Peghes Ysrael ha'y Gethneth

1Ysrael yw gwinbrenn lies-skorrek, a dheg frut pals. Dhe voy y frut, dhe voy y kressyas an alteryow;

dhe voy dader y dir, dhe voy y hwrussons peulveyn teg.

2Aga holonn yw fals; lemmyn i a berth an kessydhyans a'ga offens.

Ev a wra dralya aga alteryow, ha distrui aga feulveyn.

3Lemmyn i a lever, ‘Ny'gan beus myghtern

drefenn na berthsyn own a'n Arloedh.

Mes pandr'a yll myghtern gul ragon?’

4I a gews geryow, ow kowlia,

ow kul kevambos;

ha breus a egin avel kegis

yn fynnglow an gwel.

5Annedhysi Samaria a wra drem

war leugh Beth-aven.

Hy fobel a gyn warnodho,

ha'y oferysi a oel war y wolewder,

rag ev a vydh divres dhiworti.10:5 Amendys.

6Ev ynwedh a vydh dres dhe Assyria

avel ro dhe'n myghtern meur.

Efraym a'n jevydh meth,

hag Ysrael a vydh methek a'y gusul.

7Samaria ha'y myghtern a vydh degys dhe-ves

avel barrenn war enep an dowr.

8Tylleryow ughel Aven, pegh Ysrael,

a vydh distruys.

Spern hag askall a dyv

dres aga alteryow.

Ena yn-medhons dhe'n menydhyow, ‘Gorherewgh ni’,

ha dhe'n brennow, ‘Koedhewgh warnan ni.’

9A-dhia dhydhyow Gibea y peghsys, a Ysrael;

ena y sevsons. A ny wrug bresel drehedhes dhe'n dhrogoberoryon yn Gibea?

10My a wra aga hessydhya pan mynnav,10:10 Po amendyans My a dheu ha'ga hessydhya.

ha kenedhlow a vydh kuntellys er aga fynn,

pan vydhons kessydhys may hwrellons aga helmi rag aga hammweyth dewblek.

11Efraym yw avel lejek dyskys

a gar drushya;

mes my a worr yew war hy honna teg.

My a wra hernessya Efraym,

aras a wra Yuda,

ha Yakob a gloes.

12Hesewgh dhywgh agas honan yn ewnder,

mysewgh yn tregeredh,

hag aras gwrewgh agas gweres anerys;

prys yw dhe hwilas an Arloedh,

bys may teffo ha gul dhe wiryonedh koedha warnowgh avel glaw.

13Hwi re aras droktra,

ha mysi anewnder,

ha re dhyb'sowgh an frut a wowyow;

rag ty a drestyas y'th fordh,

yn niver bras dha gasoryon.

14Tervans a dhrehav yn mysk dha bobel,

hag oll dha gastylli a vydh distruys,

kepar dell wrug Shalman distrui Beth-arbel yn dydh an gas,

pan veu brewys an vamm gans hy fleghes.

15Yndellma y fydh gwrys dhywgh, A Bethel,

drefenn agas drogedh meur.

Orth dydh-tardh, myghtern Ysrael a vydh kisys glan.