Profoesans a-dro dhe Ejyp

1Profoesans a-dro dhe Ejyp.

Awotta'n Arloedh ow marghogeth war gommolenn skav

hag ow tos bys yn Ejyp;

idolys Ejyp a gren a-ragdho,

ha kolonn Ejyp a deudh a-bervedh ynno.

2My a sett Ejyp erbynn Ejyp;

pubonan a vatal orth y vroder,

ha pubonan orth y gentrevek,

sita orth sita, ruvaneth orth ruvaneth.

3Spyrys Ejyp a fyll a-ji dhodho;

my a dhiswra y gusul;

i a hwila an idolys ha spyrysyon an re varow,

an nygromonsoryon ha'n goelyogyon.

4My a dhelirv Ejyp

yn leuv arlydhi fell;

myghtern fers a's rewl,

yn-medh an Arloedh, Arloedh an luyow.

5Dowr dhiworth an mor a dhesygh,

ha gweli an avon a vydh kras ha sygh.

6An dowrgleudhyow a vydh flerys,

ha kanolyow Ejyp a fyll ha sygha.

Kors ha keun a wedher;

7korsegi ryb an Nil,

orth heyl an Nil,

ha pup-tra yw hesys ryb an Nil a vydh sygh,

hag a vydh hwythys dhe-ves, ha bos gyllys glan.

8An byskadoryon a gyn,

hag oll an re a dewl higow y'n Nil a alar;

an re a les roesow war enep an mor a wannha.

9Gweythoryon gans lin kribys a vydh digolonnek,

ha'n wiadoryon a vydh gwannliwek.

10Hy gonisysi a vydh digolonnek,

oll an re a ober rag arveth a vydh grevys.

11Yn hwir, fellyon yw pennsevigyon Soan;

kusulyoryon fur Faro a re kusul gokki.

Fatell leverowgh dhe Faro,

‘Mab tus fur ov vy,

mab myghternedh goth’?

12Ytho ple'ma agas tus fur?

Leverens orthis, ha derivens

an pyth re erviras Arloedh an luyow erbynn Ejyp.

13Pennsevigyon Soan a dheuth ha bos fellyon,

pennsevigyon Nof yw toellys;

pennmeyn hy loethow

re ledyas Ejyp yn stray.

14An Arloedh re gemmyskas a-ji dhedhi

spyrys gorth;

i a wra dhe Ejyp trebuchya yn oll hy gwriansow,

kepar dell drebuch penn-medhow yn y hwyj.

15Ny'n jevydh Ejyp travyth dhe wul,

penn na lost, palm na korsenn.

16Y'n jydh na Ejyp a vydh avel benynes. I a gren rag own, a-rag leuv Arloedh an luyow, a wra ev hy shakya er aga fynn. 17Pow Yuda a vydh euth dhe Ejyp; peub may fo kampoellys dhodho a vydh dyegrys drefenn kusul Arloedh an luyow, a erviras er aga fynn.

Bennath ow Tos war Ejyp, Assyria hag Ysrael

18Y'n jydh na y fydh pymp sita yn pow Ejyp ow kewsel taves Kanan hag ow ti lelder dhe Arloedh an luyow. Onan anedha a vydh henwys Sita an Howl.

19Y'n jydh na y fydh alter dhe'n Arloedh yn kres pow Ejyp, ha peulven dhe'n Arloedh orth hy or. 20Ev a vydh tokyn ha dustuni dhe Arloedh an luyow yn pow Ejyp. Pan grions dhe'n Arloedh drefenn an arwaskoryon, ev a dhannvon dhedha selwador, hag ev a's menten ha'ga delivra. 21An Arloedh a wra y honan aswonnys dhe Ejyp, hag Ejyp a aswonn an Arloedh y'n jydh na, ha gul sakrifisow hag offrynnow greun; i a ambos ambosow dhe'n Arloedh ha'ga hewera. 22An Arloedh a wysk Ejyp gans pla, ow kweskel hag ow sawya. I a dreyl dhe'n Arloedh hag ev a woslow orth aga fysadow, ha'ga sawya.

23Y'n jydh na y fydh fordh-veur dhiworth Ejyp bys yn Assyria, hag Assyria a vydh kevrennys gans Ejyp, hag Ejyp gans Assyria. Ejyp hag Assyria a wordh war-barth.

24Y'n jydh na Ysrael a vydh an tressa war-barth gans Ejyp hag Assyria, bennath yn kres an norvys. 25Arloedh an luyow a's bennik, ow leverel, ‘Benniges re bo ow fobel Ejyp, hag ober ow diwla Assyria, hag Ysrael ow eretons.’