Ordyr Melkisedek

1Rag an ‘Melkisedek ma, myghtern Salem, oferyas Duw an Ughella, a dheuth erbynn Abraham ow tehweles a-dhiworth ladhva an vyghternedh, ha'y venniga’; 2ha dhodho Abraham a gevrennas ‘degves rann a bup-tra.’ Ev yw kynsa, dre dreylyans y hanow, ‘myghtern ewnder’, hag ena ynwedh, myghtern Salem, henn yw ‘myghtern kres.’ 3Ev yw heb tas na mamm nag aghskrif ha ny'n jeves na dallethvos dydhyow na diwedh bewnans, mes, haval dhe Vab Duw, ev a bes yn oferyas bys vykken.

4Mir ha meur yw! Abraham an ugheldas ynwedh a ros dhodho dega a'n preydh. 5Ha'n vebyon na a Levi, neb a dhegemmer an soedh a oferyas, a's teves gorhemmynn an lagha dhe gemmeres dega a'n bobel, henn yw a'ga breder, kynth yw an re ma ynwedh a dhiwglun Abraham. 6Mes an den ma, na veu sevys a'ga linyeth, a dhegemmeras dega a Abraham, ha'y venniga ev, neb a'n jevo an ambosow. 7Ha heb kontradia, neb yw le yw bennigys gans neb yw gwell. 8Y'n eyl kas dega yw degemmerys gans tus varwel; y'n kas arall, gans onan, a neb yw destys anodho ev dhe vos yn few. 9Yn ken lavarow, Levi y honan, neb a dhegemmer degow, a dyli degow dhe Abraham, 10rag hwath yth esa yn diwglun y das pan dheuth Melkisedek er y bynn.

11Ytho, mar teuth perfydhder der oferyaseth leviek (rag yn-danno an bobel a dhegemmeras dega an lagha), ena pana edhomm eus a gen oferyas dhe sevel war-lergh ordyr Melkisedek, a-der war-lergh ordyr Aron? 12Rag pan vo chanj yn oferyaseth, yma res a janj y'n lagha ynwedh. 13Rag neb anodho y kewsir an traow ma, a dheuth a gen loeth, ha ny servyas nagonan anodho orth an alter. 14Rag pur gler yw y sevis agan Arloedh a Yuda hag a'n loeth na ny leveris Moyses travyth a-dro dhe oferysi. 15Ha klerra hwath yw pan saffo ken oferyas yn hevelep Melkisedek 16neb na dheuth ha bos oferyas herwydh edhomm an lagha a-dro dhe'n kig, mes dre nerth bewnans andhistruadow. 17Rag dustuniys yw,

‘Ty yw oferyas bys vykken,

war-lergh ordyr Melkisedek.’

18A'n eyl dorn, gorhemmynn koth yw settys a-denewen rag y vos gwann ha heb les 19(rag ny wrug an lagha travyth perfydh); a'y gila, govenek gwell yw dres, dredho may dheun nes dhe Dhuw.

20Ha nyns o heb ti. Re erell a dheuth ha bos oferysi heb ti, 21mes neb a veu gwrys oferyas gans ti – Duw a leveris dhodho,

‘An Arloedh re dos

ha ny vynn treylya y vrys,

“Ty yw oferyas bys vykken.7:21 bys vykken: War-lergh re a'n dornskrifow bys vykken war-lergh ordyr Melkisedek.” ’

22Hemma a wra Yesu an mewghyer a gevambos gwell. 23An oferysi kyns o lies aga niver, drefenn aga bos lettys dre vernans a besya yn aga oferyaseth; 24mes ev a syns y soedh bys vykken, rag ev dhe besya bys vykken. 25Yndellma, ev a yll selwel, rag oll termyn, an re a nes dhe Dhuw dredho, rag ev a vew prest dhe bysi ragdha.

26Rag gwiw o bos dhyn arghoferyas a'n par na, sans, divlam, andhefolys, diberthys a'n beghadoryon, ughelhes a-ugh an nevow. 27Ny'n jevo edhomm, avel an arghoferysi na, a offrynna sakrifis pub-dydh, kynsa rag y beghosow ev hag ena rag peghosow an bobel; ev a wrug hemma unnweyth pan omoffrynnas y honan. 28Rag an lagha a orden tus yn aga gwannder avel arghoferysi, mes ger an ti, hag a dheuth diwettha ages an lagha, a apoynt Mab re beu gwrys perfydh bys vykken.