Breus ow Tos war an Norvys

1Awotta'n Arloedh ow gwastya an norvys ha'y dhistrui,

ha difasya y enep, ha skattra y drigoryon.

2Hag y fydh an keth tra rag an bobel ha'n oferyas,

rag an gwas ha'n mester,

rag an vaghteth ha'y mestres,

rag an prener ha'n gwerther,

rag an prester ha'n chevisyer,

rag an kresysor ha'n kendoner.

3An norvys a vydh difeythys glan ha kowlrevnys,

rag an Arloedh re gewsis an ger ma.

4An nor a gyn hag a wedher,

an bys a dhesygh hag a wedher;

pobel ughel an norvys a wannha.

5An nor yw defolys

yn-dann y annedhysi;

rag i re gammdremenas erbynn an laghys,

ha chanjya an ordenans;

i re dorras an kevambos a dhur bys vykken.

6Rakhenna molleth a dhevor an nor,

ha'y annedhysi a berth aga hessydhyans.

Rakhenna lehes yw annedhysi an nor,

ha nebes yw gesys.

7Gwin nowydh a dhesygh

ha'n gwinbrenn a wedher;

oll an re yw heudh aga holonn a hanas.

8Joy an tabourigow a hedh,

tros an re lowen a dhifyk,

ha joy an sowtri a hedh.

9Ny evons gwin gans kan;

korev yw hwerow dhe'n re a'n yv.

10An sita a dheray yw terrys dhe'n dor;

pub chi yw deges, ma na yll denvyth entra.

11I a oul rag gwin y'n stretys;

oll lowena a dewlha,

heudhder yw pellhes dhiworth an tir.

12Euth yw gesys y'n sita,

an yetys yw brewys yn magoryow.

13Yndellma y hwyrvydh yn kres an nor,

yn mysk an poblow,

kepar dell yw olewennow shakys dhiworth olewbrenn,

kepar ha gesigow an grappys pan worfenn an drevas.

14I a dhrehav aga lev, ha garma gans lowena;

i a gri dhiworth an howlsedhes a-dro dhe veuredh an Arloedh.

15Rakhenna y'n howldrevel ri glori dhe'n Arloedh;

hanow an Arloedh, Duw Ysrael, yn ynysow an mor.

16Dhiworth finyow an nor ni a glew kanow,

splannder dhe'n Gwiryon.

Yn-medhav, Tanowhes ov,

tanowhes, go-vy!

Traytours a drayt,

traytours a drayt yn pur dhevri.

17Euth, ha'n pytt, hag antell

warnas, annedhyas an norvys!

18Piwpynag a fio dhiworth tros an euth

a goedh y'n pytt,

ha piwpynag a yskynno dhiworth an pytt

a vydh kechys y'n vaglenn.

Rag fenestri an ughelder yw igerys

ha selyow an norvys a gren.

19An norvys yw dralys glan,

an norvys yw folsys kwit,

an norvys yw shakys yn harow.

20An norvys a drebuch avel penn-medhow,

ha leska avel kryllas.

Y gammweyth yw poes warnodho;

ev a goedh, heb sevel namoy.

21Y'n jydh na an Arloedh a gessydh

lu an re ughel usi a-ugh,

ha myghternedh an tir usi war an dor.

22I a vydh kuntellys war-barth

avel prisnoryon yn pytt,

deges yn dorvagh,

ha wosa lies dydh i a vydh kessydhys.

23An loer a's tevydh meth

ha'n howl a vydh shamys;

rag Arloedh an luyow a reyn

yn menydh Sion hag yn Yerusalem,

ha glorifiys vydh a-rag y henavogyon.