1An profoesans a-dro dhe nans an welesigeth.

Pandr'yw dhis, ty dhe yskynna

dhe'n tohow, pub huni,

2ty neb yw leun a drosow,

sita a dervans, tre lowen?

Dha re ledhys ny vons ledhys gans an kledha,

na ny vons ledhys yn batel.

3Oll dha ledyoryon a fias war-barth;

prisonys vons heb plegya gwarak.

Prisonys war-barth a veu oll dha gasoryon alloesek,22:3 alloesek: Ow siwya an Septuagint.

kyn fisons a-bell.

4Rakhenna my a leveris,

Mirewgh dhe-ves dhiworthiv,

my a oel yn hwerow.

Na assayewgh ow honfortya

drefenn terroes myrgh ow fobel.

5Ytho an Arloedh, Duw an luyow, a'n jeves dydh

a dervans ha trettya ha deray

yn nans an welesigeth,

dydh a derri fosow

ha kriow dhe'n menydh.

6Elam a dhug an woen

gans charettow ha marghogyon;

Kir a dhiskudhas an skoes.

7An gwella a'th nansow yw leun a charettow,

ha marghogyon yw settys orth an yetys.

8Ev a gemmeras dhe-ves kudhans Yuda.

Y'n jydh na ty a viras

orth arvow Chi an Goeswik.22:8 Chi an Goeswik: Gwel I Myghternedh 10:17.

9Hwi a welas aswaow sita Davydh,

i dhe vos lies;

ha hwi a guntellas dowr an poll isella.

10Hwi a niveras chiow Yerusalem,

ha terri an chiow dhe gera an fos.

11Hwi a wrug kreun ynter an dhiw fos

rag dowr an poll koth,

mes ny virsowgh orth y Wrier

na gweles neb a'n furvyas nans yw pell.

12An Arloedh, Duw an luyow,

a elwis y'n jydh na

rag oelva ha rag kynvann,

rag bloghter ha rag omwrogysa gans yskar.

13Hag otta yma joy ha lowender,

ladha chatel ha ladha deves,

dybri kig hag eva gwin;

‘Dybryn hag evyn,

rag a-vorow ni a verow’.

14Arloedh an luyow re dhiskudhas hemma y'm diwskovarn:

Yn tevri ny vydh prenedh dhywgh rag an anewnder ma erna verwowgh,

yn-medh an Arloedh, Duw an luyow.

15Yndellma y lever an Arloedh, Duw an luyow: Ke, deus dhe'n menystrer ma, Shebna, governour an palys, ha lavar:

16Pandra eus dhis omma, ha piw eus dhis omma,

ty dhe dreghi bedh yn-mes ragos dha honan omma,

ow treghi bedh yn tyller ughel,

hag ow kervya trigva y'n garrek?

17Otta, an Arloedh a wra dha dheghesi dhe-ves yn harow, ty wour;

ev a sett dalghenn ynnos devri.

18Ev a wra dha vaylya yn stroeth avel pellenn

ha dha dewlel yn tir efan.

Ena ty a verow, hag ena y fydh dha jarettow splann,

ty veth dhe ji dha vester!

19My a wra dha herdhya dhiworth dha dyller,

ha'th terri dhiworth dha savla.

20Y'n jydh na my a elow ow gwas, Elyakim mab Hilkia. 21My a wra y gwetha gans dha bows ha kelmi dha wrogys warnodho. My a re dha awtorita yn y leuv, hag ev a vydh tas dhe annedhysi Yerusalem ha dhe ji Yuda. 22My a worr alhwedh chi Davydh war y skoedh; ev a iger ha nagonan ny dhege; ev a dhege ha nagonan ny iger. 23My a wra y gentra avel ebil yn tyller sur, hag ev a vydh tron a glori rag chi y das. 24I a greg warnodho oll glori chi y das, an agh ha'n askorr, oll an lestri byghan, dhiworth an bollow bys an pottow. 25Y'n jydh na, yn-medh Arloedh an luyow, y fydh removyes an ebil a veu kentrys yn tyller sur; treghys vydh, hag ev a goedh, ha'n begh esa warnodho a vydh treghys mes, rag an Arloedh re gewsis.