1Kowethya a wra Efraym gans an gwyns,12:1 Kowethya a wra Efraym gans an gwyns: Po Peuri a wra Efraym war an gwyns.

ha helghya gwyns an howldrevel oll an jydh,

ha kressya gowyow ha freudh.

I a wra kevambos gans Assyria

hag olew yw degys dhe Ejyp.

Dislelder Ysrael

2An Arloedh a'n jeves dadhel gans Yuda,

hag ev a gessydh Yakob herwydh y fordhow;

ev a attal dhodho wriansow.

3Y'n brys ev a synsis y vroder er an seudhel,

hag yn y grevder ev a strivyas gans Duw.

4Ev a strivyas gans an el ha prevaylya;

ev a oelas hag a bysis favour dhiworto.

Ev a'n kavas yn Bethel,

hag ena y kewsis ganso:12:4 ganso: Ow siwya an Septuagint ha'n Syriek. Ebrow genen.

5an Arloedh, Duw an luyow,

an Arloedh yw y hanow a govadh.

6Ytho treyl dhe'th Duw,

gwith tregeredh ha breus,

ha gorta dha Dhuw pup-prys.

7An marchont a'n jeves fals vantol yn y leuv;

ev a gar toella.

8Yn-medh Efraym, ‘Yn hwir rych ov vy,

my re drovyas pythow;

yn oll ow lavur

ny gevons ynnov kammhynseth, yw pegh.’

9My re beu an Arloedh dha Dhuw

a-ban veus yn pow Ejyp;

my a'th wra arta dhe driga yn tyldow

kepar hag yn dydhyow an kuntellyans.12:9 War-lergh an Septuagint Mes my, an Arloedh dha Dhuw, a'th ledyas mes a bow Ejyp; arta my a'th wra dhe driga yn tyldow, kepar hag yn dy'goelyow.

10My re gewsis dre'n brofoesi,

ha my re ros gwelesigethow pals;

ha dre leuv an brofoesi my re gewsis yn parabolennow.

11Eus droktra yn Gilead?

Yn hwir yth yns i koegyon!

A sakrifions terewi yn Gilgal?

Aga alteryow ynwedh a vydh avel kals meyn war fynnglow an gwel.

12Yakob a fias dhe bow Aram,

Ysrael a servyas rag gwreg,

ha rag gwreg y hwithas deves.

13Ha dre brofoes an Arloedh a dhros Ysrael mes a Ejyp,

ha dre brofoes y feu gwithys saw.

14Efraym re'n sorras yn hwerow;

rakhenna y Arloedh a wra gasa warnodho y gabel-goes,

ha daskorr dhodho y geredh.