1Profoesans a-dro dhe wylvos an mor.

Kepar dell dremen hwaffys awelyow y'n Negeb,

ev a dheu dhiworth an gwylvos,

dhiworth tir euthyk.

2Gwelesigeth asper yw disklerys dhymm;

an traytour a drayt,

an gwastyer a wast.

Yskynn, Elam,

gwra esedhva, Media;

my a wrug dhe oll hy hanasow hedhi.

3Rakhenna ow diwglun yw leun a grena,

gloesow a'm kemmeras kepar ha gloesow dineythi;

troblys ov ma na allav klewes,

ha dyegrys ov ma na allav gweles.

4Ow holonn a's teves penn-dro,

degrena re'm dalghennas;

an tewlwolow a hwansen

re dheuth ha bos skruth dhymm.

5I a bareus moesow,

i a les an strelyow;

i a dheber, i a yv.

Sevewgh, hwi pennsevigyon,

olewewgh an skoes!

6Rag yndellma y lever an Arloedh dhymm:

‘Ke, sett goelyador,

re dheriffo an pyth a wel.

7Pan wel ev charett ha para a varghogyon,

koloven a asenes, koloven a gowrvargh,

goslowes ev gans rach,

gans meur a rach.’

8Ena an goelyador a elwis:21:8 Ena an goelyador a elwis: Amendys. Ebrow Ha Lew a elwis.

‘War dour-goelyas sevel a wrav, a arloedh,

dydhweyth prest;

ha my a worta y'm goelyas

der oll an nosow.

9Mir, otta gour ow tos yn charett,

gans para a vergh.’

Ena ev a worthybis,

‘Babylon re goedhas, re goedhas;

hag oll imajys hy duwow

yw brewys war an leur.’

10Ow fobel, drushys ha noethys,

an pyth a glewis dhiworth Arloedh an luyow,

Duw Ysrael, my re dherivas orthowgh.

11Profoesans a-dro dhe Duma.

Nebonan a elow dhymm dhiworth Seir,

‘Goelyador, pandr'yw gesys a'n nos?

Goelyador, pandr'yw gesys a'n nos?’

12An goelyador a lever,

‘Yma myttin ow tos, ha nos ynwedh.

Mar kovynnowgh, govynnewgh;

Dehwelewgh, dewgh.’

13Profoesans a-dro dhe Arabia.

Yn kranndir Arabia yth ostyowgh,

a garavanow an Dedanysi.

14Drewgh dowr dhe'n den sygh,

dyerbynnewgh an fowesik gans bara,

hwi annedhysi pow Tema.

15Rag i re fias dhiworth an kledhedhyow,

dhiworth an kledha noeth,

ha dhiworth an warak plegys,

dhiworth garowder an vatel.

16Rag yndellma y leveris an Arloedh dhymm: A-ji dhe unn vlydhen, war-lergh blydhynyow arvethesik, oll glori Kedar a worfenn. 17Remenant an waregoryon, kasoryon mebyon Kedar, a vydh boghes; rag an Arloedh, Duw Ysrael, re gewsis.