Breus erbynn Samaria

1Go-hi gurun woethus pennow-medhow Efraym,

ha bleujenn gwedhrys y dekter splann,

usi war benn nans fethus an re medhwys gans gwin!

2Otta, yma dhe'n Arloedh onan yw krev ha galloesek,

kepar ha tewedh keser, annawel terroesus,

kepar ha tewedh dowrow meur ow fenna.

Gans y leuv ev a's deghes yn-nans dhe'n nor.

3Trettys yn-dann dreys a vydh

kurun woethus pennow-medhow Efraym.

4Bleujenn wedhrys an tekter splann

usi war benn an nans fethus

a vydh kepar ha'n kynsa figysenn kyns an hav;

piwpynag a's gwello

ev a's lenk, kettell y's teffo yn y balv.

5Y'n jydh na Arloedh an luyow a vydh kurun a glori,

garlont a dekter rag remenant y bobel,

6ha spyrys a wirvreus dhe neb a esedh yn breus,

ha nerth dhe'n re a dreyl an vatel dhe-ves dhiworth an yet.

7An re ma ynwedh a drebuch dre win,

ha sowdhanas dre gorev;

oferyas ha profoes a drebuch dre gorev,

ha sowdhanas dre win,

i a sowdhan dre gorev;

i a drebuch yn gwelesigeth,

ha gwandra yn ervirans.

8Rag oll moesow yw leun a hwyj ha kawgh;

nyns eus tyller vyth glan.

9‘Dhe biw y tysk ev skians?

ha dhe biw y styr ev an messaj?

An re didhenys dhiworth leth,

an re diberthys dhiworth an dhiwvronn?

10Rewl war rewl, rewl war rewl,

linenn war linenn, linenn war linenn,

banna omma, banna ena.’

11Yn hwir, gans gweusyow estren

ha gans taves alyon

ev a gews orth an bobel ma,

12dhedha may leveris

‘Homm yw an bowesva,

gwrewgh an den skwith dhe bowes,

ha hemm yw tyller diskwitha’,

mes ny vynnens klewes.

13Ger an Arloedh a vydh dhedha,

‘Rewl war rewl, rewl war rewl,

linenn war linenn, linenn war linenn,

banna omma, banna ena’,

rag mayth ellons ha koedha war-dhelergh

ha bos terrys, ha maglennys, ha kemmerys.

Breus erbynn Yerusalem

14Rakhenna klewewgh ger an Arloedh, hwi vostoryon,

a rewl an bobel ma yn Yerusalem.

15Rag hwi dhe leverel, ‘Ni re wrug kevambos gans ankow,

ha gans ifarn ni re wrug akord;

pan dremen an skorja avel liv ow fenna,

ny dheu dhyn ni;

rag ni re wrug gow agan skovva,

ha ni re omgudhas yn falsuri’ –

16rakhenna yndellma y lever an Arloedh Duw,

Otta, yth esov ow gorra selven yn Sion,

men prevys,

pennmen drudh, selven sur;

piwpynag a grysso ny vydh fysk.

17My a wra dhe wirvreus bos kordenn-vusura,

ha dhe ewnder bos plemmik;

keser a skub dhe-ves an skovva a wowyow,

ha dowrow a liv dres an gudhva.

18Agas kevambos gans ankow a vydh removyes,

ha'gas gwelesigeth gans ifarn ny sev.

Pan dremen an skorja dresowgh avel liv ow fenna,

hwi a vydh trettys dhe'n dor ganso.

19Peskweyth may tremen ev a'gas kemmer;

myttin ha myttin y tremen,

y'n jydh hag y'n nos.

Konvedhes an derivas a vydh pur euth.

20Rag an gweli yw re gott rag den dhe omystynna warnodho,

ha'n ballenn yw re ynn rag den dhe omvaylya.

21Rag an Arloedh a sev dell wrug orth menydh Perasim,

ev a gonner dell wrug yn nans Gibeon,

dhe wul y weythres, y weythres ankoth,

ha dhe oberi y ober, y ober estren.

22Lemmyn ytho na wrewgh ges,

ma na vo agas kadonyow krevhes;

rag my a glewas kollva dhe vos ervirys

dhiworth an Arloedh, Duw an luyow, war oll an tir.

23Goslowewgh ha klewewgh ow lev,

attendyewgh ha klewewgh ow lavar.

24A wra an aradror aras der an jydh oll rag hasa?

A wra ev igeri ha kloesya y dir der an jydh oll?

25Wosa levenhe y enep,

a ny skatter fenogel ha hasa kumin,

ha gorra gwaneth yn rewyow,

heydh yn y dyller ewn,

ha gwaneth-spelt yn y or?

26Y Dhuw a wra y gevarwoedha,

ha'y dhyski yn ewn.

27Rag nyns yw fenogel drushys gans draylell-dhrushya,

ha nyns yw ros kert rolys war gumin;

mes fenogel yw dornys gans lath

ha kumin gans gwelenn.

28Greun yw melys rag bara,

mes ny wra an drushyer drushya bys vykken;

ros y gert a rol warnodho,

mes ny wra y vergh y vala.

29Hemma ynwedh a dheu dhiworth Arloedh an luyow,

neb yw marthys yn kusul,

ha meur y dhoethter.