An Arloedh a Ergh Dastrehevyans an Tempel

1Y'n nessa blydhen a Darius an myghtern, y'n hweghves mis, yn kynsa dydh an mis1:1 An 29ens a vis-Est, 520 kyns Krist. y teuth ger an Arloedh der an profoes Haggay dhe Zerubbabel, mab Shealtiel, governour Yuda, ha dhe'n arghoferyas Yoshua, mab Yosedek, ow leverel, 2Yndellma y lever Arloedh an luyow, ow leverel: An dus ma a lever, ‘Nyns yw an termyn devedhys, an termyn may koedh dhe ji an Arloedh bos drehevys.’ 3Ena y teuth ger an Arloedh der an profoes Haggay, ow leverel: 4Yw hemma termyn ragowgh hwi dhe driga yn agas chiow pannellys, pan yw an chi ma magor? 5Lemmyn ytho yndellma y lever Arloedh an luyow: Prederewgh a'gas fordhow. 6Hwi a hasas kemmys, ha doen boghes tre; hwi a dheber mes nyns eus lowr dhywgh; hwi a yv mes ny omvedhwowgh; hwi a omwisk mes nyns yw denvyth toemm; ha'n re neb a dhendil gober a dhendil gober yn yalgh gans tell.

7Yndellma y lever Arloedh an luyow: Prederewgh a'gas fordhow. 8Yskynnewgh an menydh ha dri prenn ha drehevel an chi may kyffiv plesour ynno ha bos enorys, yn-medh an Arloedh. 9Hwi a hwilas kemmys, hag otta, boghes; ha pan y'n dresowgh tre my a'n hwythas dhe-ves. Prag? yn-medh Arloedh an luyow. Rag ow chi yw magor, ha hwi a boen, peub dh'y ji y honan. 10Rakhenna an nev a-ughowgh a skon an gluth, ha'n dor y drevas. 11Ha my a elwis rag syghor war an tir, war an menydhyow, ha war an ys, war an gwin nowydh, ha war an oyl, ha war an pyth a wra an dor y dhri mes, war dus, ha war warthek ha war oll an askorr a lavur diwleuv.

An Bobel a Obay Arghadow an Arloedh

12Ena Zerubbabel mab Shealtiel ha'n arghoferyas Yoshua mab Yosedek, gans oll remenant an bobel, a obayas lev an Arloedh aga Duw, ha geryow an profoes Haggay, dell y'n dannvonsa an Arloedh aga Duw, ha'n bobel a gemmeras own a-dherag an Arloedh. 13Ena Haggay, kannas an Arloedh, a dherivas messaj an Arloedh dhe'n bobel, ow leverel: Yth esov genowgh yn-medh an Arloedh. 14Ha'n Arloedh a wrug dhe spyrys Zerubbabel mab Shealtiel, governour Yuda, difuna, ha spyrys an arghoferyas Yoshua, mab Yosedek, ha spyrys oll remenant an bobel; hag i a dheuth hag oberi yn chi Arloedh an luyow, aga Duw, 15y'n peswora dydh warn ugens y'n hweghves mis, y'n nessa blydhen a Darius an myghtern.1:15 An 21ens a vis-Gwynngala 520 kyns Krist.