1Dannvenewgh eyn

dhe rewler an tir

dhiworth Sela dhe'n gwylvos,

bys yn menydh myrgh Sion.

2Avel edhen ow trenija,

tewlys dhiworth an neyth

yth yw myrghes Moab

orth rysyow Arnon.

3‘Dro kusul;

gwrewgh ervirans.

Gorr dha skeus kepar ha'n nos

yn hanter-dydh;

Kudh an re skattrys,

na drayt an fowesik;

4Trigens genes

an re skattrys dhiworth Moab;

bydh skovva dhedha

rag an distruer.’

Ny vydh an arwasker na fella,

hedhi a wra an terroes,

ha'n ravner a vydh gyllys dhiworth an tir.

5Ena tron a vydh fastys yn tregeredh,

ha warnedhi yth esedh yn gwirder

yn tylda Davydh,

nebonan a vreus hag a hwila gwirvreus,

hag a fisten dhe wul ewnder.

6Ni re glewas a woeth Moab

– pur woethus yw –

a-dro dh'y valghder ha'y woeth ha'y donteth,

mes y vostow yw fals.

7Ytho Moab a oul,

i oll a oul rag Moab.

Kynewgh rag tesennow-grappys16:7 tesennow-grappys: Po ow siwya an Targum gwer. Kir-hareseth,

hwi hag yw kowldhistruys.

8Rag parkow Heshbon a wedher,

ha gwinbrenn Sibma ynwedh.

Arlydhi an kenedhlow re weskis hy gwella gwinbrennyer,

a dhrehedhas bys yn Yazer

ha gwandra troha'n difeythtir;

hy skorrennow a lesas,

ha tremena dres an mor.

9Rakhenna my a oel gans oelva Yazer

rag gwinbrenn Sibma.

My a'th towrha gans ow dagrow,

A Heshbon hag Eleale;

rag an arm war dha frutys hav

ha'th trevas re hedhis.

10Lowena ha heudhder yw kemmerys

dhiworth an tir feyth,

hag y'n gwinlannow denvyth ny gan,

na garma yn lowen;

denvyth ny drett gwin y'n gwinwaskow.

My re wrug an arm dhe hedhi.

11Rakhenna ow holodhyon a hanas avel sowtri rag Moab,

ha'm kolonn rag Kir-heres.

12Pan omdhiskwedh Moab,

hag omskwitha war an tyller ughel,

pan dheu dh'y sentri dhe bysi,

ny amont mann.

13Hemm yw an ger re gewsis an Arloedh kyns a-dro dhe Moab. 14Mes lemmyn an Arloedh a lever, Yn teyr blydhen kepar ha blydhynyow arvethesik, splannder Moab a vydh dispresys, spit dhe oll an routh vras, ha'n remenant a vydh pur vyghan ha gwann.