An Selwyans Meur

1Rakhenna y tegoedh dhyn koela dhe voy orth an traow yw klewys, ma nag ellen gans an liv. 2Rag mars o fyrv an ger kewsys gans an eledh, ha mar tegemmeri pub kammweyth po diwostytter attal ewn, 3fatell wren ni diank mar ny wren vri a selwyans mar veur? Derivys veu yn kynsa der an Arloedh, ha dustuniys dhyn gans an re a'n klewas, 4ha Duw a dhustunias ynwedh der toknys ha dre varthusyon ha dre wriansow nerthek a bub eghenn ha dre rohow an Spyrys Sans rynnys herwydh y vodh y honan.

Pennsevik Selwyans

5Rag ny veu yn-dann eledh y hworras Duw an bys dhe dhos, hag anodho dell gewsyn. 6Destys yw yn neb le,

‘Pyth yw den may perthydh kov anodho,

po mab den ma'n gwithydh?

7Ty a'n gwrug rag termyn nebes isella ages an eledh,

ty re'n kurunas gans golewder hag enor,

8ow korra pup-tra yn gostytter yn-dann y dreys.’

Rag, dre worra pup-tra yn gostytter dhodho, ny asas travyth diwostydh dhodho. Rag lemmyn, ny welyn hwath pup-tra dhe vos gostydh dhodho. 9Mes ni a wel Yesu, neb a veu gwrys nebes isella ages an eledh, lemmyn kurunys gans golewder hag enor dre wodhevel mernans, may tastya mernans rag pub huni, dre ras Duw.

10Rag yth o gwiw ev, mayth usi pup-tra yn few ragdho ha dredho, ow tri lies mab dhe glori, dhe wul awtour aga selwyans perfydh dre wodhevel. 11Rag ev neb a sansha, ha'n re yw sanshes, yw oll a'n unn devedhyans. Henn yw prag na'n jeves meth dh'aga gelwel breder, 12ow leverel,

‘My a dheriv dha hanow dhe'm breder,

yn mysk an kuntelles my a'th wormel.’

13Hag arta,

‘My a vynn gorra ow fydhyans ynno.’

Hag arta,

‘Ottavy ha'n fleghes re ros dhymm Duw.’

14Ytho, a-ban gemmeras an fleghes rann yn kig ha goes, ev y honan a gevrennas a'n keth traow, may tistrua, dre vernans, neb a'n jeves galloes mernans, henn yw, an jowl, 15ha delivra an re oll neb a berthi kethneth, der own a vernans, der aga bewnans oll. 16Rag yn tevri nyns yw y breder a-dro dhe'n eledh, mes a-dro dhe has Abraham. 17Ytho, y tegoedhva dhodho bos haval dh'y vreder yn pub tremmynn, mayth ella ha bos arghoferyas tregeredhus ha lel yn gonis Duw, dhe wul dehwelyans rag peghosow an bobel. 18Rag drefenn ev y honan dhe wodhevel ha bos temptys, ev a yll gweres dhe'n re a vydh temptys.