Ysrael Kuhudhys gans Duw

1Klewewgh ger an Arloedh, mebyon Ysrael,

rag yma dhe'n Arloedh ken erbynn trigoryon an tir.

Nyns eus gwiryonedh, na tregeredh,

nag aswonnvos Duw y'n tir.

2Mollethi, toella, ladha, ladra,

hag avoutri – fenna a wrons;

ha krow a hol krow.

3Rakhenna an tir a dhesygh,

ha myns eus trigys ynno a wedher,

gans bestes an gwel,

ydhyn an nevow;

ynwedh puskes an mor a wra merwel.

4Byttegyns bynner re striffyo denvyth,

ha bynner re gerettho denvyth,

rag er dha bynn yma ow hen, A oferyas.4:4 Amendys. Ebrow ha'th pobel yw kepar ha'n re a striv gans oferyas.

5Ty a drebuch dydhweyth,

an profoes ynwedh a drebuch nosweyth,

ha my a dhistru dha vamm.

6Ow fobel yw kisys drefenn fowt a skians.

Drefenn ty dhe nagha skians,

my a wra dha nagha ma na vi oferyas ragov;

drefenn ty dhe ankevi lagha dha Dhuw,

my ynwedh a wra ankevi dha vebyon.

7Dhe voy i a gressyas

dhe voy i a beghas er ow fynn;

my a dreyl aga splannder dhe veth.

8I a dheber pegh ow fobel,

ha hwansek yns dh'aga hammhynseth.

9Kepar dell vydh rag an bobel, yndella y fydh rag an oferyas;

my a wra aga hessydhya rag aga fordhow,

ha'ga gobra rag aga gwriansow.

10I a wra dybri ha ny vons lenwys;

i a dheu ha bos horys ha ny ynkressyons,

rag i dhe asa obaya dhe'n Arloedh.

Ysrael a Wordh Imajys

11Fornikasyon ha gwin ha gwin nowydh

a gemmer dhe-ves an golonn.

12Ow fobel a wovynn kusul a'ga frenn,

ha'n gwelenn a's gorthyp.

An spyrys a horyans a wra dhedha mos yn stray,

hag i a wra horyans a-dhiworth aga Duw.

13War benn an menydhyow y sakrifions,

ha war an bronnow y leskons offrynnow,

yn-dann dherwenn, hag edhlenn wynn, ha terebinthenn,

drefenn bos da aga skeus.

Ytho agas myrghes a wra fornikasyon,

ha'gas gohydhow a wra avoutri.

14Ny wrav vy kessydhya agas myrghes pan wrons fornikasyon,

na'gas gohydhow pan wrons avoutri,

rag an wer a slynk dhe-ves gans horys,

ha sakrifia gans horys-tempel:

pobel heb konvedhes a vydh diswrys.

15Kyn hwredh fornikasyon, a Ysrael,

bynner re bo Yuda kablus.

Na dhewgh hwi dhe Gilgal,

na mos yn-bann dhe Beth-aven,

na ti ‘Dell vew an Arloedh!’

16Ytho Ysrael yw gorth

avel lejek penn-kales.

Lemmyn an Arloedh a's bugel

avel oen yn pras efan.

17Efraym yw keffrysyas imajys;

gas e dhodho y honan!

18Pan yw aga gwires dhe benn,

i a vew avel horys;

yn howtyn i a gar meth.

19An gwyns a's maylyas yn hy eskelli,

hag y fydhons methek a'ga sakrifisow.