1Rag otta, an Arloedh, Arloedh an luyow,

a gemmer yn-mes dhiworth Yerusalem ha Yuda

skoedhyans ha lorgh,

oll skoedhyans a vara,

hag oll skoedhyans a dhowr,

2an kasor ha'n gour a vresel,

an breusyas ha'n profoes,

ha'n koelyek ha'n henavek,

3an kapten a hanter-kans

ha'n den a vri,

an kusulyer ha'n den skentel yn pystri,

ha'n gorhenyas skentel.

4My a re mebyon dhe vos aga fennsevigyon,

ha fleghes a's govern.

5An bobel a vydh arweskys,

peub gans den arall,

ha peub gans y gentrevek;

An yowynk a vydh tont erbynn an henavek,

ha'n koeg a wask an den wordhi.

6Pan gyv gour dalghenn yn y vroder

dhiworth chi y das, yn-medh ev,

‘Yma dhis mantell,

ty a vydh agan ledyer,

ha'n bern ma a vagoryow a vydh yn-dann dha leuv.’

7Y'n jydh na ev a gri, ow leverel,

‘Ny allav lystenna,

nyns eus naneyl bara na mantell y'm chi;

na'm gwrewgh vy

ledyer an bobel.’

8Rag Yerusalem re drebuchyas

ha Yuda re goedhas,

drefenn bos aga thaves ha'ga gwriansow erbynn an Arloedh,

ow rebellya erbynn golok y wolewder.

9Semlans aga fas a worthyp er aga fynn

ha disklerya aga fegh avel Sodom;

ny's kudhons.

Go-i aga enevow!

rag i re dhros drog warnedha aga honan.

10Leverewgh dhe'n den gwiryon, y fydh da ragdho,

rag i a dheber frut aga gwriansow.

11Go-ev an tebelwas, drog a'n jevydh;

drefenn war-lergh ober y dhiwleuv y fydh gwrys dhodho ev.

12Ow fobel, hy rewloryon a's arwask,

ha benynes a's rewl.

Ow fobel, dha ledyoryon a wra dhedha gwandra,

ha distrui fordh dha hynsyow.

13An Arloedh re gemmeras y le dhe bledya y gen,

ha sevel dhe vreusi poblow.

14An Arloedh a dheu yn breus

gans henavogyon ha pennsevigyon y bobel:

Hwi yw neb re dhiswrug an winlann;

yma preydh an boghosek yn agas chiow.

15Pyth yw dhywgh, hwi dhe vrewi ow fobel,

ha melyas fasow an voghosogyon?

yn-medh an Arloedh, Duw an luyow.

16An Arloedh a leveris:

Rag bos myrghes Sion goethus,

ow kerdhes gans konnaow omystynnys,

ha dewlagas ardhynus,

ow kerdhes gans kammow bleudh,

ha'n modrewi war aga dewufern ow tynkyal;

17an Arloedh a dhre krevennow

war glopenn myrghes Sion,

ha'n Arloedh a lommha aga thal.

18Y'n jydh na an Arloedh a wra remova tekter modrewi aga dewufern, an penngwiskow ha'n tergh-kromman; 19an skinennow, an breghelligow, ha'n vaylys; 20an tulyfantys, an chaynys ufern, an grogysyow pann, an botellow ethenn, ha'n soenelligow; 21an bysowyer sel ha'n bysowyer troen; 22an dillas dy'goel, an mantelli, an gwarrlennow ha'n tigennow; 23an niwlwias, an iswiskasow, an tulyfantys, ha'n kudhlennow penn.

24Yn le spisys y fydh fler,

hag yn le grogys pann y fydh kordenn,

yn le gols plethys y fydh bloghter,

yn le dillas teg y fydh yskar,

ha kreyth leskys yn le tekter.

25Dha wer a goedh der an kledha,

ha'th kasoryon y'n gas.

26Hy yetys a gyn ha galari,

hag omdhivesys hi a vydh esedhys war an dor.