1An ger a welas Ysay mab Amos a-dro dhe Yuda ha Yerusalem.

2Y'n dydhyow diwettha

menydh chi an Arloedh

a vydh fastys avel penn an menydhyow;

hag y fydh drehevys yn-bann dres an breow,

hag oll an kenedhlow a dheu dhodho yn fros.

3Poblow pals a dheu ha leverel,

‘Dewgh, ha deun ni yn-bann dhe venydh an Arloedh,

dhe ji Duw Yakob;

hag ev a dhysk dhyn y fordhow,

ha ni a gerdh yn y hynsyow.’

Rag yn-mes a Sion a teu lagha,

ha ger an Arloedh dhiworth Yerusalem.

4Ev a vydh breusydh ynter an kenedhlow,

ha mayner rag lies pobel.

I a wysk aga kledhedhyow yn soghyow,

ha'ga guwow yn higow-skethra.

Ny dhrehav kenedhel kledha erbynn kenedhel,

ha ny dhyskons gwerrya namoy.

Breus erbynn Balghder

5Chi Yakob,

dewgh, kerdhyn ni

yn golow an Arloedh.

6Rag ty re forsakyas dha bobel,

chi Yakob,

drefenn i dhe vos leun a hudoryon2:6 a hudoryon: Nyns usi an geryow ma y'n tekst ebrow dhiworth an howldrevel,

hag a goelyogyon, kepar ha'n Filistysi,

hag i a shak diwleuv gans fleghes estrenyon.

7Y wlas yw lenwys a arghans hag owr,

ha nyns eus diwedh dh'y dresoryow.

Y wlas yw lenwys a vergh;

ha nyns eus diwedh dh'y jarettow.

8Y wlas yw lenwys a idolys;

i a wordh gweyth aga diwla,

an pyth re wrug aga bysies.

9Den yw uvelhes,

ha gour yw iselhes –

na wra gava dhedha.

10Deus y'n garrek,

omgel y'n doust

dhiworth fas euth an Arloedh

ha splannder y veuredh!

11Dewlagas balghder den a vydh uvelhes,

ha goeth tus a vydh iselhes,

ha'n Arloedh unnsel a vydh ughelhes y'n jydh na.

12Rag yma dhe Arloedh an luyow dydh

erbynn pubonan yw goethus hag ughel,

hag erbynn pubonan yw eksaltys,

hag i a vydh uvelhes;

13hag erbynn oll kederwydh Lebanon

yw ughel hag eksaltys,

ha war oll derow Bashan;

14hag erbynn oll an menydhyow ughel,

hag erbynn oll an vronnow drehevys yn-bann;

15hag erbynn pub tour ughel,

hag erbynn bub fos kerys;

16hag erbynn oll gorholyon Tarshish,

hag erbynn oll an lestri teg.

17Ena goeth den a vydh uvelhes,

ha balghder tus a vydh iselhes;

an Arloedh unnsel a vydh ughelhes y'n jydh na.

18An idolys a dremen glan dhe-ves.

19I a dheu yn fowys y'n kerrek,

hag yn pansow y'n dor,

dhiworth fas euth an Arloedh

ha splannder y veuredh,

pan sev dhe ownekhe an norvys.

20Y'n jydh na den a dewl

y idolys a arghans ha'y idolys a owr,

an pyth a wrug pubonan dhodho y honan dhe wordhya,

dhe'n godhow ha dhe'n ughsommyses,

21dhe vones yn fowys y'n kerrek

hag yn folsyow an kleger

dhiworth fas euth an Arloedh

ha splannder y veuredh,

pan sev dhe ownekhe an norvys.

22Na wra mellya gans den

may ma y anall yn y dhewfrik:

rag pandr'a amont ev?