1Rag pub arghoferyas dewisys yn mysk tus yw ordenys dhe weythres a-barth tus yn servis Duw, dhe brofya rohow ha sakrifisow rag peghosow. 2Ev a yll dyghtya yn hwar an re yw heb godhvos ha kellys yn aga fordh, drefenn y vos y honan settys a-dro gans gwannder. 3Ha rakhemma, y tegoedh dhodho offrynna sakrifis rag peghosow ragdho ev y honan keffrys ha'n bobel. 4Ha ny omgemmer denvyth an enor ragdho y honan, marnas ev a veu gelwys gans Duw, par dell veu Aron.

5Ytho ynwedh, ny wrug Krist omughelhe dhe vos gwrys arghoferyas, mes y feu res dhodho ganso ev neb a leveris dhodho,

‘Ty yw ow Mab,

hedhyw my re'th tineythis’;

6par dell lever ynwedh yn ken le,

‘Ty yw oferyas bys vykken,

war-lergh ordyr Melkisedek.’

7Yn dydhyow y gig, Yesu a brofyas pysadow ha govynnadow, gans kriow ughel ha dagrow, dhe neb a ylli y dhelivra dhiworth mernans hag ev a veu klewys drefenn y own a Dhuw. 8Kynth o Mab, ev a dhyskas gostytter der an pyth a wodhevis; 9ha wosa bos gwrys perfydh, y teuth ha bos fenten a selwyans bys vykken dhe beub yw gostydh dhodho, 10wosa bos henwys gans Duw arghoferyas war-lergh ordyr Melkisedek.

Gwarnyans erbynn Koedha dhe Denewen

11A-dro dhe hemma, ni a'gan beus meur dhe leverel yw kales dhe styrya, rag hwi dhe vos lent agas diwskovarn. 12Rag kyn talvia dhywgh bos dyskadoryon erbynn an termyn ma, edhomm a'gas beus nebonan dhe dhyski dhywgh an kynsa elvennow a lavarow Duw. Edhomm a'gas beus a leth, yn le boes kales; 13rag pubonan neb a gevrenn a leth yw heb prevyans y'n ger a ewnder, rag ev yw fleghik. 14Mes boes kales yw rag an devesigyon, rag an re a's teves kowses dyskys dre usadow dhe dhissernya yntra da ha dhrog.