Gormola rag Selwyans Duw

1A Arloedh, ty yw ow Duw;

my a'th ughelha, my a wormel dha hanow,

rag ty re wrug marthusyon,

towlow a'n termyn koth, len ha sur.

2Ty re wrug an sita yn graghell,

an kastell gans keryow yn magor.

Nyns yw palys an estrenyon sita namoy;

nevra ny vydh dastrehevys.

3Rakhenna pobel grev a wra dha lorifia,

ha sitys kenedhlow garow a berth own ahanas.

4Ty re beu dinas dhe'n den gwann,

dinas dhe'n den truan yn y ahwer,

skovva rag an gowas ha goskes rag toemmder.

Rag anall turans yw kepar ha kowas a-has erbynn fos.25:4 kowas a-has erbynn fos: Po amendyans kowas a-has yeyn, po kowas a-has a'n gwav.

5Kepar ha syghor yn tir sygh,

ty a demper tros estrenyon;25:5 estrenyon: Po amendyans turans.

kepar ha toemmder yn goskes kommol,

ev a goselha kan turans.

6War an menydh ma Arloedh an luyow a wra rag oll an poblow

kevewi a voes rych gans oyl, kevewi a win koth,

boes rych sawrys gans mer, gwin koth sidhlys.

7War an menydh ma ev a gollenk

an lien-bedh usi dres oll an poblow,

an lien lesys war oll an kenedhlow.

8Ev a gollenk ankow bys vykken.

An Arloedh Duw a sygh an dagrow dhiworth pub fas;

ha kemmeres mewl y bobel dhe-ves a-dhiwar oll an norvys,

rag an Arloedh re gewsis.

9Y'n jydh na y fydh leverys,

Otta, hemm yw agan Duw;

ni a'n gortas, hag ev a'gan sawyas.

Hemm yw an Arloedh ha ni re'n gortas;

bedhen ni lowen ha fest heudhik yn y selwyans.

10Rag leuv an Arloedh a bowes war an menydh ma.

Moab a vydh trettys yn-dann dreys yn dyller

dell yw kala trettys yn teylek.

11Ev a les y dhiwla ynni

avel neuvyer pan neuv.

Y woeth a sedh, yn despit dhe wayans y dhiwleuv.

12Keryow ughel dha fosow a vydh dres yn-nans,

iselhes, tewlys dhe'n dor, bys y'n doust.