Profoesans a-dro dhe Moab

1Profoesans a-dro dhe Moab:

Ar yn Moab yw gwastys,

distruys yn unn nos.

Kir yn Moab yw gwastys,

distruys yn unn nos.

2Dibon re yskynnas dhe'n tempel,

dhe'n tylleryow ughel dhe oela;

war Nebo ha war Medeba

Moab a oul.

War bub penn yma bloghter,

ha treghys yw pub barv.

3Y'n stretys i a omwrogys gans yskar;

war an tohow hag y'n plenys

pubonan a oul, owth oela dagrow.

4Heshbon hag Eleale a gri,

aga lev yw klewys bys Yahas.

Rakhenna soudoryon Moab a arm,

ha'ga enev a gren.

5Ow holonn a gri rag Moab;

hy fowesigyon a fi bys Soar,

bys Eglath-shelishiya.

Yth ons yn-bann owth oela

war an fordh-yskynna dhe Luhith;

war an fordh dhe Horonaym

i a dhrehav garm a gollva.

6Dowrow Nimrim yw ynyal,

an gwels yw sygh, an aswels a fyll;

nyns eus glasneth na fella.

7Rakhenna an palster a waynsons

ha'n gwara a withsons

a vydh degys dhe-ves

bys yn Nans an Edhel.

8Ytho an arm res eth

oll a-dro dre dir Moab;

hy oelva a dheu bys yn Eglaym,

hy oelva bys yn Beer-elim.

9Rag dowrow Dimon yw leun a woes;

mes my a dhre hwath moy war Dimon,

lew rag fowesigyon Moab

ha rag remenant an tir.