Skorrenn Yesse

1Egin a dheu yn-mes dhiworth kyf Yesse,

ha skorrenn a dyv dhiworth y wreydh.

2Spyrys an Arloedh a bowes warnodho,

spyrys furneth ha konvedhes,

spyrys kusul ha nerth,

spyrys skians hag own an Arloedh.

3Y dhelit a vydh yn own an Arloedh.

Ny vreus herwydh golok y dhewlagas,

nag ervira herwydh klewans y dhiwskovarn;

4mes ev a vreus an edhommogyon gans ewnder,

hag ervira gans ewnder rag boghosogyon an norvys.

Ev a wysk an norvys gans gwelenn y anow,

ha gans spyrys y dhiwweus ev a ladh an tebelwas.

5Ewnder a vydh grogys y dhiwglun,

ha lenduri grogys y gres.

6An bleydh a drig gans an oen,

ha'n lewpard a wrowedh gans an mynn,

an leugh ha'n lew yowynk ha'n lodhen peskys war-barth;

ha mab byghan a's led.

7An vugh ha'n ors a beur,

aga re yowynk a wrowedh war-barth;

ha'n lew a dheber kala' avel an ojyon.

8Gwari a wra an flogh ow tena war doll an nader,

ha'n flogh didhenys a worr y leuv war neyth an sarf.

9Ny wrons dregynn na ny dhistruons

yn oll ow menydh sans;

rag an norvys a vydh leun a wodhvos an Arloedh

dell wra an dowrow kudha an mor.

Sion a Vydh Dasprenys

10Y'n jydh na gwreydhenn Yesse a sev avel baner dhe'n poblow; an kenedhlow a'n hwila, ha'y bowesva a vydh gloryus. 11Y'n jydh na an Arloedh a ystynn y leuv an nessa gweyth dhe dhaskavoes remenant y bobel yw gesys, dhiworth Assyria, dhiworth Ejyp, dhiworth Pathros, dhiworth Ethiopia, dhiworth Elam, dhiworth Shinar, dhiworth Hamath, ha dhiworth ynysow an mor.

12Ev a dhrehav baner rag an kenedhlow

ha kuntell divresow Ysrael,

ha dri war-barth an re skattrys a Yuda

dhiworth peswar korn an norvys.

13Avi Efraym a dhiberth,

hag eskerens Yuda a vydh treghys dhe-ves;

Efraym ny berth envi a Yuda,

ha Yuda ny arvedh Efraym.

14I a nij yn-nans war skoedh an Filistysi yn howlsedhes;

war-barth i a byll mebyon an howldrevel.

I a ystynn aga leuv erbynn Edom ha Moab,

ha an Ammonysi a vydh aga sojets.

15An Arloedh a rann

taves mor Ejyp;

ev a wev y leuv war an avon

gans nerth y wyns,

ha'y gweskel yn seyth stredh

rag may treusser yn sandalyow;

16y fydh fordh-veur dhiworth Assyria

rag remenant y bobel yw gesys,

kepar dell veu rag Ysrael

y'n jydh mayth yskynnas yn-mes a bow Ejyp.