1Go-i neb a wra ordenansow kammhynsek,

ha'n skriforyon neb a skrif laghys anewn,

2dhe dreylya dhe-ves an edhommogyon dhiworth aga gwiryow,

ha dhe ladra gwirvreus dhiworth boghosogyon ow fobel,

rag may fo gwedhwesow aga freydh,

ha may pyllons omdhivasow.

3Pandr'a wrewgh yn dydh kessydhyans,

hag y'n annawel a dheu a bellder?

Piw y poenyowgh dhodho rag gweres,

ha ple hwrewgh gasa agas golewder,

4ma na blattyowgh yn mysk an brisnoryon,

na koedha yn mysk an re ledhys?

Yn despit dhe oll hemma ny dreylyas y sorr,

ha'y leuv yw hwath ystynnys.

Breus erbynn Assyria Valgh

5Ogh, Assyria, gwelenn ow sorr!

an fust yn aga leuv yw ow honnar.

6My a'n dannvon erbynn kenedhel ansans,

hag erbynn pobel ow sorr my a'n gorhemmynn,

dhe bylla, ha dhe dhalghenna preydh,

dh'aga threttya avel leys an stretys.

7Mes nyns yw hemma y vodh,

na ny breder y golonn yndella;

mes yma yn y golonn dhe distrui

ha dhe dreghi dhe-ves kenedhlow nag yns nebes.

8Rag yn-medh ev,

‘A nyns yw oll ow fennsevigyon myghternedh?

9A nyns yw Kalno avel Karkemish?

A nyns yw Hamath avel Arpad?

A nyns yw Samaria avel Damaskus?

10Kepar dell wrug ow leuv kavoes gwlaskordhow an idolys,

may feu aga imajys gravys moy es imajys Yerusalem ha Samaria,

11a ny wrav dhe Yerusalem ha'y idolys kepar dell wrug vy dhe Samaria ha'y imajys?’

12Ytho pan dhiwedh an Arloedh oll y ober war venydh Sion hag yn Yerusalem, my a gessydh frut kolonn goethus myghtern Assyria, ha balghder y dhewlagas howtyn. 13Rag yn-medh ev,

‘Dre nerth ow leuv re'n gwrug vy,

ha der ow furneth, rag bos genev konvedhes.

My re removas oryon poblow,

ha ravna aga thresorvaow,

ha dri rewloryon dhe'n dor avel kasor nerthek.

14Ow leuv re gavas, avel neyth,

rychys an poblow;

ha kepar dell guntellir oyow forsakys,

yndella my re guntellas oll an norvys;

nagonan ny wayas askell

na igeri y anow, na gryllya.’

15A wra an voel bostya erbynn an den a dregh ganso?

A wra an heskenn braggya erbynn an den a heskenn gensi?

Kepar ha pan wrello gwelenn shakya an den a wra y handla,

po lath drehevel neppyth nag yw prenn!

16Rakhenna an Arloedh, Arloedh an luyow,

a dhannvon kleves gwastyans yn mysk y gasoryon gorfek,

hag yn-dann y wolewder loskvann a vydh enowys

avel an losk a dan.

17Golow Ysrael a vydh avel tan,

ha'y Sans avel flamm;

hag ev a lesk ha devorya

y spedhas ha'y spern yn unn jydh.

18Splannder y goes ha'y dir feyth

ev a dhistru, enev ha korf war-barth,

kepar dell wra den klav gwastya dhe-ves.

19Remenant gwydh y goes a vydh mar skant

bys may hallo flogh aga nivera.

Remenant Ysrael a Dhehwel dhe Dhuw

20Y'n jydh na remenant Ysrael, ha'n re a skapyas dhiworth chi Yakob, ny besyons na fella kregi war an den a's gweskis, mes i a greg war an Arloedh, Sans Ysrael. 21Remenant a dhehwel, remenant Yakob, dhe'n Duw galloesek. 22Kyn fydh dha bobel Ysrael avel tewes an mor, unnsel remenant anedhi a dhehwel. Kollva yw erghys, ow fenna gans ewnder. 23Rag an Arloedh, Duw an luyow, a wra distruyans leun, dell veu ordenys, yn kres oll an tir.

24Rakhenna yndellma y lever an Arloedh, Duw an luyow: Ow fobel, trigys yn Sion, na borth own a Assyria neb a'th wysk gans gwelenn, ha drehevel y lorgh er dha bynn, dell wrug Ejyp. 25Yn pols pur vyghan sorrvann er agas pynn a worfenn, ha'm sorr a dreyl dh'aga distruyans i. 26Arloedh an luyow a wra dhe skorja difuna er aga fynn, kepar dell weskis Midyan orth karrek Oreb, ha'y lorgh a vydh war an mor, kepar hag yn Ejyp. 27Y'n jydh na y vegh a vydh drehevys a-dhiwar dha skoedh, ha'y yew a-dhiwar dha gonna.

Ev res eth yn-bann dhiworth Rimmon,10:27 Ev res eth yn-bann dhiworth Rimmon: Amendys.

28ev re dheuth dhe Ayath;

ev re dremenas dre Migron;

yn Mikmash ev a settyas y fardellow yn-nans.

29Ev re dremenas an bolgh,

yn Geba ev a wodrigas dres nos;

Rama a gren,

Gibea a Sowl re fias.

30Kri yn ughel, myrgh Gallim!

Goslow, Laysha!

Gorthyp dhedhi, Anathoth!

31Madmena a fi,

annedhysi Gebim a hwila skovva.

32Poran an jydh ma ev a worta yn Nob

ha shakya y dhorn

erbynn menydh myrgh Sion,

erbynn brenn Yerusalem.

33Otta, an Arloedh, Arloedh an luyow,

a skether an skorrennow dre nerth euthyk;

an gwydh meur aga ughelder a vydh treghys yn-nans,

ha'n re hir a vydh uvelhes.

34Ev a hakk prysk an koes dhe'n dor gans horn;

Lebanon gans y gwydh krev a goedh.