1Peskweyth may fynnav sawya Ysrael,

ena kammhynseth Efraym yw diskudhys,

ha droktra Samaria.

I a wra gil,

lader a dheu,

para a raven y'n stret.

2Ny brederons yn aga holonn

my dhe govhe oll aga droktra.

Lemmyn yma aga oberow oll a-dro dhedha;

ymons dherag ow fas.

3I a heudhha an myghtern der aga droktra,

ha pennternedh der aga gowyow.

4I oll yw avoutroryon,

avel forn toemmhes gans peber,

neb a astel dhe wul dhe'n tan difuna

wosa ev dhe doesa toes, bys pan dhrehaffo.

5Yn dy'goel agan myghtern an bennternedh

a veu klav gans toemmder an gwin;

ev a ystynnas y dhiwla gans an re a wra ges.

6Rag aga holonn yw avel forn,

hag i dheu nes ow kontrewaytya;

aga sorr a gosk oll an nos;

myttin ev a dhew avel flamm a dan.

7I oll yw mar doemm avel forn,

hag i a dhevoryas aga breusydhyon.

Oll aga myghternedh re goedhas,

ha ny wra nagonan anedha gelwel warnav.

8Efraym yw kemmyskys gans an kenedhlow;

Efraym yw torth na veu treylys.

9Estrenyon re dhevoryas y nerth,

ha ny woer.

Blew loes yw lesys warnodho,

ha ny woer.

10Goeth Ysrael a dhest er y bynn,

mes ny dhehwelsons dhe'n Arloedh aga Duw,

na ny'n hwilsons, yn despit dhe henna oll.

Euver yw Trestya y'n Kenedhlow

11Efraym yw kepar ha kolomm,

gokki ha heb kolonn;

i a elow dhe Ejyp ha mos dhe Assyria.

12Hag i ow mos, my a dewl ow roes warnedha;

avel ydhyn an nevow my a's dre yn-nans.

My a's keredh pan y's klewav ow hesya.

13Go-i, rag i re fias ahanav vy!

Terroes dhedha, rag i re rebellyas er ow fynn!

My a's dasprenas

hag i a wowleveris er ow fynn.

14Ny garmsons dhymm yn aga holonn,

hag i ow kyni war aga gweli.

I a omhakkyas rag greun ha gwin nowydh,

ha kildenna a-dhiworthiv vy.

15My a nerthas ha krevhe aga diwvregh,

mes i a breder dhe wul droktra er ow fynn.

16Treylya a wrons – a-der war-vann;

avel gwarak lows yns i.

Aga fennsevigyon a goedh der an kledha

drefenn anvri aga thaves.

Yndella tus a wra ges anedha yn gwlas Ejyp.