Breus a Dheu Erbynn Yuda hag Ysrael

1Klewewgh hemma, a oferysi!

Goslowewgh, chi Ysrael!

Attendyewgh, A ji an myghtern!

An vreus yw er agas pynn,

drefenn agas bos antell orth Mispa,

ha roes lesys war Tabor.

2An omsevysi yw gyllys down yn ladha.5:2 An omsevysi yw gyllys down yn ladha: Styr an Ebrow yw ankler. Amendyans: hag i re balas pytt down yn Shittim.

My a wra aga heredhi oll.

3My a aswonn Efraym,

hag Ysrael nyns yw kudhys ragov:

rag lemmyn ty re wrug fornikasyon, A Efraym,

hag Ysrael yw defolys.

4Aga gweythresow ny's gas

dhe dhehweles dh'aga Duw,

rag bos spyrys a fornikasyon yn aga mysk,

ha ny aswonnons an Arloedh.

5Goeth Ysrael a dhest er y bynn;

Ysrael hag Efraym a drebuch yn aga hammhynseth;

Yuda ynwedh a drebuch gansa.

6I a wra mos gans aga flokkys ha'ga gwarthek

dhe hwilas an Arloedh,

mes ny'n kevons;

ev re gildennas anedha.

7I re draytas an Arloedh,

ha dineythi fleghes direyth.

Lemmyn an loer nowydh a wra aga dybri

war-barth gans aga rannow a dir.

8Kenewgh an korn yn Gibea,

an hirgorn yn Rama.

Germewgh yn Beth-aven;

war dha lergh Benyamin.5:8 war dha lergh Benyamin: Po amendyans Kren, A Benyamin.

9Efraym a vydh ynyal

yn dydh an geredh.

Yn mysk loethow Ysrael

deklarya a wrav an pyth yw sur.

10Pennsevigyon Yuda re dheuth ha bos

avel an re a remov orven.

My a wra diveri warnedha

ow sorr avel dowr.

11Efraym yw arweskys, brewys yn breus,

rag plegadow veu dhodho mos war-lergh euveredh.5:11 war-lergh euveredh: Ow siwya an Septuagint ha'n Syriek. Ebrow war-lergh gorhemmynn.

12Rakhenna my a vydh avel gwenenn worek dhe Efraym,

hag avel podredhes dhe ji Yuda.

13Efraym a welas y gleves,

ha Yuda y woli,

ena Efraym eth dhe Assyria,

hag a dhannvonas dhe'n myghtern meur.

Mes ny yll agas sawya,

na yaghhe agas goli.

14My a vydh avel lew dhe Efraym,

hag avel lew yowynk dhe ji Yuda.

My, my a wra skwardya ha mones;

my a wra kemmeres, ha nagonan ny dhelirv.

15My a wra mos ha dehweles dhe'm tyller,

bys mayth aswonnons aga offens,

ha hwilas ow fas;

yn aga ahwer i a'm hwila dihwans.