ewyn a dhowrow meur.

16My a woslowas ha'm torr a grenas;

orth an son ow diwweus a dremblas,

podredhes a dheu y'm eskern

ha'm diwarr a dhegren yn-dannov.

Yn kosel my a worta dydh an ahwer

dhe dhos war bobel a omsett er agan pynn.

17Kyn na vleujyow an figbrenn

ha nyns eus frut war an gwinbrennyer;

kyn fyll ober an olewbrenn,

ha ny dhaskorr an gwelyow boes;

kyn na vo an para kevys namoy y'n gorlann,

ha nyns eus gwarthek y'n stallow,

18hwath my a lowenha y'n Arloedh,

ha my a vydh heudhik yn Duw ow selwyans.

19An Arloedh Duw yw ow nerth,

hag ev a wra ow threys kepar ha treys ewigow,

hag ev a wra dhymm kerdhes war ow tylleryow ughel.

Dhe'n penn-kenysi war dhaffar kerdyn.