1Ytho, ha'n ambos hwath gesys dhe entra dh'y bowesva, perthyn own na vo nagonan ahanowgh breusys a fyllel dh'y attaynya. 2Rag devri an nowodhow da a dheuth dhyn ni par dell wrug dhedha i ynwedh; mes an negys a glewsons, ny veu dh'aga les, drefenn na vons kesunys yn fydh gans an re a glewas.4:2 drefenn na vons kesunys yn fydh gans an re a glewas: War-lergh re a'n dornskrifow drefenn na gavas fydh y'n re a glewas. 3Rag ni, re gryssyn, a dheu a-ji dhe'n bowesva, dell leveris,

‘Dell wrugavy ti y'm sorr,

“Ny wrons entra y'm powesva” ’,

kyn feu gorfennys y oberow a-dhia wrians an bys. 4Rag ev re gewsis yndellma yn neb le a-dro dhe'n seythves dydh, ‘Ha Duw a bowesas y'n seythves dydh a'y oberow oll.’ 5Hag arta y'n tyller ma, y leveris, Nevra ny dhons a-ji dhe'm powesva. 6A-ban yw gesys ytho rag re dhe entra ynni, ha'n re a dhegemmeras an nowodhow da seulabrys a fyllis entra drefenn diwostytter, 7arta ev a sett neb unn jydh, ‘Hedhyw’, ow leverel dre Davydh wosa termyn mar hir y'n geryow devynnys kyns,

‘Hedhyw, pan glewowgh y lev,

na galeshewgh agas kolonn.’

8Rag mar rolla Yoshua powes dhedha, ny gowssa Duw a-wosa a gen dydh. 9Ytho yma powes an sabot gesys hwath rag pobel Duw; 10rag piwpynag a dheffo a-ji dhe bowesva Duw, henna a hedh a'y oberow, dell wrug Duw a'y oberow ev. 11Bedhes mall genen ytho a entra y'n bowesva na, ma na goettho nagonan dre dhiwostytter a'n keth par.

12Rag ger Duw yw effeythus ha lymma ages pub kledha dewvinyek, ow kwana erna ranno enev ha spyrys, mellow ha mer, hag a yll breusi tybyansow ha mynnas an golonn. 13Hag a-ragdho ev, nyns yw kudhys kreatur vyth, mes oll yw noeth hag igor dh'y dhewlagas ev, may tal dhyn gul akont dhodho.

Yesu an Arghoferyas Meur

14Ytho, a-ban y'gan beus arghoferyas meur re dremenas der an nevow, Yesu, Mab Duw, synsyn fast agan professyans. 15Rag ny'gan beus arghoferyas na yll keskodhevel gans agan gwannder, mes onan neb re beu temptys avelon yn pub tremmynn, heb pegha hogen. 16Nesyn ytho gans fydhyans dhe'n tron a ras, may tegemmerryn tregeredh ha kavoes gras dhe weres yn termyn edhomm.