Profoesans a-dro dhe Babylon

1Profoesans a-dro dhe Babylon, a wrug Ysay mab Amos y weles.

2War venydh moel drehevewgh baner,

kriewgh yn ughel dhedha;

gwevyewgh leuv rag may teffons

yn yetys an ugheloryon.

3My re worhemmynnis dhe'm re sanshes,

ynwedh my re elwis ow breselysi dhe gowlwul ow sorr,

an re a vost y'm meuredh.

4Son routh y'n menydhyow,

haval dhe bobel vras;

son tervans gwlaskordhow,

kenedhlow kuntellys war-barth:

yma Arloedh an luyow ow kuntell lu rag bresel.

5I a dheu a dir pell, dhiworth pennow nev,

an Arloedh hag arvow y sorrvann,

dhe dhistrui an norvys oll.

6Oulyewgh, rag ogas yw dydh an Arloedh;

kepar ha terroes dhiworth an Ollgalloesek.13:6 an Ollgalloesek: Ebrow El Shadday.

7Rakhenna pub leuv a vydh gwann,

ha'n golonn a bub den a deudh.

8I a vydh dyegrys,

gloesow ha keudh a's kemmer,

i a vydh yn angoes kepar ha benyn ow tineythi.

I a vir gans marth an eyl orth y gila,

aga fasow a vydh avel flammow.

9Otta, dydh an Arloedh a dheu,

fell, gans konnar ha sorr fers,

dhe wul an tir ynyal

ha distrui peghadoryon dhiworto.

10Rag ster an nevow ha'ga Orionow13:10 Orionow: Henn yw Orion gans y sterennow erell. ny rons aga golow.

An howl a vydh tewl pan dhrehav,

ha'n loer ny wra dh'y loergann splanna.

11My a gessydh an norvys rag y dhroktra,

ha'n debeles rag aga sherewynsi.

My a wra dhe woeth an re orgelus sessya,

hag uvelhe balghder turans.

12My a wra gour moy drudh ages owr pur,

ha den ages owr a Ofir.

13Rakhenna my a wra dhe'n nevow krena,

ha'n norvys a vydh shakys dhiworth y le,

yn konnar Arloedh an luyow,

yn dydh y sorr fers.

14Kepar hag ewik ownekhes,

ha kepar ha deves heb denvyth dh'aga huntell,

peub a dhehwel dh'y bobel, peub a fi dh'y dir y honan.

15Piwpynag a vo kevys a vydh gwanyes,

ha piwpynag a vo kechys a goedh der an kledha.

16Aga fleghes a vydh hakkys dhe demmyn

a-rag aga dewlagas;

aga chiow a vydh ravnys

ha'ga gwragedh defolys.

17Otta, my a dhifun an Medys er aga fynn,

na wrons vri a arghans,

ha ny hwansons owr.

18Aga gwaregow a vrew gwer yowynk;

ny gemmerons truedh a frut an brys;

ny vir aga lagas gans piteth war fleghes.

19Babylon, splannder gwlaskordhow,

glori a woeth an Kaldeanys,

a vydh avel Sodom ha Gomorra

pan wrug Duw aga domhwel.

20Ny vydh annedhys nevra,

ha ny drig denvyth ynni a henedh dhe henedh;

ny sett Arabyon aga thyldow13:20 ny sett Arabyon aga thyldow: Po ny gyv Arabyon gwiryow peuri. ena,

ha ny wra bugeledh greow dhe bowes ena.

21Mes bestes gwyls a wrowedh ena,

hag oulys a lenow hy chiow;

strusyow a drig ena,

ha boghes a derlemm13:21 boghes a derlemm: Pojevanow a dhons. ena.

22Keun a oul yn hy thouryow,

hag owrgeun y'n palesyow fethus.

Yma hy thermyn ow tos nes,

ha ny vydh hy dydhyow delatys.