Profoesans a-dro dhe Damaskus

1Profoesans a-dro dhe Damaskus.

Otta, ny vydh Damaskus sita na fella,

mes y fydh kals a vagoryow.

2Sitys Aroer a vydh forsakys,

hag i a vydh rag flokkys a wrowedh

ha denvyth ny wra dhedha perthi own.

3An kastell a vydh gyllys dhiworth Efraym,

ha'n vyghterneth dhiworth Damaskus;

remenant Aram a vydh

avel glori mebyon Ysrael,

yn-medh Arloedh an luyow.

4Y'n jydh na

glori Yakob a vydh tanowhes,

ha blonek y gig a vydh lehes.

5Ev a vydh avel myser a guntell ys,

ha'y vregh a vys pennow-ys.

Ev a vydh avel den a guntell gesigow pennow-ys

yn nans Refaim.

6Mes gesigow a worta ynno,

kepar ha pan vo olewbrenn gweskys,

diw po teyr olivenn adhves orth penn an barrenn,

peswar po pymp yn y skorr feyth,

yn-medh an Arloedh, Duw Ysrael.

7Y'n jydh na den a vir orth y Wrier, ha'y dhewlagas a dreyl dhe Sans Ysrael. 8Ny vir orth an alteryow, ober y dhiwla, ha ny vir orth an Asherim ha'n alteryow ynkys a wrug y vysies.

9Y'n jydh na aga sitys krev, a vydh forsakys avel sitys an Hivysi ha'n Amorysi17:9 an Hivysi ha'n Amorysi: Amendys war-lergh an Septuagint. a assons drefenn mebyon Ysrael; hag i a vydh difeyth.

10Rag ty re ankovas Duw dha selwyans,

ha ny perthsys kov a garrek dha nerth.

Rakhenna kynth esos ow plansa plansvaow hweg

ha graffya skyll astranj;

11kyn hwredh dhedha tevi y'n jydh ma's plensydh,

ha gul dhedha bleujyowa y'n myttin ma's graffydh,

hwath an drevas a fi dhe-ves

yn dydh a galar ha payn heb remedi.

12Ogh tru, an tervans a lies pobel,

ow terva kepar ha tervans an moryow;

ha tarennans poblow kepar ha tarennans dowrow krev!

13Kenedhlow a darenn avel tarennans dowrow pals,

mes ev a's keredh hag y fions pell,

helghys avel us war an menydhyow a-rag an gwyns,

hag avel has askall a-rag an awel.

14Gorthugherweyth, awotta euth tromm!

Kyns myttin gyllys yns.

Hemm yw tenkys an re a'gan raven,

ha kevrenn an re a'gan pyll.