Esedhva a-dro dhe Yerusalem

1Ogh Ariel, Ariel,

an sita may kampyas Davydh ynni!

Keworrewgh blydhen dhe vlydhen;

gesewgh an goelyow dhe vos a-dro yn kylgh.

2Mes stroetha Ariel my a wra,

hag y fydh oelva ha kynvann,

ha hi a vydh dhymmo vy avel oeles alter.29:2 oeles alter: Yma dhe'n ger ebrow dew styr: an hanow Ariel, po oeles alter, may ma sakrifisow leskys warnedhi.

3My a wra kampya a-derdro29:3 a-derdro: Po war-lergh an Septuagint avel Davydh. er dha bynn,

ha gul esedhva er dha bynn gans touryow

ha drehevel tommennow er dha bynn.

4Ty a vydh dres isel, ha kewsel dhiworth an dor,

ha dha lavar a vydh ankler y'n mes a'n doust.

Dha lev a vydh avel nygromons yn-mes a'n dor,

ha dha lavar a hwyster yn-mes a'n doust.

5Mes routh dha estrenyon a vydh avel ponn,

ha'n routh fell a vydh avel us ow tremena dhe-ves.

Ena yn pols, distowgh,

6Arloedh an luyow a dheu dhis

gans taran ha dorgrys ha gans tros meur,

gans tewedh hag annawel, ha flamm a dan ow kowlleski.

7Ena routh oll an kenedhlow a omladh erbynn Ariel,

ha pubonan a omladh er hy fynn ha'y hastell, ha'n re a wra hy reudhi,

a vydh avel hunros, gwelesigeth a'n nos.

8Kepar dell wra den nownek hunrosa a dhybri,

ha difuna hwath gwag;

po den ha syghes dhodho a hunros a eva,

ha difuna klamderek, ha'y enev hwath ow polsa,

yndella y fydh dhe routh oll an kenedhlow

a omladh erbynn menydh Sion.

9Bedhewgh dyegrys ha penndegys,

omdhallhewgh ha bedhewgh dall;

bedhewgh medhow, mes a-der gans gwin,

trebuchyewgh, mes a-der gans korev.

10An Arloedh re dhinewis warnowgh

spyrys a hun down:

Ev re dhegeas agas dhewlagas, hwi brofoesi;

ha kudha agas pennow, hwi welesydhyon.

11An gwelesigeth a hemma oll yw dhywgh kepar ha geryow a lyver selys. Pan y'n rons dhe dhen lettrys, ow leverel ‘Lenn hemma’, yn-medh ev, ‘Ny allav, drefenn y vos selys.’ 12Ha pan yw an lyver res dhe dhen anlettrys, ow leverel, ‘Lenn hemma’, yn-medh ev, ‘Ny wonn lenna.’

13An Arloedh a leveris:

Drefenn an bobel ma dhe dhos nes dhymm gans aga ganow

hag ow enora gans aga diwweus,

mes aga holonn yw pell dhiworthiv,

ha'ga own ahanav yw dyskys gans gorhemmynn tus,

14rakhenna, awotta, my a wra

marthusyon arta gans an bobel ma,

marthus hag aneth.

Furneth aga thus fur a vydh ow mos dhe goll,

ha skians aga thus dhoeth a vydh kudhys.

15Go-i an re a gudh aga husul yn town dhiworth an Arloedh

ha gul aga oberow y'n tewlder;

yn-medhons, ‘Piw a'gan gwel? Piw a'gan aswonn?’

16Hwi a dreyl an pyth a-wartha dhe woeles.

A vydh priweythor tybys avel pri?

A lever an pyth yw gwrys a-dro dh'y wrier,

‘Ny'm gwrug’?

A lever pott a-dro dh'y briweythor,

‘Ny gonvedh’?

Govenek rag an Termyn a Dheu

17A ny vydh a bur verr spys pan vydh Lebanon

dreylys dhe dir feyth,

ha'n tir feyth bos tybys avel koeswik?

18Y'n jydh na an vodharogyon a glew

geryow lyver,

ha dhiworth duder ha tewlder

dewlagas an dhellyon a wel.

19Arta an re uvel a's tevydh lowena y'n Arloedh,

ha'n voghosogyon a lowenha yn Sans Ysrael.

20Rag ny vydh an turant na fella,

ha'n den a wra ges a dheu dhe dhiwedh,

hag oll an re yw hewoel dhe wul meschyv a vydh treghys dhe-ves;

21an re a dhampen den der er,

ha gorra maglenn rag an darsiwyas y'n yet,

ha treylya breus an den gwiryon gans fals dhustuni.

22Rakhenna yndellma y lever an Arloedh, neb a dhasprenas Abraham, a-dro dhe ji Yakob:

Na fella ny vydh Yakob ow kemmeres meth,

ha na fella ny vydh y fas gwannliwek;

23rag pan wel y fleghes,

ober ow diwla, a-ji dhodho,

i a sansha ow hanow,

ha sanshe Sans Yakob,

ha perthi own a Dhuw Ysrael.

24An re a wander yn spyrys a dheu dhe gonvedhes,

ha'n re a grodhvol a dhegemmer dyskans.