1Rag an lagha, na'n jeves marnas skeus a'n traow mas dhe dhos a-der an purra imaj a'n traow ma, ny yll10:1 ny yll: War-lergh re a'n dornskrifow ny yllons. nevra, der an keth sakrifisow yw offrynnys blydhen wosa blydhen heb lett, perfydhhe an re a dheu nes. 2Poken a ny wrussens hedhi a vos offrynnys? Mar pe glanhes an re ow kormel unnweyth rag oll, ny's tevia aswonnvos pegh. 3Mes y'n sakrifisow ma yma arta kov pegh pub blydhen. 4Rag ny yll goes terewi na gever dilea peghosow. 5Hemm yw prag, pan dheuth Krist dhe'n bys, ev a leveris,

‘A sakrifis hag offrynn, ny' feu hwans,

mes korf re bareussys ragov;

6yn offrynnow leskys hag offrynnow pegh

ny' feu plesour.

7Ena y leveris vy,

“Otta, deuvev, may hwrylliv dha vodh, a Dhuw”,

dell yw skrifys ahanav yn rol an lyver.’

8Pan leveris yndellma, ‘Ny' feu na hwans na plesour yn sakrifisow hag offrynnow hag offrynnow leskys hag offrynnow pegh’ (an re ma yw offrynnys herwydh an lagha), 9ena y keworras, ‘Otta, deuvev may hwrylliv dha vodh.’ Ev a dhile an kynsa rag sevel an nessa. 10Ha der an bodh na, ni re beu sanshes, der offrynn korf Yesu Krist unnweyth rag oll. 11Ha pub oferyas a sev pub-dydh ow menystra, owth offrynna menowgh an keth sakrifisow na yllons nevra dilea peghosow. 12Mes pan offrynnsa Krist unn sakrifis rag peghosow bys vykken, ‘ev a esedhas orth leuv dhyghow Duw’, 13ow kortos ena ‘erna vo gorrys y eskerens avel skavell yn-dann y dreys.’ 14Rag der unn offrynn ev re berfydhhas bys vykken an re yw sanshes. 15Ha'n Spyrys Sans a dheg dustuni dhyn: rag wosa leverel,

16‘Hemm yw an kevambos a wrav gansa

wosa an dydhyow na, yn-medh an Arloedh;

my a worr ow laghow yn aga holonn,

ha'ga skrifa yn aga brys’,

17ena ev a geworr,10:17 War-lergh re a'n dornskrifow nyns usi omma an geryow, ena y keworr.

‘A'ga feghosow ha'ga oberow dilagha ny borthav kov namoy.’

18Ple mayth eus gevyans a'n re ma, ny vydh edhomm na fella a offrynn rag peghosow.

Keskyans ha Gwarnyans

19Ytho, breder, a-ban y'gan beus fydhyans dhe entra dhe'n sentri dre woes Yesu, 20der an fordh vew nowydh a igoras ev der an vayl, henn yw der y gig, 21hag a-ban y'gan beus oferyas meur war ji Duw, 22nesyn gans kolonn wir yn surneth leun a fydh, agan kolonn purhes glan a debelgowses ha'gan korf golghys gans dowr pur. 23Synsyn fast dhe brofessyans agan govenek fyrv, rag lel yw ev neb a ambosas; 24hag ombrederyn fatell ynniyn an eyl y gila dhe gerensa hag oberow mas, 25heb forsakya agan kuntellyans agan honan, dell yw an usadow gans rann, mes kennertha an eyl y gila, ha seul voy dell welowgh an Jydh ow nesa.

26Rag mar peghyn a'gan bodh wosa degemmeres aswonnvos leun a'n gwiryonedh, nyns eus gesys namoy sakrifis rag peghosow, 27mes neb gwaytyans ownek a vreus, ha konnar an tan a wra lenki an eskerens. 28Neb re dhenaghas lagha Moyses a verow heb truedh ‘war dhustuni dew po tri dustunier.’ 29Pygemmys gweth an kessydhyans, tybi a wrewgh, a vydh breusys gwiw dhe neb a stank war Vab Duw ha synsi dhe vos avlan goes an kevambos dredho may feu sanshes, hag arvedh an Spyrys a ras? 30Rag ni a'n aswonn neb a leveris, ‘Dhymmo vy yw an dial; my a attal.’ Hag arta, ‘An Arloedh a wra breusi y bobel.’ 31Tra euthyk yw koedha yntra diwleuv an Duw bew.

32Mes perthewgh kov a'n dydhyow kyns wosa hwi dhe vos enowys, hwi a wodhevi strif kales a boenow, 33treweythyow ow kodhevel tebel dhyghtyans ha galar a-wel tus, treweythyow ow pos kevrennoryon a'n re dyghtys yndella. 34Rag yn hwir hwi a geskodhevis gans an brisnoryon,10:34 gans an brisnoryon: War-lergh re a'n dornskrifow gans ow frisnoryon ha hwi a wodhevis yn lowen ravnans agas pythow, a-ban wodhyewgh bos genowgh10:34 War-lergh re a'n dornskrifow yma omma an geryow y'n nevow. pythow gwell hag a bes. 35Na dewlewgh dhe-ves ytho agas fydhyans, hag a'n jeves pewas meur. 36Rag hwi a'gas beus edhomm a berthyans, may hwryllowgh bodh Duw ha kavoes an pyth yw ambosys. 37Rag

‘hwath unn pols pur vyghan

ha neb a vydh ow tos a dheu, ha ny wra strechya;

38mes ow den gwiryon a wra bewa dre fydh,

ha mar kildenn, ny gemmer ow enev plesour ynno.’

39Mes nyns on ni a'n re a gildenn ha mos dhe goll, mes a'n re a's teves fydh ha gwitha aga enev.