Kan Budhogoleth

1Y'n jydh na an gan ma a vydh kenys yn pow Yuda:

Ni a'gan beus sita krev;

ev a wra selwyans,

avel fosow ha kerweyth.

2Igerewgh an yetys

rag mayth entro dredha

an genedhel wiryon, a with lelder.

3Ty a with yn kres perfydh an den yw fyrv y vrys,

rag ev a drest ynnos.

4Trestyewgh y'n Arloedh bynnari

rag an ARLOEDH DUW26:4 an ARLOEDH DUW: Ebrow Yah an ARLOEDH. yw karrek bys vykken.

5Ev a uvelha

an re usi trigys y'n ughelder,

an sita ughel;

ev a's iselha bys y'n dor

ha'y thewlel bys y'n doust.

6An troes a's trett,

treys an den truan,

pasys an voghosogyon.

7Fordh an den gwiryon yw kompes;

ty a wra leven hyns an den gwiryon.

8Yn hyns dha vreusow,

ni a'th worta A Arloedh;

dha hanow ha dha govadh

yw hwans an enev.

9Ow enev a yeun war dha lergh y'n nos;

ow spyrys ynnov a'th hwila.

Rag pan vydh dha vreusow y'n wlas,

annedhysi an bys a dhysk ewnder.

10Mars yw favour diskwedhys dhe debelwas,

ny dhysk ewnder;

yn tir a ewnder ev a wra anewnder,

heb gweles meuredh an Arloedh.

11A Arloedh, drehevys yw dha leuv,

mes ny's gwelons.

Gwelens i dha avi rag dha bobel ha perthi meth;

gas dhe'n tan gwithys rag dha eskerens aga devorya.

12A Arloedh, ty a orden kres ragon,

rag pup-tra a wrussyn, ty a'n gwrug ragon.

13A Arloedh agan Duw,

arlydhi erell re'gan rewlyas a-der ty,

mes dha hanow unnsel ni a venek.

14Ny vew an re varow;

ny sev spyrysyon an re varow.

Rag ty re's kessydhyas ha'ga distrui;

ty re wrug oll kov anedha dhe vos kellys.

15Ty re gressyas kenedhel, A Arloedh,

ty re gressyas an genedhel; glorifiys os;

Ty re voghhas oll oryon an tir.

16A Arloedh, yn ahwer i a'th hwilas;

i a dhiveris pysadow

pan veu dha hessydhyans warnedha.

17Kepar dell wra benyn gans flogh,

ogas dhe dhineythi,

gwynnel ha kria yn hy gloesow,

yn kettella yth esen ni a-ragos, A Arloedh.

18Ni a gonsevyas, ni a wynnis yn poen,

mes ny dhineythsyn marnas gwyns.

Ny waynsyn budhogolethow y'n tir,

na fetha annedhysi an nor.26:18 na fetha annedhysi an nor: Po na dineythi tus dhe annedhi an nor.

19Dha re varow a vydh bew; aga horfow a sev.

Difunewgh ha kenewgh yn lowen, annedhysi an doust;

rag dha luth yw gluth a wolow,

ha'n nor a dhineyth spyrysyon an re varow.

20Ke ow fobel, enter dhe'th chambour

ha dege dha dharas a-dryv dhis;

omgudh prysweyth

bys pan dremen sorrvann.

21Rag awotta an Arloedh ow tos yn-mes a'y le

dhe gessydhya annedhysi an norvys rag aga anewnder.

An dor a dhiskudh an krow skoellys warnodho;

ha ny gudh y re ledhys byth moy.