Fydh

1Lemmyn fydh yw fydhyans y'n traow gwaytys, prov a daklow na welir. 2Rag dredho y kavas an henavogyon dustuni da. 3Dre fydh y konvedhyn bos an bys gwrys dre er Duw, may feu gwrys an pyth a welir dhiworth an pyth anwelys.

4Dre fydh yth offrynnas Abel dhe Dhuw sakrifis gwell ages sakrifis Kayn, dredho may kavas dustuni y vos ewnhynsek, Duw ow tustunia dh'y rohow; ha dredho, kyn fo marow, ev a gews hwath. 5Dre fydh Enok a veu ravshys na wella mernans: ha ‘ny veu kevys, rag Duw dh'y gemmeres.’ Rag kyns bos kemmerys, dustuniys veu ‘ev dhe vos plegadow dhe Dhuw.’ 6Ha heb fydh ny yllir y blesya. Rag y tegoedh dhe neb a dheffo nes dhe Dhuw krysi y vos bew hag ev dhe wobra an re a'n hwila yn tiwysyk. 7Dre fydh Noy wosa bos gwarnys gans Duw a-dro dhe daklow na veu gwelys hwath, hag ev ownek, a dhrehevis gorhel rag sawya y vayni; dre hemma ev a dhampnyas an bys ha dos ha bos her an ewnder a dheu dre fydh.

8Dre fydh Abraham o gostydh pan veu gelwys dhe vos dhe dyller may tegemmerra eretons; ev eth yn-rag heb konvedhes ple'th esa ow mos. 9Dre fydh ev a dheuth dhe driga yn tir an ambosow, avel estren, trigys yn tyldow gans Ysak ha Yakob, kes-heryon a'n keth ambos. 10Rag y hwaytya an sita hag a's tevo selveyn, ha'n pennser ha'n byldyer anedhi yw Duw. 11Dre fydh Sara11:11 Sara: War-lergh re a'n dornskrifow Sara wownagh. hy honan a dhegemmeras galloes dhe omdhoen hwath pan o hi dres an oes, a-ban brederi hi, ev dhe vos lel neb a ambossa. 12Hag yndellma dhiworth unn den, hag ev kepar hag onan marow, y feu genys diyskynnysi avel ster an nev orth niver, ha diniver avel tewes an morrep. 13Dre fydh y ferwis oll an re ma, heb degemmeres an ambosow; mes i a's gwelas ha'ga salusi a-bell, ow konfessya aga bos estrenyon ha godrigoryon war an nor. 14Rag an re a gews yndellma a dhiskwa yn kler aga bos ow hwilas mammvro. 15Mar pens ow prederi a'n vro may tothyens anedhi, termyn a's tevia rag dehweles. 16Mes lemmyn bro well a hwansons, henn yw, onan nevek. Ytho, Duw ny'n jeves meth bos gelwys aga Duw, rag ev re dharbaris dhedha sita. 17Dre fydh Abraham, pan veu prevys, a offrynnas Ysak hag ev neb re dhegemmersa an ambosow o parys dhe offrynna y unn vab dineythys, 18anodho dell veu leverys, ‘Der Ysak y fydh henwys dha has.’ 19Ev a grysi y hylli Duw drehevel tus a'n re varow; ytho, yn figur, ev a wrug y dhaskemmeres. 20Dre fydh y pysis Ysak bennathow dhe dhos war Yakob hag Esaw. 21Dre fydh Yakob, ow merwel, a vennigas pub huni a vebyon Yosep ‘owth omblegya yn gordhyans war benn y lorgh.’ 22Dre fydh Yosep, ow merwel, a borthas kov a-dro dhe dhibarth fleghes Ysrael hag a ros arghadow a-dro dh'y eskern.

23Dre fydh Moyses, pan veu genys, a veu kudhys tri mis gans y gerens, drefenn i dhe weles bos teg an flogh; ha ny's tevo own rag gorhemmynn an myghtern. 24Dre fydh Moyses, pan devis bras, a skonyas bos gelwys mab myrgh Faro, 25ow tewis, yn le hemma, kevrenna tebel dhyghtyans pobel Duw kyns es lowenhe pols yn plesour peghosow. 26Ev a dybi godhevel tebel dhyghtyans rag an Krist kevoeth moy ages tresoryow Ejyp, rag y fira yn-rag orth an gober. 27Dre fydh ev a asas Ejyp, heb perthi own a sorr an myghtern; rag y parghas, kepar dell ve ow kweles neb yw diwel. 28Dre fydh ev a bareusis an pask ha skoellya an goes, ma na's tocchya distruer an re gynsa-genys.

29Dre fydh y treussons an Mor Rudh avel dre dhor sygh; mes tus Ejyp, pan hwilsons gul yndellma, y fons lenkys. 30Dre fydh y koedhas fosow Yeriko wosa i dhe gerdhes a-dro dhedha seyth dydh. 31Dre fydh ny veu ledhys Rahab an hora war-barth gans an re dhiwostydh, rag hi dhe dhegemmeres an aspioryon yn kres.

32Ha pandr'a lavarav moy? Rag termyn a fallsa dhymm dhe dherivas a-dro dhe Gideon, Barak, Samson, Yeftha, a-dro dhe Davydh ha Samuel ha'n brofoesi, 33neb dre fydh a fethas ruvanethow, breusi yn ewnder, degemmeres an ambosow, degea ganow lewyon, 34difeudhi nerth tanyow, skeusi rag min an kledha, gwaynya krevder yn-mes a wannder, dos ha bos galloesek yn kas, gorra luyow estren dhe'n fo. 35Benynes a dhegemmeras aga re varow dre dhasserghyans. Re a veu tormentys, ow nagha godhvos livreson may tassorghens dhe vewnans gwell. 36Re erell a wodhevis skorn ha skorjya, ha hwath kadonyow ha prisonyans. 37Labydhys vons, heskennys vons yn dew, ledhys vons dre gledha; i a gerdhi yn kreghyn deves ha gever, edhommek, duwenhes, tebeldhyghtys 38– anedha nyns o gwiw an bys – ow kwandra yn gwylvosow ha menydhyow, hag yn mogowyow ha savnow an dor.

39Hag oll an re ma, dustuniys der aga fydh, ny dhegemmersons an pyth a veu ambosys, 40drefenn Duw dhe ragweles tenkys gwell ragon, na vedhens gwrys perfydh hebon ni.