Daspren Ysrael

1Y'n jydh na an Arloedh a gessydh gans y gledha kales, bras ha krev Lawethan an sarf usi ow fia, Lawethan an sarf usi ow gwrynya; ha ladha an dhragon usi y'n mor.

2Y'n jydh na:

Gwinlann desiradow, kenewgh a-dro dhedhi.

3My, an Arloedh, a's gwith;

prest my a wra hy dowrhe.

My a's gwith mo ha myttin

rag na's pystikko nagonan.

4Nyns ov vy serrys.

A pe spedhas ha spern,

y keskerdhsen er aga fynn yn batel

ha'ga leski oll yn tien.

5Poken treylyens dhymm rag skovva;

gwrens i kres genev vy,

ya, gwrens i kres genev vy.

6Y'n termyn a dheu, gwreydhya a wra Yakob,

Ysrael a egin ha bleujyowa

ha lenwel enep an nor a frut.

7A wrug ev aga gweskel dell weskis an re a's gweskis?

Po a vons ledhys kepar dell veu ledhys an re a's ladhas?

8Orth aga fellhe, orth aga divroa ty a strivyas gansa;

gans y hwyth fers ev a's removas yn dydh gwyns an Est.

9Rakhenna, yndellma anewnder Yakob a vydh prenys,

ha hemma a vydh an frut leun ow treylya dhe-ves y begh:

pan worr oll meyn an alter

avel meyn krey dralyes,

ny sev Asherim nag alteryow ynkys.

10Rag an sita gerys a vydh hy honan oll,

trigva ynyal ha forsakys;

ena an leughi a beur,

hag ena i a wrowedh ha devorya pub barrenn.

11Pan yw sygh hy skorrow, yth yns terrys dhe-ves;

benynes a dheu ha'ga enowi.

Rag homm yw pobel heb konvedhes;

rakhenna ny gemmer aga Kreador truedh anedha,

ha ny dhiskwedh aga Gwrier favour dhedha.

12Y'n jydh na an Arloedh a dhrush a-dhiworth kanel an Ewfrates bys yn nans Ejyp, ha hwi, mebyon Ysrael, a vydh kuntellys onan hag onan. 13Hag y'n jydh na, an hirgorn bras a vydh hwythys, ha'n re a veu kellys yn pow Assyria, ha'n re a veu divres yn pow Ejyp a dheu ha gordhya an Arloedh y'n menydh sans, yn Yerusalem.