1Yndellma, gesyn dyskasow elvennek Krist ha mos yn-rag dhe berfydhder, heb gorra a-nowydh an selven a dreylya yn edrega dhiworth oberow marow hag a fydh war-tu ha Duw, 2gans dyskans a-dro dhe vesydhyansow, gorrans diwleuv, dasserghyans an re varow, ha breus bys vykken. 3Hag yndella ni a wra, mar mynn Duw. 4Rag ny yllir daskorr arta dhe edrek an re re beu unnweyth enowys, re dastyas an ro nevek ha re dheuth ha bos kevrennoryon a'n Spyrys Sans, 5ha re dastyas dader ger Duw ha gwriansow nerthek a'n oes dhe dhos, 6hag ena y koedhsons a-denewen, rag i a grows Mab Duw arta ragdha i aga honan ha gul bismer dhodho. 7Rag tir re evas an glaw a goedh menowgh warnodho, hag a dhre yn-rag losow dhe les dhe'n re ragdha y feu gonedhys, a dhegemmer bennath Duw. 8Mes mar tre yn-rag spern hag askall yth yw heb les hag ogas milliges; ha leski vydh y dhiwedh.

9Kyn kewsyn yndellma, yn agas kas hwi, karadowyon, surhes on a daklow gwell a dheu gans selwyans. 10Rag nyns yw Duw kammhynsek owth ankevi agas ober ha'n gerensa a dhiskwedhsowgh a'y wovis ev ow servya an syns, ha dell wrewgh hwath lemmyn. 11Mes hwans a'gan beus hwi dhe dhiskwedhes, pub huni, an keth mall dhe dhrehedhes dhe leun surneth a wovenek bys y'n diwedh 12ma na vowgh syger mes holyoryon an re a erit, dre fydh ha perthyans, an ambosow.

Ambos Duw

13Rag pan wrug Duw ambosa dhe Abraham, a-ban na'n jevo denvyth brassa dredho may hylli ti, ev a dos dredho y honan, 14ow leverel, ‘Yn tevri my a'th vennik ha'th palshe.’ 15Hag yndellma wosa perthi hirneth, ev a dhegemmeras an ambos. 16Rag tus a de der onan moyha agessa i aga honan, hag yn aga hedrynnow oll, ti res yn afydhyans yw diwedh pub dadhel. 17Ytho, pan vynnas Duw diskwedhes dhe glerra dhe eryon an ambos gnas antreylyadow y dowl, ev a'n fastyas gans ti 18may fen kennerthys yn krev, pan fiyn rag skovva, dhe dhalghenna an govenek gorrys a-ragon, dre reson dew dra na yll Duw gowleverel ynna. 19Hemma y'gan beus avel ankor an enev, sur ha fast, govenek a enter an barth a-bervedh, a-ji dhe'n vayl, 20le mayth eth Yesu avel ragreser ragon ni, wosa dos ha bos arghoferyas bys vykken war-lergh ordyr Melkisedek.