Habakkuk a Grodhvol a-dro dhe Gammhynseth

1An profoesans a welas Habakkuk an profoes yn gwelesigeth.

2Pes termyn, A Arloedh, y kriav rag gweres

ha ny vynnydh goslowes;

‘Freudh!’ a armav dhis

ha ny vynnydh sawya?

3Prag y tiskwedhydh dhymm droktra,

ha gul dhymm mires orth ahwer?

Rag yma terroes ha freudh a-dheragov;

yma strif, ha kedrynna a sev.

4Rakhenna dinerth yw an lagha,

ha ny a gwirvreus nevra yn-rag.

Rag an tebelwas a omsett a-dro dhe'n den gwiryon;

ytho kammvreus a yn-rag.

An Arloedh a Worthyp

5Aspiewgh yn mysk an kenedhlow, ha mirewgh,

ha bedhes dhywgh marth bras:

rag yn agas dydhyow y hwrav ober na grysowgh,

kyn fo derivys dhywgh.

6Rag, otta, my a sord an Kaldeanys,

kenedhel hwerow ha fysk,

a geskerdh dre les an tir

rag sesya annedhow nag esons dhedha.

7Fell hag euthyk yns: aga breus ha'ga reowta a yn-rag a-dhiworta.

8Skaffa ages lewpardes yw aga mergh,

ha gwylsa yns ages bleydhi an gorthugher:

aga marghogyon a boen yn-mes,

ha'ga marghogyon a dheu dhiworth pell.

I a nij kepar ha'n er a fisten dhe dhybri;

9rag ravna i oll a dheu:

i a dheu yn-rag yn aga leunder avel gwyns an howldrevel,

ow kuntell kethyon avel tewes.

10Hag i a skorn an vyghternedh,

ha ges yw pennternedh ragdha:

i a hwerth orth pub ker;

i a wra tommenn rag hy hemmeres.

11Ena i a tremen kepar ha gwyns, ha mos dhe-ves;

an dus kablus ma, aga nerth yw aga duw.

Habakkuk a Grodhvol Arta

12A ny veus a'n dalleth, A Arloedh,

ow Duw sans? Ny verwyn.1:12 Ny verwyn: Po amendyans Ny verwydh.

A Arloedh, ty re's ordenas1:12 ty re's ordenas: Henn yw an Kaldeanys. rag breus;

A Garrek, ty re's fondyas rag keredh.

13Re bur yw dha dhewlagas rag gweles droktra,

ha ny yllydh perthi drogober.

Prag y firydh ytho orth an falswesyon,

ha synsi dha daves pan dhevor an tebelwas

an den yw moy gwiryon agesso?

14Ha ty a wra tus kepar ha puskes an mor,

kepar ha'n pryvyon, nag eus rewler dhedha.

15Ev a gemmer peub anedha war-vann gans higenn,

ha'ga thenna yn-mes gans y roes,

ev a's kuntell yn y roes-draylya:

rakhenna ev a lowenha ha heudhi.

16Rakhenna yth offrynn dh'y roes

ha leski offrynnow dh'y roes-draylya;

rag bras yw y rann dredha,

ha rych yw y boes.

17A wakha ytho y roes heb hedhi,1:17 A wakha ytho y roes heb hedhi: War-lergh rol-skrifow an Mor Marow I a denn aga kledhedhyow heb hedhi.

ow ladha kenedhlow yn tibita?