Dyskybleth an Arloedh

1Ytho, ni ynwedh, a-ban eus kommolenn mar veur a dhustunioryon a-dro dhyn, tewlyn a-denewen pub ankombrans ha pegh hag a len mar ogas, ha dre bargh, resyn an resegva yw settys a-dheragon, 2ow mires war-tu ha Yesu, awtour ha perfydhder agan fydh, rag an lowender settys a-ragdho ev neb a borthas an grows, ow tispresya an meth, ha neb re esedhas orth leuv dhyghow tron Duw.

3Prederewgh anodho neb a borthas kemmys kedrynn a beghadoryon er y bynn, ma na vowgh skwith na digolonnek. 4Yn agas strif erbynn pegh, ny omledhsowgh na hwath bys yn skoellya goes. 5Hag a ankevsowgh an ger a gonfort a gews orthowgh avel mebyon?

‘Ow Mab, na wra dispresya dyskybleth an Arloedh,

na bos digolonnek pan vi keskys ganso.

6Rag an Arloedh a gesk neb yw kerys ganso,

ha skorjya peub a dhegemmer avel mab.’

7Duryewgh yn-dann an dhyskybleth. Yma Duw orth agas dyghtya avel mebyon. Rag py mab yma na'n keredh y das? 8Mars owgh heb dyskybleth may kevrennsowgh oll ynno, nyns owgh mebyon mes bastardyon. 9Pella, ni a'gan bo tasow war-lergh an kig dh'agan keredhi ha ni a wre vri anedha. A ny vydhyn hwath moy gostydh dhe Das an spyrysyon, ha bewa? 10Rag i a'gan kessydhyas rag nebes dydhyow herwydh aga bodh, mes ev a'gan kessydh dh'agan les may kevrennyn yn y sansoleth. 11Rag a-lemmyn pub dyskybleth a hevel ken a dhuwon, a-der ken a lowena; wortiwedh y teg frut a gres hag a ewnder dhe'n re yw dyskys ganso.

12Ytho krevhewgh an dhiwdhorn ydhil ha'gas dewlin dhifreth, 13ha gwrewgh hynsyow kompes dh'agas treys, ma na vo treylys dhe-ves an pyth yw evredhek, mes kynsa bos yaghhes.

Gwarnyans erbynn Nagha Gras Duw

14Hwilewgh kres gans an dus oll ha'n sansoleth, ma na wra denvyth gweles an Arloedh hebdhi. 15Gwaytyewgh ma na fallo nagonan a gavoes gras Duw; ma na eginno gwreydhenn hwerowder ha gul kedrynn, dredhi may teffo lies ha bos defolys; 16ma na vo nagonan plosek nag ansans avel Esaw a werthas y wir-genesik rag unn prys boes. 17Rag hwi a woer pan vynna erita an bennath, neghys veu a-wosa, rag ny gavas spas a edrega kyn y'n hwilas gans dagrow.

18Rag ny nessowgh dhe neppyth12:18 dhe neppyth a yll bos tochys: War-lergh re a'n dornskrifow dhe venydh a yll bos tochys. a yll bos tochys, tan ow tewi, ha tewlder, ha tewlwolow, ha korwyns, 19ha son an hirgorn, ha lev geryow a wra dhe'n gleworyon pysi na vo kewsys dhedha pella geryow. 20Rag ny borthsons an gorhemmynn a veu res, ‘Hwath enyval mar toch an menydh y fydh labydhys.’ 21Yn hwir, mar euthyk o an wolok may leveris Moyses, ‘Krena a wrav der own.’ 22Mes hwi re dheuth dhe venydh Sion ha sita an Duw bew, Yerusalem an nevek, ha dhe eledh dres niver yn kuntelles solem, 23ha dhe eglos an re gynsa-genys omrolys yn nev, ha dhe Dhuw, an breusydh a bup-tra, ha dhe spyrysyon tus ewnhynsek gwrys perfydh, 24ha dhe Yesu, mayn an kevambos nowydh, ha dhe'n goes skoellys a gews tra well ages goes Abel.

25Gwaytyewgh na'n nagghewgh neb a gews. Rag mar ny wrussons an re na dhiank pan naghsons neb a's gwarnyas war an nor, hwath dhe le y hwren ni diank anodho neb a'gan gwarn a nev. 26Ena y lev a wrug dhe'n dor krena; mes lemmyn ev re ambosas, ow leverel, ‘Unnweyth moy ny wrav unnsel an nor dhe dhegrena mes an nev ynwedh.’ 27An lavar ma, ‘Unnweyth moy’, a dhiskwa treuskorrans an pythow yw kryghyllys, henn yw an pythow re beu gwrys, may pessyo an pythow na yll bos kryghyllys. 28Ytho godhvydhyn gras a dhegemmeres ruvaneth na yll degrena, ha rakhenna profyn dhe Dhuw gordhyans plegadow yn revrons hag agha; 29rag agan Duw yw tan a gowllesk.