Ryelder an Tempel Nowydh

1Y'n kynsa dydh warn ugens y'n seythves mis2:1 An 17ves a vis-Hedra 520 kyns Krist. y teuth ger an Arloedh der Haggay an profoes, ow leverel: 2Lavar hemma dhe Zerubbabel mab Shealtiel, governour Yuda ha dhe'n arghoferyas Yoshua mab Yosedek, ha dhe remenant an bobel: 3Piw yw gesys yntredhowgh a welas an chi ma yn y golewder kyns? Ha fatell y'n gwelowgh lemmyn? A ny hevel ev kepar ha travyth yn agas dewlagas hwi? 4Mes lemmyn bydh kolonnek, A Zerubbabel, yn-medh an Arloedh, ha bydh kolonnek, A arghoferyas Yoshua mab Yosedek, ha bedhewgh kolonnek, oll pobel an vro, yn-medh an Arloedh, hag oberewgh, drefenn ow bos genowgh, yn-medh Arloedh an luyow. 5Hemma a gevambosis genowgh pan dheuthewgh yn-mes a Ejyp; ow spyrys a bes yntredhowgh, na berthewgh own. 6Rag yndella yn-medh Arloedh an luyow: torn arall, pols byghan, ha my a wra an nevow ha'n norvys dhe grena, ha'n mor ha'n tir sygh. 7Ha my a wra oll an kenedhlow dhe grena, ha tresoryow an kenedhlow oll a dheu, ha my a lenow an chi ma gans golewder, yn-medh Arloedh an luyow. 8Dhymm yw an arghans, ha dhymm yw an owr, yn-medh Arloedh an luyow. 9Brassa vydh golewder diwettha an chi ma es an kynsa y'n termyn a dheu, yn-medh Arloedh an luyow. Hag y'n tyller ma y rov kres, yn-medh Arloedh an luyow.

10Y'n peswora dydh, y'n nawves mis, y'n nessa blydhen a Darius,2:10 An 18ves a vis-Kevardhu 520 kyns Krist. ger an Arloedh a dheuth dhe Haggay an profoes, ow leverel: 11Yndellma y leveris an Arloedh: ‘Pys ervirans dhiworth an oferysi: 12Mar teg den kig sakrys yn pleg y dhillas ha'n pleg a doch bara, po kowl, po gwin, po oyl, po neb boes arall, a vydh an dra na sakrys?’ Ha'n oferysi a worthybis, ‘Na vydh.’ 13Ena Haggay a leveris, ‘Mar kwra den, yw avlan dre dochya korf marow, tochya onan a'n taklow na, a vydh an dra ma avlan?’ Ha'n oferysi a worthybis, ‘Avlan vydh.’ 14Ha Haggay a worthybis ow leverel: Yndella yw an bobel ma, hag yndella yw an kenedhel ma a dheragov, yn-medh an Arloedh: hag yndella yw gwriansow oll aga diwleuv, hag avlan yw an pyth a offrynnons ena. 15Ha lemmyn, my a'gas pys, prederewgh a-dhia'n jydh ma yn-rag, kyns men dhe vos gorrys war ven yn tempel an Arloedh, 16fatell o ragowgh? Pan dhes dhe gals greun rag ugens musur nyns esa saw deg: pan dhes dhe'n winwask rag tenna hanter-kans musur nyns esa saw ugens. 17My a weskis warnowgh, ha war wriansow oll agas diwleuv, gans kleves losk ha kleves melynheans y'n ys ha keser, mes ny dreylsowgh dhymm, yn-medh an Arloedh. 18Prederewgh a-dhia'n jydh ma yn-rag, a-dhia'n peswora dydh warn ugens a'n nawves mis;2:18 An 18ves a vis-Kevardhu 520 kyns Krist. a-dhia'n jydh may feu selys tempel an Arloedh, prederewgh! 19Usi an has y'n skiber hwath? Ha ny dhaskorras na hwath an gwinbrenn, an figbrenn, an greunaval na'n olewbrenn. Mes dhiworth an jydh ma my a'gas bennik.

Ambos an Arloedh dhe Zerubbabel

20Ger an Arloedh a dheuth dhe Haggay arta y'n peswora dydh warn ugens a'n mis, ow leverel: 21Lavar hemma dhe Zerubbabel, governour Yuda: My a wra an nevow ha'n norvys dhe grena; 22My a dhomhwel an se a wlaskordhow, ha distrui galloes gwlaskordhow an kenedhlow, Disevel a wrav an charettow ha'ga lewyoryon, ha'n vergh ha'ga marghogyon a goedh, pubonan dre gledha y vroder. 23Y'n jydh na, yn-medh Arloedh an luyow, my a'th kemmer, A Zerubbabel, ow gwas, mab Shealtiel, yn-medh an Arloedh, ha my a'th wra kepar ha bysow sel: rag my re'th tewisas, yn-medh Arloedh an luyow.