Sentri an Nor ha Sentri Nev

1Lemmyn, hwath an kynsa kevambos a'n jevo ordenansow rag gordhyans ha sentri y'n bys. 2Rag tabernakel a veu pareusys, an onan war-ves, hag ynno an kantoler ha'n voes ha ragworrys torthow an wolok – hemm yw henwys an Sentri; 3hag a-dryv an nessa kroglenn9:3 an nessa kroglenn: Henn yw an kroglenn ynter an klos ha'n tabernakel. y sev tabernakel – hemm yw henwys Sans a'n Sansow – 4a'n jevo ynno an alter owrek a ynkys hag argh an kevambos kudhys pub tenewen gans owr, hag ynni seth owrek a synsi an manna, ha gwelenn Aron hag a eginas, ha leghennow an kevambos; 5a-ughto yth esa cherubim an golewder ow korskeusi an dregeredhva. A'n traow ma nyns eus lemmyn kewsel yn funys.

6An darbarow ma gwrys yndellma, yth a an oferysi pup-prys y'n kynsa tabernakel rag gul aga gwasonieth; 7mes a-ji dhe'n nessa, nyns a marnas an arghoferyas, hag ev marnas unnweyth y'n vlydhen, ha nyns a heb kemmeres goes hag a offrynn ragdho y honan, ha rag peghosow an bobel gwrys dre wall. 8Yndellma an Spyrys Sans a dhiskwa nag yw igerys hwath fordh dhe'n sentri, hedre vo an kynsa tabernakel hwath ow sevel 9(hag yw parabolenn rag an oes a-lemmyn). Herwydh hemma, rohow ha sakrifisow yw offrynnys na yllons perfydhhe kowses an gordhyer, 10marnas dyghtya boes ha diwes hag omwolghans liesek, ordenansow an kig, gorrys warnedha bys termyn dasfurvyans.

11Mes pan omdhiskwedhas Krist avel arghoferyas an traow mas dhe dhos,9:11 dhe dhos: War-lergh re a'n dornskrifow a dheu. ena der an tabernakel moyha ha perfyttha (na veu gwrys gans leuv, henn yw nag yw a'n kreasyon ma) 12ev a entras, unnweyth rag oll, dhe'n tyller sans le na gemmeras goes gever na leughi, mes y woes y honan, yndellma ow kavoes daspren bys vykken. 13Rag mar kyll goes gever ha terewi, ha lusu lejek skoellys war dus dhefolys, sanshe dhe lanheans an kig, 14pygemmys moy y hwra goes Krist, neb a omoffrynnas heb namm dhe Dhuw der an Spyrys nevra a dhur, golghi agas9:14 agas: War-lergh re a'n dornskrifow agan. kowses dhiworth oberow marow dhe servya an Duw bew.

15Yndella ev yw mayn an kevambos nowydh, may hwrello an re yw gelwys degemmeres an eretons ambosys bys vykken, a-ban mernans dhe hwarvos rag aga daspren a'n peghadow yn-dann an kynsa kevambos. 16Rag pan vo kemmynnskrif, mernans an kemmynner a dal bos prevys. 17Rag kemmynnskrif ny dhalleth kyns mernans, rag nevra ny'n jeves fors hedre vo bew neb a'n gwrug. 18Yndella, hwath ny veu an kynsa kevambos gwrys heb goes. 19Rag pan veu leverys gans Moyses pub gorhemmynn a'n lagha dhe'n bobel oll, ev a gemmeras goes leughi ha gever, gans dowr ha gwlan kogh ha hyssop, ha skoellya goes ha war an lyver y honan ha war an bobel oll, 20ow leverel, ‘Ottomma goes an kevambos a worhemmynnis Duw dhywgh.’ 21Ha war an tabernakel ha'n lestri oll devnydhys yn gordhyans ev a skoellyas goes keffrys. 22Yn hwir, herwydh an lagha ogas pub tra yw glanhes gans goes, ha heb skoellya goes ny vydh dehwelyans peghosow.

Pegh Dileys der Sakrifis Krist

23Ytho y feu res, a'n unn tu, bos glanhes toknys an traow nevek y'n gis ma, mes an traow nevek aga honan gans sakrifisow gwell ages an re ma. 24Rag nyns yw a-ji dhe sentri gwrys gans leuv, tokyn an gwir sentri, mayth entras Krist, mes a-ji dhe nev y honan, lemmyn dhe omdhiskwedhes ragon a-rag fas Duw. 25Ha nyns o dhe omoffrynna menowgh, par dell enter an arghoferyas a-ji dhe'n Tyller Sans pub blydhen gans goes dhiworth re erell; 26rag ena y tegoedhvia dhodho godhevel menowgh a-dhia wrians an bys. Mes lemmyn ev re omdhiskwedhas unnweyth, dhe dhiwedh an oesow, ha dilea peghosow der omsakrifia. 27Ha poran dell yw ordenys dhe dus merwel unnweyth, ha wosa henna breus, 28yndellma Krist, wosa bos offrynnys unnweyth dhe berthi peghosow lies huni, a wra omdhiskwedhes rag nessa gweyth, na vydh rag dilea pegh, mes rag selwyans dhe'n re a wra y waytyas gans mall.